ಹದಿನಾರರ ಹಂತಕ್ಕೆ ಸಿಂಧು, ಶ್ರೀಕಾಂತ್

7
ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌: ಪ್ರಣೀತ್‌ಗೆ ಜಯದ ಸಿಹಿ: ಪ್ರಣಯ್‌ ಸವಾಲು ಅಂತ್ಯ

ಹದಿನಾರರ ಹಂತಕ್ಕೆ ಸಿಂಧು, ಶ್ರೀಕಾಂತ್

Published:
Updated:
Deccan Herald

ನಾನ್‌ಜಿಂಗ್‌, ಚೀನಾ: ಭಾರತದ ಕಿದಂಬಿ ಶ್ರೀಕಾಂತ್‌ ಮತ್ತು ಪಿ.ವಿ. ಸಿಂಧು ಅವರು ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಷಿಪ್‌ನಲ್ಲಿ ಹದಿನಾರರ ಹಂತಕ್ಕೆ ದಾಪುಗಾಲಿಟ್ಟಿದ್ದಾರೆ.

ಬುಧವಾರ ನಡೆದ ಪುರುಷರ ಸಿಂಗಲ್ಸ್‌ ವಿಭಾಗದ ಎರಡನೆ ಸುತ್ತಿನ ಹೋರಾಟದಲ್ಲಿ ಶ್ರೀಕಾಂತ್‌ 21–15, 12–21, 21–14ರಲ್ಲಿ ಸ್ಪೇನ್‌ನ ಪ್ಯಾಬ್ಲೊ ಅಬಿಯಾನ್‌ ವಿರುದ್ಧ ಗೆದ್ದರು. ಈ ಹೋರಾಟ 62 ನಿಮಿಷ ನಡೆಯಿತು.

ಮೊದಲ ಗೇಮ್‌ನಲ್ಲಿ 2–4, 6–8ರಿಂದ ಹಿನ್ನಡೆ ಕಂಡಿದ್ದ ಐದನೆ ಶ್ರೇಯಾಂಕದ ಆಟಗಾರ ಶ್ರೀಕಾಂತ್‌, ನಂತರ ಪುಟಿದೆದ್ದರು. ಬಲಿಷ್ಠ ಕ್ರಾಸ್‌ಕೋರ್ಟ್‌ ಸ್ಮ್ಯಾಷ್‌ಗಳನ್ನು ಸಿಡಿಸಿ ಎದುರಾಳಿಯನ್ನು ತಬ್ಬಿಬ್ಬುಗೊಳಿಸಿದ ಅವರು 16–13ರ ಮುನ್ನಡೆ ತಮ್ಮದಾಗಿಸಿಕೊಂಡರು. ನಂತರವೂ ಶ್ರೀಕಾಂತ್‌ ಅಬ್ಬರಿಸಿದರು. ಸತತ ನಾಲ್ಕು ಪಾಯಿಂಟ್ಸ್‌ ಗಳಿಸಿ ಮುನ್ನಡೆಯನ್ನು 20–13ಕ್ಕೆ ಹೆಚ್ಚಿಸಿಕೊಂಡ ಅವರು ಜಯದ ಹಾದಿ ಸುಗಮ ಮಾಡಿಕೊಂಡರು. ಈ ಹಂತದಲ್ಲಿ ಎರಡು ಪಾಯಿಂಟ್ಸ್‌ ಕಲೆಹಾಕಿದ ಪ್ಯಾಬ್ಲೊ ಹಿನ್ನಡೆಯನ್ನು 15–20ಕ್ಕೆ ತಗ್ಗಿಸಿಕೊಂಡರು. ನಂತರ ಚುರುಕಾಗಿ ಒಂದು ಪಾಯಿಂಟ್‌ ಗಳಿಸಿದ ಶ್ರೀಕಾಂತ್‌ ಸಂಭ್ರಮಿಸಿದರು.

ಆರಂಭಿಕ ನಿರಾಸೆಯಿಂದ ಪ್ಯಾಬ್ಲೊ ಎದೆಗುಂದಲಿಲ್ಲ. ಎರಡನೆ ಗೇಮ್‌ನಲ್ಲಿ ಪರಿಣಾಮಕಾರಿ ಆಟ ಆಡಿದ ಅವರು ಭಾರತದ ಆಟಗಾರನನ್ನು ಕಂಗೆಡಿಸಿದರು.

ಹೀಗಾಗಿ ಮೂರನೆ ಗೇಮ್‌ನ ಆಟ ಕುತೂಹಲದ ಗಣಿಯಾಗಿತ್ತು. ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಮುಂದಾದ ಸ್ಪೇನ್‌ನ ಆಟಗಾರ 11–9ರಿಂದ ಮುಂದಿದ್ದರು. ಇದರಿಂದ ವಿಚಲಿತರಾಗದ ಶ್ರೀಕಾಂತ್‌ ಚುರುಕಿನ ಡ್ರಾಪ್‌ ಮತ್ತು ಬೇಸ್‌ಲೈನ್‌ ಹೊಡೆತಗಳ ಮೂಲಕ ಪಾಯಿಂಟ್ಸ್‌ ಸಂಗ್ರಹಿಸಿ ಖುಷಿಯ ಕಡಲಲ್ಲಿ ತೇಲಿದರು.

ಪ್ರಿ ಕ್ವಾರ್ಟರ್‌ ಫೈನಲ್‌ನಲ್ಲಿ ಶ್ರೀಕಾಂತ್‌, ಮಲೇಷ್ಯಾದ ಡರೆನ್‌ ಲೀವ್‌ ವಿರುದ್ಧ ಸೆಣಸಲಿದ್ದಾರೆ.

ಈ ವಿಭಾಗದ ಇನ್ನೊಂದು ಪಂದ್ಯದಲ್ಲಿ ಬಿ.ಸಾಯಿ ಪ್ರಣೀತ್‌ 21–18, 21–11ರಲ್ಲಿ ಸ್ಪೇನ್‌ನ ಲೂಯಿಸ್‌ ಎನ್ರಿಕ್‌ ಪೆನಾಲ್ವೆರ್‌ ಅವರನ್ನು ಮಣಿಸಿದರು.

ಎಚ್‌.ಎಸ್‌.ಪ್ರಣಯ್‌ 21–8, 16–21, 15–21ರಲ್ಲಿ ಬ್ರೆಜಿಲ್‌ನ ಯಗೊರ್‌ ಕೊಯೆಲ್ಹೊ ವಿರುದ್ಧ ಸೋತರು.

ಸಿಂಧುಗೆ ಜಯದ ಸಿಹಿ: ಮಹಿಳೆಯರ ಸಿಂಗಲ್ಸ್‌ ವಿಭಾಗದ ಎರಡನೆ ಸುತ್ತಿನ ಹೋರಾಟದಲ್ಲಿ ಮೂರನೆ ಶ್ರೇಯಾಂಕಿತ ಆಟಗಾರ್ತಿ ಸಿಂಧು 21–14, 21–9ರಲ್ಲಿ ಇಂಡೊನೇಷ್ಯಾದ ಫಿತ್ರಿಯಾನಿ ವಿರುದ್ಧ ಗೆದ್ದರು. ಈ ಹೋರಾಟ 35 ನಿಮಿಷ ನಡೆಯಿತು.

ಮಹಿಳೆಯರ ಡಬಲ್ಸ್‌ನಲ್ಲಿ ಭಾರತದ ಭರವಸೆಯಾಗಿದ್ದ ಅಶ್ವಿನಿ ಪೊನ್ನಪ್ಪ ಮತ್ತು ಎನ್‌.ಸಿಕ್ಕಿ ರೆಡ್ಡಿ ಮೊದಲ ಸುತ್ತಿನಲ್ಲೇ ಮುಗ್ಗರಿಸಿದರು.

ಭಾರತದ ಜೋಡಿ 14–21, 15–21ರಲ್ಲಿ ಜಪಾನ್‌ನ ಯೂಕಿ ಫುಕುಶಿಮಾ ಮತ್ತು ಸಯಾಕ ಹಿರೋಟಾ ಎದುರು ಪರಾಭವಗೊಂಡಿತು.

ಪುರುಷರ ಡಬಲ್ಸ್‌ನ ಎರಡನೆ ಸುತ್ತಿನ ಪೈಪೋಟಿಯಲ್ಲಿ ಸಾತ್ವಿಕ್‌ ಸಾಯಿರಾಜ್‌ ರಣಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ 18–21, 21–15, 16–21ರಲ್ಲಿ ಡೆನ್ಮಾರ್ಕ್‌ನ ಕಿಮ್‌ ಆ್ಯಸ್ಟ್ರಪ್‌ ಮತ್ತು ಆ್ಯಂಡ್ರೆಸ್‌ ಸ್ಕಾರಪ್‌ ರಾಸ್‌ಮಸೆನ್‌ ವಿರುದ್ಧ ಸೋತರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !