ನವದೆಹಲಿ: ಭಾರತದ ಪಾಯಸ್ ಜೈನ್ ಏಷ್ಯನ್ ಜೂನಿಯರ್ ಟೇಬಲ್ ಟೆನಿಸ್ ಟೂರ್ನಿಯಲ್ಲಿ ಬೆಳ್ಳಿ ಗೆದ್ದುಕೊಂಡರು. ಮಂಗೋಲಿಯಾದ ಉಲಾನ್ಬಾತರ್ನಲ್ಲಿ ನಡೆದ ಟೂರ್ನಿಯ ಜೂನಿಯರ್ ಮತ್ತು ಕೆಡೆಟ್ ವಿಭಾಗದ ಫೈನಲ್ನಲ್ಲಿ ಅವರು ಚೀನಾದ ಯುವಾನ್ಯೂ ಚೆನ್ ವಿರುದ್ಧ ಸೋತರು.
ವಿಶ್ವದ ಮೊದಲ ರ್ಯಾಂಕಿನ ಆಟಗಾರನ ವಿರುದ್ಧ ದೆಹಲಿಯ ಹುಡುಗ 11–13, 6–11, 8–11, 5–11ರಿಂದ ಮಣಿದರು. 20 ನಿಮಿಷಗಳಿಗಿಂತ ಕಡಿಮೆ ಸಮಯದಲ್ಲೇ ಹಣಾಹಣಿ ಮುಗಿಯಿತು.
ಮೊದಲ ಗೇಮ್ನ್ನು ಗೆಲ್ಲುವ ಅವಕಾಶ ಜೈನ್ಗೆ ಇತ್ತು. ಆರಂಭದಲ್ಲಿ ಹಿನ್ನಡೆ ಅನುಭವಿಸಿದ್ದ ಅವರು ಬಳಿಕ ಮುನ್ನಡೆ ಕಂಡುಕೊಂಡಿದ್ದರು. ಆದರೆ ಭಾರತದ ಆಟಗಾರ ಎಸಗಿದ ಹಲವು ತಪ್ಪುಗಳು ಚೆನ್ ಅವರಿಗೆ ವರವಾದವು. ನಂತರ ಏಕಪಕ್ಷೀಯವಾಗಿ ಅವರು ಪಂದ್ಯ ವಶಪಡಿಸಿಕೊಂಡರು.
ಭಾರತದ ಜೂನಿಯರ್ ಬಾಲಕರ ತಂಡವೂ ಟೂರ್ನಿಯಲ್ಲಿ ಬೆಳ್ಳಿ ಪದಕ ತನ್ನದಾಗಿಸಿಕೊಂಡಿತು.
ಜೈನ್ ಗೆದ್ದ ಬೆಳ್ಳಿ ಪದಕ ಅವರಿಗೆ ವಿಶ್ವ ಕೆಡೆಟ್ ಚಾಲೆಂಜ್ನಲ್ಲಿ ಪಾಲ್ಗೊಳ್ಳುವ ಏಷ್ಯಾ ತಂಡದಲ್ಲಿ ಸ್ಥಾನ ಕಲ್ಪಿಸಿದೆ. ಪೋಲೆಂಡ್ನಲ್ಲಿ ಅಕ್ಟೋಬರ್ನಲ್ಲಿ ಈ ಟೂರ್ನಿ ನಡೆಯಲಿದೆ.