ಕ್ಲೇವ್ಲ್ಯಾಂಡ್, ಅಮೆರಿಕ: ಅಮೋಘ ಆಟವಾಡಿದ ಭಾರತದ ಸಾನಿಯಾ ಮಿರ್ಜಾ ಹಾಗೂ ಅಮೆರಿಕದ ಕ್ರಿಸ್ಟಿನಾ ಮೆಕಾಲೆ ಜೋಡಿಯು ಇಲ್ಲಿ ನಡೆಯುತ್ತಿರುವ ಲ್ಯಾಂಡ್ ಟೆನಿಸ್ ಟೂರ್ನಿಯಲ್ಲಿ ಸೆಮಿಫೈನಲ್ಗೆ ಲಗ್ಗೆಯಿಟ್ಟಿದ್ದಾರೆ.
ಗುರುವಾರ ರಾತ್ರಿ ನಡೆದ ಮಹಿಳೆಯರ ಡಬಲ್ಸ್ ಎಂಟರಘಟ್ಟದ ಹಣಾಹಣಿಯಲ್ಲಿ ಈ ಜೋಡಿಯು 6-3, 6-3ರಿಂದ ಜೆಕ್ ಗಣರಾಜ್ಯದ ಲೂಸಿ ರಾಡೆಕಾ ಹಾಗೂ ಚೀನಾದ ಶೂಯಿ ಜಾಂಗ್ ಎದುರು ಜಯ ಸಾಧಿಸಿದರು. ಒಂದು ತಾಸು ಒಂದು ನಿಮಿಷ ಈ ಪಂದ್ಯ ನಡೆಯಿತು.
ಪಂದ್ಯದ ಒಂಬತ್ತು ಬ್ರೇಕ್ಪಾಯಿಂಟ್ಸ್ ಪೈಕಿ ಐದನ್ನು ಸಾನಿಯಾ–ಕ್ರಿಸ್ಟಿನಾ ತಮ್ಮದಾಗಿಸಿಕೊಂಡರು.
ನಾಲ್ಕರ ಘಟ್ಟದಲ್ಲಿ ಭಾರತ–ಅಮೆರಿಕ ಜೋಡಿಗೆ ನಾರ್ವೆಯ ಉಲ್ರಿಕ್ ಐಕರಿ ಮತ್ತು ಅಮೆರಿಕದ ಕ್ಯಾಥರೀನ್ ಹ್ಯಾರಿಸನ್ ಸವಾಲು ಎದುರಾಗಿದೆ.
ಎರಡನೇ ಸುತ್ತಿನ ಸೆಣಸಾಟದಲ್ಲಿಯೂ ಸಾನಿಯಾ–ಕ್ರಿಸ್ಟಿನಾ ಅವರು ಒಂದೂ ಸೆಟ್ ಬಿಟ್ಟುಕೊಡದೆ ಜಾರ್ಜಿಯಾದ ಒಕ್ಸಾನಾ ಮತ್ತು ರುಮೇನಿಯಾದ ಆ್ಯಂಡ್ರಿಯಾ ಮಿಟು ಎದುರು ಗೆಲುವು ಸಾಧಿಸಿದ್ದರು.