ಮಂಗಳವಾರ, ಜನವರಿ 21, 2020
23 °C
ಒಳನೋಟ

ಒಳನೋಟ| ಸೌಲಭ್ಯ ವಂಚಿತ ಕ್ರೀಡಾ ಕ್ಷೇತ್ರ: ಪ್ರತಿಭೆಗಳಿವೆ, ಅವಕಾಶಗಳಿಲ್ಲ

ಪ್ರಮೋದ್ Updated:

ಅಕ್ಷರ ಗಾತ್ರ : | |

Prajavani

ಹುಬ್ಬಳ್ಳಿ: ಸೈಕ್ಲಿಂಗ್‌, ಕುಸ್ತಿ, ಹಾಕಿ, ಫುಟ್‌ ಬಾಲ್‌, ಕಬಡ್ಡಿ, ಅಟ್ಯಾಪಟ್ಯಾ, ಸೆಪಕ್‌ ಟಕ್ರಾ ಹೀಗೆ ಹಲವಾರು ಕ್ರೀಡೆಗಳಿಗೆ ಹೆಸರಾದ ಉತ್ತರ ಕರ್ನಾಟಕದ ಕ್ರೀಡಾಪಟುಗಳಿಗೆ ನಿಮ್ಮ ಬದುಕಿನ ಗುರಿಯೇನು ಎಂದು ಒಮ್ಮೆ ಪ್ರಶ್ನಿಸಿ ನೋಡಿ ‘ಒಲಿಂಪಿಕ್ಸ್‌ನಲ್ಲಿ ಪಾಲ್ಗೊಳ್ಳಬೇಕು’ ಎಂಬ ಸಿದ್ಧ ಉತ್ತರ ಬರುತ್ತದೆ.

ಏಕೆಂದರೆ ಶಾಲಾ, ಕಾಲೇಜುಗಳಲ್ಲಿ ವರ್ಷಕ್ಕೊಮ್ಮೆ ನಡೆಯುವ ಕ್ರೀಡಾಕೂಟದಲ್ಲಿ ಅತಿಥಿಗಳು ‘ಒಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲುವುದೇ ನಿಮ್ಮ ಬದುಕಿನ ಗುರಿಯಾಗಲಿ’ ಎಂಬ ಸಿದ್ಧ ಭಾಷಣ ಮಾಡಿರುತ್ತಾರೆ. ಅದೇ ಮಾತನ್ನು ಕೇಳಿಸಿಕೊಂಡು ಯುವ ಕ್ರೀಡಾಪಟುಗಳು ಪದಕದ ಕನಸು ನೇಯುತ್ತಾರೆ. ಆದರೆ, ಕಣ್ಣೆದುರೇ ಹೋಬಳಿ ಹಾಗೂ ತಾಲ್ಲೂಕು ಮಟ್ಟದ ಕ್ರೀಡಾಕೂಟ ನಡೆದರೂ ಕಣ್ಣೆತ್ತಿ ಸಹ ನೋಡುವುದಿಲ್ಲ!

ನಗರ ಹಾಗೂ ಗ್ರಾಮೀಣ ಭಾಗದಲ್ಲಿ ಇಂಥ ಪರಿಸ್ಥಿತಿ ಇರುವಾಗ ಮಕ್ಕಳಿಗೆ ಕ್ರೀಡೆಗಳ ಮಹತ್ವ ಹೇಳಿಕೊಡದಿದ್ದರೆ, ಪೂರಕ ವಾತಾವರಣ ರೂಪಿಸದಿದ್ದರೆ ಅವರಿಂದ ದೊಡ್ಡ ಸಾಧನೆಯನ್ನು ನಿರೀಕ್ಷೆ ಮಾಡುವುದಾದರೂ ಹೇಗೆ?

ಬೆಂಗಳೂರು, ಮೈಸೂರು, ಉಡುಪಿ ಮತ್ತು ಮಂಗಳೂರು ಭಾಗಕ್ಕೆ ಸಿಕ್ಕಷ್ಟು ಕ್ರೀಡಾಸೌಲಭ್ಯಗಳು ಈ ಭಾಗಕ್ಕೆ ಮೊದಲಿ ನಿಂದಲೂ ಸಿಕ್ಕಿಲ್ಲ ಎನ್ನುವುದು ಇಲ್ಲಿನ ಕ್ರೀಡಾಪಟುಗಳ ಆರೋಪ. ಸಿಕ್ಕ ಅವಕಾಶಗಳನ್ನು ಸಮರ್ಥವಾಗಿ ಬಳಸಿಕೊಳ್ಳಲು ಈ ಭಾಗದ ಜನಪ್ರತಿನಿಧಿಗಳು ಸಹ ಇಚ್ಛಾಶಕ್ತಿ ತೋರಿಸಿಲ್ಲ ಎನ್ನುವುದು ಅವರ ವಾದ.

ಹಾಕಿ ಪ್ರತಿಭೆಗಳ ತವರು ಗದುಗಿನಲ್ಲಿ ಸಿಂಥೆಟಿಕ್‌ ಟರ್ಫ್‌ ಇಲ್ಲ. ಹುಬ್ಬಳ್ಳಿಯಲ್ಲಿಯೂ ಇದೇ ಸ್ಥಿತಿ. ಆದ್ದರಿಂದ ಈ ಭಾಗದ ಹಾಕಿಪಟುಗಳು ಬೆಂಗಳೂರು ಸೇರಿಕೊಳ್ಳುತ್ತಿದ್ದಾರೆ. ಮನೆಗೊಬ್ಬ ಫುಟ್‌ಬಾಲ್‌ ಪ್ರತಿಭೆಯನ್ನು ಹೊಂದಿರುವ ಹುಬ್ಬಳ್ಳಿಯ ರೈಲ್ವೆ ಕ್ವಾಟ್ರರ್ಸ್‌ನ ಆಟಗಾರರು ಪುಣೆ, ಮುಂಬೈ, ಗೋವಾ ಪಾಲಾಗುತ್ತಿದ್ದಾರೆ.

ಪಠ್ಯದ ಒತ್ತಡದಿಂದ ಮಕ್ಕಳಿಗೆ ಕ್ರೀಡಾಪಾಠ ಮಾಡುವಷ್ಟು ಪುರುಸೊತ್ತು ಶಿಕ್ಷಕರಿಗೂ ಇಲ್ಲದಂತಾಗಿದೆ. ಸಾಕಷ್ಟು ಶಾಲೆ ಗಳಿಗೆ ಮೈದಾನಗಳೇ ಇಲ್ಲ. ಶಾಲೆಗಳೇ ಇಕ್ಕಟ್ಟಾಗಿರುವಾಗ ಮೈದಾನಗಳನ್ನು ನಿರೀಕ್ಷಿಸುವುದಾದರೂ ಹೇಗೆ? ಆದ್ದರಿಂದ ಶಾಲೆಗಳು ಪಾಠಕ್ಕಷ್ಟೇ ಸೀಮಿತವಾಗಿವೆ.

ಈಗಲೂ ಬದಲಾಗಿಲ್ಲ ಪರಿಸ್ಥಿತಿ: 2004ರ ಅಥೆನ್ಸ್‌ ಒಲಿಂಪಿಕ್ಸ್‌ನಲ್ಲಿ ದೇಶವನ್ನು ಪ್ರತಿನಿಧಿಸಿದ್ದ ಕುಂದಗೋಳ ತಾಲ್ಲೂಕಿನ ಪಶುಪತಿಹಾಳ ಎಂಬ ಪುಟ್ಟ ಗ್ರಾಮದ ಅಥ್ಲೀಟ್‌ ಜೆ.ಜೆ. ಶೋಭಾ ತಮ್ಮ ಶಾಲಾ ದಿನಗಳಲ್ಲಿ ರಸ್ತೆಯ ಮೇಲೆ ಓಡಿ ರಾಜ್ಯ ಹಾಗೂ ರಾಷ್ಟ್ರೀಯ ಮಟ್ಟದ ಅಥ್ಲೆಟಿಕ್‌ ಕೂಟಗಳಲ್ಲಿ ಪದಕಗಳನ್ನು ಜಯಿಸಿದ್ದರು. ಅಲ್ಲಿನ ಪರಿಸ್ಥಿತಿ ಈಗಲೂ ಭಿನ್ನವಾಗಿಲ್ಲ. ಗ್ರಾಮೀಣ ಭಾಗದಲ್ಲಿ ಅಥ್ಲೆಟಿಕ್ಸ್‌ ಸ್ಪರ್ಧೆಗಳು ರಸ್ತೆಯ ಮೇಲೆ ನಡೆಯುತ್ತವೆ. ಉಳಿದ ಸ್ಪರ್ಧೆಗಳಿಗೆ ತೆಗ್ಗು, ದಿನ್ನೆಗಳು ತುಂಬಿರುವ ಮೈದಾನಗಳೇ ಆಸರೆ. ಭವಿಷ್ಯದ ಕ್ರೀಡಾ ತಾರೆಯರಿಗೆ ಡಾಂಬರು ರಸ್ತೆಯೇ ಸಿಂಥೆಟಿಕ್‌ ಟ್ರ್ಯಾಕ್‌!

ರಾಜ್ಯದ 30 ಜಿಲ್ಲೆಗಳ ಪೈಕಿ ರಾಜ್ಯ ಸರ್ಕಾರ 13 ಜಿಲ್ಲೆಗಳಲ್ಲಿ ಮಾತ್ರ ಸಿಂಥೆಟಿಕ್‌ ಟ್ರ್ಯಾಕ್‌ಗಳನ್ನು ನಿರ್ಮಿಸಿದೆ. ಇವು ಕ್ರೀಡೆಯೇತರ ಚಟುವಟಿಕೆಗಳಿಗೆ ಹೆಚ್ಚು ಬಳಕೆಯಾಗುತ್ತಿವೆ.

‘ಶಾಲಾ, ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳಿಗೆ ವಾರ್ಷಿಕ ಕ್ರೀಡಾ ಶುಲ್ಕ ಪಡೆಯುತ್ತಾರೆ. ಸರ್ಕಾರಿ ಶಾಲೆಗಳಲ್ಲಿ ಈ ಶುಲ್ಕ ಕಡಿಮೆ ಇರುವ ಕಾರಣ ಬಹುತೇಕ ಹಣ ಬಳಕೆಯಾಗುತ್ತದೆ. ಆದರೆ, ಖಾಸಗಿ ಶಾಲೆಗಳಲ್ಲಿ ಪ್ರತಿವರ್ಷವೂ ಕ್ರೀಡಾಶುಲ್ಕದ ಹಣ ಪೂರ್ಣವಾಗಿ ಕ್ರೀಡಾ ಚಟುವಟಿಕೆಗಳಿಗೆ ಬಳಕೆಯಾಗುವುದಿಲ್ಲ. ಶಾಲಾಭಿವೃದ್ಧಿಗೂ ಇದೇ ಹಣ ಮೀಸಲಿಡುತ್ತಾರೆ. ಸರ್ಕಾರಿ ಶಾಲೆಗಳಲ್ಲಿ ದೈಹಿಕ ಶಿಕ್ಷಣ ಶಿಕ್ಷಕರು ಎಂಬುದು ನಿರ್ಲಕ್ಷಿತ ಹುದ್ದೆಯಾಗಿದೆ’ ಎಂದು ಹುಬ್ಬಳ್ಳಿ ತಾಲ್ಲೂಕಿನ ಪ್ರಾಥಮಿಕ ಶಾಲಾ ದೈಹಿಕ ಶಿಕ್ಷಣ ಶಿಕ್ಷಕರೊಬ್ಬರು ಬೇಸರ ವ್ಯಕ್ತಪಡಿಸುತ್ತಾರೆ.

ಸೌಲಭ್ಯ ಕಲ್ಪಿಸಲು ಹಿಂದೇಟು

ಒಲಿಂಪಿಕ್ಸ್‌ಗೆ ಅಗತ್ಯವಿರುವ ತರಬೇತಿ ಸ್ಥಳೀಯವಾಗಿ ಲಭಿಸಬೇಕು ಎಂಬ ಉದ್ದೇಶದಿಂದ ಕೇಂದ್ರ ಸರ್ಕಾರ ‘ಖೇಲೊ ಇಂಡಿಯಾ ಯೋಜನೆ’ಯಡಿ 2018ರಲ್ಲಿ ಹುಬ್ಬಳ್ಳಿಯಲ್ಲಿ 13 ಎಕರೆ ಜಾಗದಲ್ಲಿ ಕ್ರೀಡಾಸಂಕೀರ್ಣ ನಿರ್ಮಿಸಲು ಒಂದು ವರ್ಷದ ಹಿಂದೆಯೇ ಅನುಮತಿ ನೀಡಿದೆ. ₹13 ಕೋಟಿ ವೆಚ್ಚದ ಈ ಕಾಮಗಾರಿ ಆರಂಭವಾಗಿಯೇ ಇಲ್ಲ.

ರಾಜ್ಯದ ಸೈಕ್ಲಿಂಗ್‌ ಕಾಶಿ ವಿಜಯಪುರದಲ್ಲಿ ₹ 3.60 ಕೋಟಿ ವೆಚ್ಚದಲ್ಲಿ ಸೈಕ್ಲಿಂಗ್‌ ವೆಲೊಡ್ರೋಮ್‌ ನಿರ್ಮಿಸುವ ಯೋಜನೆ 2015ರಲ್ಲಿಯೇ ಆರಂಭವಾಗಿದ್ದು, ಇನ್ನೂ ಪೂರ್ಣಗೊಂಡಿಲ್ಲ. ವೆಲೊಡ್ರೋಮ್‌ ನಿರ್ಮಾಣವಾಗಿದ್ದರೆ, ಈ ಭಾಗದ ಸೈಕ್ಲಿಸ್ಟ್‌ಗಳು ಟ್ರ್ಯಾಕ್‌ ಸೈಕ್ಲಿಂಗ್‌ ಅಭ್ಯಾಸಕ್ಕಾಗಿ ದೆಹಲಿ, ಚೆನ್ನೈ, ಹೈದರಾಬಾದ್‌ಗೆ ಹೋಗುವುದು ತಪ್ಪುತ್ತಿತ್ತು. ಈ ಸೌಲಭ್ಯಗಳ ಕೊರತೆಯ ಪರಿಣಾಮ ಕ್ರೀಡಾಪಟುಗಳು ಮೇಲೂ ಆಗುತ್ತಿದೆ. ರಾಷ್ಟ್ರೀಯ ಟ್ರ್ಯಾಕ್‌ ಸೈಕ್ಲಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಕರ್ನಾಟಕ 40 ವರ್ಷಗಳಿಂದ ಪಾಲ್ಗೊಳ್ಳುತ್ತಿದೆ. ಆದರೆ, ಒಮ್ಮೆಯೂ ಸಮಗ್ರ ಪ್ರಶಸ್ತಿ ಜಯಿಸಿಲ್ಲ!

ಇಷ್ಟೆಲ್ಲ ಕೊರತೆಯಿದ್ದರೂ ಸ್ವ ಸಾಮರ್ಥ್ಯದಿಂದ ಅಭ್ಯಾಸ ಮಾಡಿ ರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದ ಸಾಕಷ್ಟು ಕ್ರೀಡಾಪಟುಗಳಿದ್ದಾರೆ. ಹುಬ್ಬಳ್ಳಿಯಲ್ಲಿ ಮಣ್ಣಿನ ಮೈದಾನದಲ್ಲಿ ಫುಟ್‌ಬಾಲ್‌ ಅಭ್ಯಾಸ ಮಾಡಿದ್ದ ಚಿಂತಾ ಚಂದ್ರಶೇಖರ್‌ ರಾವ್‌ ಪ್ರತಿಷ್ಠಿತ ಐ ಲೀಗ್‌ ಟೂರ್ನಿಯಲ್ಲಿ ಆಡಿದ್ದಾರೆ. ಹಳ್ಳಿಗಳ ರಸ್ತೆಗಳ ಮೇಲೆ ಸೈಕಲ್‌ ಓಡಿಸಿದ ರಾಜು ಭಾಟಿ, ಅನುಪಮಾ ಗುಳೇದ, ಸೌಮ್ಯಾ ಅಂತಾಪುರ, ವೆಂಕಪ್ಪ ಕೆಂಗಲಗುತ್ತಿ, ಸಹನಾ ಕುಡಿಗಾನೂರ ರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿದ್ದಾರೆ. ಉತ್ತರ ಕನ್ನಡದಲ್ಲಿ ಸಿದ್ಧಿ ಜನಾಂಗಕ್ಕೆ ಸೇರಿದ ಅನೇಕ ಕ್ರೀಡಾಪಟುಗಳು ಗುಡ್ಡಗಾಡು ಓಟ, ಅಥ್ಲೆಟಿಕ್ಸ್‌ನಲ್ಲಿ ಗಣನೀಯ ಸಾಧನೆ ಮಾಡಿದ್ದಾರೆ.

ಕ್ರೀಡಾ ತಜ್ಞರು, ಕ್ರೀಡಾಪಟುಗಳ ಅಭಿಪ್ರಾಯ

ಸೌಲಭ್ಯ, ಸಲಕರಣೆ, ಅಂಗಣ ಅಗತ್ಯ

ನಮ್ಮ ಕ್ರೀಡಾಕ್ಷೇತ್ರವನ್ನು ಬೇರುಮಟ್ಟದಲ್ಲಿ ಗಟ್ಟಿಗೊಳಿಸುವ ವ್ಯವಸ್ಥೆ ಇನ್ನೂ ಜಾರಿಗೆ ಬರಲಿಲ್ಲ. ಕ್ರೀಡಾಂಗಣ ಒಳಗೊಂಡಂತೆ ಸೌಲಭ್ಯಗಳು ಮತ್ತು ಬಳಕೆಗೆ ಅಗತ್ಯವಿರುವ ಸಲಕರಣೆಗಳನ್ನು ಒದಗಿಸುವ ಕಾರ್ಯವೂ ಸಮರ್ಪಕವಾಗಿ ನಡೆಯುತ್ತಿಲ್ಲ. ಚೀನಾ, ಜಪಾನ್ ಮುಂತಾದ ದೇಶಗಳಲ್ಲಿ ಬಾಲ್ಯದಲ್ಲಿ ಏಕರೂಪದ ತರಬೇತಿ ನೀಡಿ ಅವರವರ ಸಾಮರ್ಥ್ಯಕ್ಕೆ ತಕ್ಕಂತೆ ಮುಂದಿನ ದಾರಿಯಲ್ಲಿ ಮುನ್ನಡೆಸಲಾಗುತ್ತದೆ. ನಮ್ಮಲ್ಲಿ ಹೀಗೆ ಶಿಸ್ತುಬದ್ಧ ತರಬೇತಿ, ಆಯ್ಕೆ ಇತ್ಯಾದಿಗಳ ಕೊರತೆ ಕಾಣಿಸುತ್ತಿದೆ. ನಗರಗಳು, ಜಿಲ್ಲಾಮಟ್ಟಗಳಲ್ಲಿ ಮಾತ್ರ ಹೆಚ್ಚು ಸೌಲಭ್ಯಗಳನ್ನು ಒದಗಿಸುವ ಪರಿಪಾಠ ಈಗ ಇದೆ. ಇದರೊಂದಿಗೆ ತಾಲ್ಲೂಕು ಮತ್ತು ಗ್ರಾಮಗಳ ಶಾಲೆ–ಕಾಲೇಜುಗಳ ಕಡೆಗೂ ಗಮನ ನೀಡಬೇಕು.

ರೇಖಾ ಎಂ.ಆರ್, ಕ್ರೀಡಾ ಸಂಶೋಧಕಿ

ಹಳ್ಳಿಗಳಲ್ಲಿ ಎಲ್ಲವೂ ಸಿಗುವಂತಾಗಲಿ

ಹರಿಯಾಣ ಮತ್ತಿತರ ರಾಜ್ಯಗಳ ಗ್ರಾಮೀಣ ಪ್ರದೇಶಗಳಲ್ಲಿ ‘ಕ್ಲಬ್’ ಸಂಸ್ಕೃತಿ ಕ್ರೀಡಾ ಬೆಳವಣಿಗೆಯಲ್ಲಿ ದೊಡ್ಡ ಪಾತ್ರ ವಹಿಸುತ್ತಿದೆ. ನಮ್ಮಲ್ಲೂ ಹಳ್ಳಿಗಳ ಶಾಲೆ–ಕಾಲೇಜುಗಳಲ್ಲಿ ಕ್ರೀಡಾಕ್ಲಬ್‌ಗಳನ್ನು ಹುಟ್ಟು ಹಾಕಿ ಅಲ್ಲಿ ರಾಷ್ಟ್ರೀಯ-ಅಂತರರಾಷ್ಟ್ರೀಯ ಮಟ್ಟದ ಕ್ರೀಡಾಪಟುಗಳನ್ನು ಬೆಳೆಸುವ ಕಾರ್ಯ ನಡೆಯಬೇಕು. ಉತ್ತಮ ತರಬೇತಿ, ಕ್ರೀಡಾ ಸೌಲಭ್ಯಗಳು ಸಿಗುವಂತೆ ಆಗಬೇಕು. ಸದ್ಯದ ಪರಿಸ್ಥಿತಿಯಲ್ಲಿ ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡುವ ವರೆಗೂ ಒಳ್ಳೆಯ ತರಬೇತಿ ಮತ್ತು ಸೌಲಭ್ಯಗಳು ಸಿಗುವುದೇ ಇಲ್ಲ. ಹಳ್ಳಿಗಳಲ್ಲಿ ಕೂಡ ಎಲ್ಲ ಕ್ರೀಡೆಗಳ ಅಭ್ಯಾಸಕ್ಕೆ ಅನುಕೂಲ ಸಿಗುವಂತೆ ಆಗಬೇಕು. ಕ್ರೀಡಾ ಕ್ಲಬ್‌ಗಳು ಆರಂಭವಾದರೆ ಕ್ರೀಡಾ ಚಟುವಟಿಕೆಗೆ ಸಿಗುವ ಅವಕಾಶ ವಿಸ್ತಾರವಾಗಲಿದೆ.

ಪಿ.ಗುರುರಾಜ, ಅಂತರರಾಷ್ಟ್ರೀಯ ವೇಟ್ ಲಿಫ್ಟರ್

 

ಅಕಾಡೆಮಿಗಳಿಂದ ಅಥ್ಲೀಟ್‌ಗಳು ಬಚಾವ್

ಟ್ರ್ಯಾಕ್ ಮತ್ತು ಫೀಲ್ಡ್‌ನಲ್ಲಿ ಸಾಧನೆ ಮಾಡುವ ಬಯಕೆ ಇರುವವರಿಗೆ ರಾಜ್ಯದ ಶಾಲೆ–ಕಾಲೇಜುಗಳಲ್ಲಿ ಸೂಕ್ತ ಸೌಲಭ್ಯಗಳು ಇಲ್ಲ. ಆದ್ದರಿಂದ ಗ್ರಾಮೀಣ ಪ್ರದೇಶದ ಅಥ್ಲೀಟ್‌ಗಳಿಗೆ ಅಕಾಡೆಮಿಗಳೇ ಆಸರೆಯಾಗಿವೆ. ಶಿಕ್ಷಣ ಸಂಸ್ಥೆಗಳಲ್ಲಿ ಸೌಲಭ್ಯಗಳು ಇವೆಯಾದರೂ ಪರಿಣಿತ ತರಬೇತುದಾರರ ಕೊರತೆ ಇದೆ. ಉತ್ತಮ ತಂತ್ರಗಳನ್ನು ಹೇಳಿಕೊಡುವವರು, ನ್ಯೂಟ್ರಿಷಿಯನ್‌ಗಳು ಮತ್ತು ಗುಣಮಟ್ಟದ ಸೌಲಭ್ಯಗಳು ಬೇಕಾದರೆ ಅಕಾಡೆಮಿಗಳ ಕಡೆಗೆ ಹೋಗಬೇಕಾದ ಪರಿಸ್ಥಿತಿ ಇದೆ. ಶಾಲೆ-ಕಾಲೇಜುಗಳಲ್ಲಿ ಕ್ರೀಡಾ ತರಬೇತುದಾರರ ನೇಮಕಾತಿ ಸಂದರ್ಭದಲ್ಲೇ ಗಂಭೀರ ಚಿಂತನೆ ನಡೆಸಬೇಕಾದ ಅಗತ್ಯವಿದೆ. ಉನ್ನತ ಸಂಸ್ಥೆಗಳಲ್ಲಿ ಸರ್ಟಿಫಿಕೆಟ್ ಕೋರ್ಸ್‌ಗಳನ್ನು ಮಾಡಿದವರನ್ನು ಆಯ್ಕೆ ಮಾಡಿದರೆ ಈಗ ಸಿಗುತ್ತಿರುವ ತರಬೇತಿಯಲ್ಲಿ ಇನ್ನಷ್ಟು ಸುಧಾರಣೆ ಕಾಣಬಹುದು.

ರಾಧೇಶ್ ಎಂ.ಜಿ, ರಾಷ್ಟ್ರೀಯ ಅಥ್ಲೀಟ್

 

ಶಿಕ್ಷಣ ಸಂಸ್ಥೆಗಳ ಸುತ್ತ ಕ್ರೀಡಾ ಸೌಲಭ್ಯ ಬೆಳೆಯಲಿ

ಕ್ರೀಡಾಸೌಲಭ್ಯಗಳು ಶಾಲೆ ಮತ್ತು ಕಾಲೇಜುಗಳನ್ನು ಕೇಂದ್ರೀಕರಿಸಿ ಬೆಳೆಯಬೇಕು. ಇದರಿಂದ ವಿದ್ಯಾರ್ಥಿಗಳಿಗೂ ಅನುಕೂಲ, ಸಂಸ್ಥೆಗಳ ಸುತ್ತ ಇರುವ ಕ್ರೀಡಾಪಟುಗಳು ಮತ್ತು ಕ್ರೀಡಾ ಆಸಕ್ತರಿಗೂ ಲಾಭ. ಗ್ರಾಮೀಣ ಪ್ರದೇಶ ಹಾಗೂ ಪಟ್ಟಣಗಳ ಕೆಲವು ಶಾಲೆಗಳಲ್ಲಿ ಉತ್ತಮ, ವಿಶಾಲವಾದ ಕ್ರೀಡಾಂಗಣಗಳಿವೆ. ಅದರ ಲಾಭ ಪಡೆದು ಎಲ್ಲ ಕ್ರೀಡೆಗಳಿಗೂ ಅನುಕೂಲ ಆಗುವ ವಾತಾವರಣ ನಿರ್ಮಿಸಿದರೆ ಸದ್ಯದ ಪರಿಸ್ಥಿತಿಯಲ್ಲಿ ಸಾಕಷ್ಟು ಸುಧಾರಣೆ ಕಾಣಲು ಸಾಧ್ಯ. ಹೆಚ್ಚು ವೆಚ್ಚ ಇಲ್ಲದೆ ಆಡಲು ಸಾಧ್ಯವಾಗುವ ಕ್ರೀಡೆಗಳ ಜೊತೆ ದುಬಾರಿ ಕ್ರೀಡೆಗಳ ತರಬೇತಿ ಎಲ್ಲ ಕಡೆಯೂ ಸಿಗುವಂತೆ ಆಗಬೇಕು. ಇಚ್ಛಾಶಕ್ತಿ ಇದ್ದರೂ ಅನೇಕರು ಉತ್ತಮ ಕ್ರೀಡಾಂಗಣಗಳನ್ನು ನೋಡಿಯೇ ಇಲ್ಲ. ಅಂಥ ಬಡ ಕ್ರೀಡಾಪಟುಗಳಿಗೂ ಸೌಲಭ್ಯಗಳು ಸುಲಭವಾಗಿ ಸಿಗುವಂತೆ ಆಗಬೇಕು.

ವಿಠ್ಠಲ ಮುರ್ತಗುಡ್ಡೆ, ಜಿಮ್ನಾಸ್ಟಿಕ್ಸ್ ಕೋಚ್

 

ಸರ್ಕಾರಿ ಸೌಲಭ್ಯ, ಸಮಾಜದ ಸಹಕಾರ ಬೇಕು

ಗ್ರಾಮೀಣ ಪ್ರದೇಶಗಳಲ್ಲೇ ಬೆಳೆಯುವ ನಿರ್ದಿಷ್ಟ ಕ್ರೀಡೆಗಳು ಮೂಲಸೌಕರ್ಯಗಳಿಂದ ಸೊರಗುತ್ತಿವೆ. ಅಲ್ಲಿ ಪ್ರತಿಭೆಗಳು ಜಾಸ್ತಿ ಇದ್ದರೂ ಗುಣಮಟ್ಟದ ತರಬೇತಿ ಮತ್ತು ಉತ್ತಮ ಸೌಲಭ್ಯಗಳ ಕೊರತೆಯಿಂದಾಗಿ ಸರಿಯಾದ ಸಂದರ್ಭದಲ್ಲಿ ಬೆಳಕಿಗೆ ಬರುವುದಿಲ್ಲ. ಸೌಲಭ್ಯ ನೀಡಲು ಸರ್ಕಾರವೂ ಸಹಕಾರಕ್ಕೆ ಸಮಾಜವೂ ಮುಂದಾಗಬೇಕು. ಅವರವರ ಮನೆಯ ಮಕ್ಕಳಿಗೆ ಕ್ರೀಡೆಯಲ್ಲಿ ಆಸಕ್ತಿ ಇಲ್ಲ ಎಂದಾದರೆ ಅಂಥ ಮನೆಯವರು ಆಸಕ್ತಿ ಇರುವವರನ್ನು ಪ್ರೋತ್ಸಾಹಿಸುವ ದೊಡ್ಡ ಮನಸ್ಸು ಮಾಡಬೇಕು. ಇಂಥ ಸೌಹಾರ್ದ ಭಾವದಿಂದ ಕ್ರೀಡೆಗೆ ದೊಡ್ಡ ಲಾಭವೇ ಆಗಲಿದೆ. ನಮ್ಮಲ್ಲಿ ಕಷ್ಟಪಟ್ಟು ಸಾಧನೆ ಮಾಡಿದ ನಂತರ ಪ್ರೋತ್ಸಾಹ, ಬೆಂಬಲ, ಸಹಕಾರ ಎಲ್ಲವೂ ಸಿಗುತ್ತದೆ. ಆ ಕೆಲಸ ಆರಂಭದಲ್ಲೇ ಆಗಬೇಕು.

ರಫೀಕ್ ಹೊಳಿ, ಅಂತರರಾಷ್ಟ್ರೀಯ ಕುಸ್ತಿ ಪಟು

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು