‘ಮುಂಬರುವ ಎಲ್ಲ ಒಲಿಂಪಿಯಾಡ್‌ಗೂ ಇದೇ ರೀತಿ ಕ್ರೀಡಾಜ್ಯೋತಿ ಸಂಚರಿಸಲಿದೆ. ಚೆಸ್‌ ಕ್ರೀಡೆಯು ಜನ್ಮತಾಳಿದ ದೇಶವಾದ ಭಾರತದಿಂದಲೇ ಜ್ಯೋತಿಯಾತ್ರೆ ಆರಂಭವಾಗಿ ಎಲ್ಲ ಖಂಡಗಳಿಗೂ ತೆರಳಿ ಬಳಿಕ ಆತಿಥೇಯ ದೇಶವನ್ನು ತಲುಪಲಿದೆ‘ ಎಂದು ಚೆಸ್ ಆಡಳಿತ ಮಂಡಳಿ ಫಿಡೆ ತಿಳಿಸಿದೆ.

ಸಮಯದ ಕೊರತೆಯಿಂದ ಈ ಬಾರಿ ಜ್ಯೋತಿಯಾತ್ರೆಯನ್ನು ಭಾರತಕ್ಕೆ ಮಾತ್ರ ಸೀಮಿತಗೊಳಿಸಲಾಗುತ್ತದೆ. ಮಾಜಿ ವಿಶ್ವ ಚಾಂಪಿಯನ್, ಭಾರತದ ವಿಶ್ವನಾಥನ್ ಆನಂದ್‌ ಯಾತ್ರೆಯ ಭಾಗೀದಾರರಲ್ಲಿ ಒಬ್ಬರಾಗಲಿದ್ದಾರೆ.

‘ಚೆಸ್‌ ಕ್ರೀಡೆಯನ್ನು ಜನಪ್ರಿಯಗೊಳಿಸಲು ಮತ್ತು ಅಭಿಮಾನಿಗಳನ್ನು ಹೆಚ್ಚಿಸಲು ಈ ಉಪಕ್ರಮ ಸಹಾಯವಾಗಲಿದೆ‘ ಎಂದು ಫಿಡೆ ಅಧ್ಯಕ್ಷ ಅರ್ಕಾಡಿ ಡೊರ್ಕೊವಿಚ್‌ ಹೇಳಿದ್ದಾರೆ.

‘ಕ್ರೀಡಾಜ್ಯೋತಿ ಸಂಚಾರದ ದಿನಾಂಕ ಮತ್ತು ಮಾರ್ಗವನ್ನು ಶೀಘ್ರ ತಿಳಿಸಲಾಗುವುದು‘ ಎಂದು ಒಲಿಂಪಿಯಾಡ್‌ ನಿರ್ದೇಶಕ ಭರತ್‌ ಸಿಂಗ್ ಚೌಹಾನ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.