ಬೆಥೆಲ್ ಬೆನ್ನತ್ತಿದರೂ ಬಗ್ಗದ ಭಾರತ; ರನ್ ಹೊಳೆ ಹರಿದ ಪಂದ್ಯದಲ್ಲಿ ಮಿಂಚಿದ ಸಂಜು

2024 ವಿಶ್ವಕಪ್‌ನಲ್ಲಿ ಚಾಂಪಿಯನ್‌ ಪಟ್ಟಕ್ಕೇರಿದ್ದ ಭಾರತ, ಮತ್ತೊಮ್ಮೆ ಫೈನಲ್‌ಗೇರಿದ ಸಾಧನೆ ಮಾಡಿದೆ. ಇದರೊಂದಿಗೆ, ಸತತ ಎರಡು ಸಲ ಚಾಂಪಿಯನ್‌ ಪಟ್ಟಕ್ಕೇರಿದ ತಂಡ ಎನಿಸಿಕೊಳ್ಳುವ ಅವಕಾಶವನ್ನೂ ಗಿಟ್ಟಿಸಿಕೊಂಡಿದೆ. ಭಾರತ ಹೊರತುಪಡಿಸಿ, ಪಾಕಿಸ್ತಾನ (2007, 2009) ಹಾಗೂ ಶ್ರೀಲಂಕಾ (2012, 2014) ಮಾತ್ರವೇ ಸತತ ಎರಡು ಸಲ ಫೈನಲ್‌ ತಲುಪಿದ ಸಾಧನೆ ಮಾಡಿವೆ.

ಈ ಪಂದ್ಯದಲ್ಲಿ ಒಟ್ಟು 34 ಸಿಕ್ಸ್‌ಗಳು ಮೂಡಿ ಬಂದವು. ಇದು ವಿಶ್ವಕಪ್‌ ಪಂದ್ಯವೊಂದರಲ್ಲಿ ದಾಖಲಾದ ಗರಿಷ್ಠ ಸಿಕ್ಸ್‌ಗಳಾಗಿವೆ. ಅದರಲ್ಲಿ 19 ಅನ್ನು ಭಾರತದ ಬ್ಯಾಟರ್‌ಗಳು ಸಿಡಿಸಿದರೆ, ಉಳಿದವನ್ನು ಇಂಗ್ಲೆಂಡ್‌ ಬ್ಯಾಟರ್‌ಗಳು ಬಾರಿಸಿದರು. ಇದೇ ಟೂರ್ನಿಯ ವೆಸ್ಟ್ ಇಂಡೀಸ್‌ (19) ಹಾಗೂ ಜಿಂಬಾಬ್ವೆ (12) ನಡುವಣ ಪಂದ್ಯದಲ್ಲಿ 31 ಸಿಕ್ಸ್‌ ಬಂದಿದ್ದವು.

ಬೆಥೆಲ್‌ ಸಿಡಿಸಿದ ಈ ಶತಕವು ವಿಶ್ವಕಪ್‌ ಟೂರ್ನಿಗಳಲ್ಲಿ ಇಂಗ್ಲೆಂಡ್‌ ಪರ ಬಂದ ನಾಲ್ಕನೇ ಶತಕವಾಗಿದೆ. 2014ರಲ್ಲಿ ಅಲೆಕ್ಸ್‌ ಹೇಲ್ಸ್‌ (ಅಜೇಯ 116 ರನ್), 2021ರಲ್ಲಿ ಜಾಸ್ ಬಟ್ಲರ್‌ (ಅಜೇಯ 101 ರನ್‌) ಮತ್ತು ಇದೇ ವರ್ಷ ಹ್ಯಾರಿ ಬ್ರೂಕ್‌ (100 ರನ್‌) ಮೂರಂಕಿ ಮೊತ್ತ ಗಳಿಸಿದ್ದರು.