ರಾಷ್ಟ್ರೀಯ ಬಾಕ್ಸಿಂಗ್‌: ಹರಿಯಾಣ ಚಾಂಪಿಯನ್‌

ಹರಿಯಾಣ ಒಟ್ಟು 41 ಪಾಯಿಂಟ್ಸ್‌ ಕಲೆಹಾಕಿದರೆ, ರೈಲ್ವೆ ತಂಡ 39 ಪಾಯಿಂಟ್ಸ್‌ ಗಳಿಸಿ ರನ್ನರ್ಸ್‌ ಅಪ್‌ ಸ್ಥಾನ ಪಡೆಯಿತು. ಪಂಜಾಬ್‌ನ ಸಿಮ್ರನಜಿತ್‌ ಕೌರ್ (ಉತ್ತಮ ಬಾಕ್ಸರ್‌), ತಮಿಳುನಾಡಿನ ಎಸ್‌. ಕಲಾವತಿ (ಉದಯೋನ್ಮುಖ ಬಾಕ್ಸರ್‌) ಮತ್ತು ತೆಲಂಗಾಣದ ನಿಖತ್ ಜರೀನಾ (ಚಾಲೆಂಜಿಂಗ್ ಬಾಕ್ಸರ್‌) ವೈಯಕ್ತಿಕ ಪ್ರಶಸ್ತಿ ಪಡೆದರು. ಹರಿಯಾಣ ಮತ್ತು ರೈಲ್ವೆ ಬಾಕ್ಸರ್‌ಗಳು ತಲಾ ಆರು ಚಿನ್ನದ ಪದಕ ಪಡೆದರು.

ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಕ್ವಾರ್ಟರ್ ಫೈನಲ್‌ ಪ್ರವೇಶಿಸಿದ್ದ ಮನಿಷಾ ಮೌನ್‌ 54 ಕೆ.ಜಿ. ವಿಭಾಗದಲ್ಲಿ ಬಾರಿ ನಿರಾಸೆ ಅನುಭವಿಸಿದರು. ಅಖಿಲ ಭಾರತ ಪೊಲೀಸ್‌ನಮೀನಾಕುಮಾರಿ ದೇವಿ ಪ್ರಬಲ ಪಂಚ್‌ಗಳ ಮೂಲಕ ಮನಿಷಾ ಎದುರು ಗೆಲುವು ಪಡೆದು ಅಚ್ಚರಿಯ ಫಲಿತಾಂಶಕ್ಕೆ ಕಾರಣರಾದರು.

ಹರಿಯಾಣದ ಶಶಿ ಚೋಪ್ರಾ (57 ಕೆ.ಜಿ. ವಿಭಾಗ), ನುಪೂರ (75 ಕೆ.ಜಿ. ವಿಭಾಗ) ನಿರಾಸೆ ಅನುಭವಿಸಿದರು. ಪಿಂಕಿ ರಾಣಿ ಜಾಂಗ್ರಾ (51 ಕೆ.ಜಿ.), ನೀರಜಾ (60 ಕೆ.ಜಿ.) ಮತ್ತು ಪೂಜಾ ರಾಣಿ (81 ಕೆ.ಜಿ.) ಚಿನ್ನದ ಪದಕ ಜಯಿಸಿದರು. 69 ಕೆ.ಜಿ. ವಿಭಾಗದಲ್ಲಿ ಸಿಮ್ರನಜಿತ್‌ ಕೌರ್‌ ಅಸ್ಸಾಂನ ಲೊವ್ಲಿನಾ ಬರ್ಗೊಹೈನ್‌ ಎದುರು ಗೆದ್ದು ಚಿನ್ನದ ಒಡತಿಯಾದರು.