ಸ್ವಚ್ಛತೆ ಕಾಪಾಡದಿದ್ದರೆ ದಂಡ

7
ಕೆ.ಆರ್‌.ಮಾರುಕಟ್ಟೆ ವ್ಯಾಪಾರಿಗಳಿಗೆ ಮೇಯರ್‌ ಎಚ್ಚರಿಕೆ

ಸ್ವಚ್ಛತೆ ಕಾಪಾಡದಿದ್ದರೆ ದಂಡ

Published:
Updated:
Deccan Herald

ಬೆಂಗಳೂರು: ವ್ಯಾಪಾರಿಗಳು ಸ್ವಚ್ಛತೆ ಕಾಪಾಡದಿದ್ದರೆ ದಂಡ ಕಟ್ಟಬೇಕಾಗುತ್ತದೆ.

– ಇದು ಬಿಬಿಎಂಪಿಯ ನೂತನ ಮೇಯರ್‌ ಗಂಗಾಂಬಿಕೆ ಅವರ ಖಡಕ್‌ ಎಚ್ಚರಿಕೆ. ನಗರದ ಕೆ.ಆರ್‌.ಮಾರುಕಟ್ಟೆಯಲ್ಲಿ ಪರಿಶೀಲನೆ ನಡೆಸಿದ ಅವರು ಅಲ್ಲಿನ ಕೊಳಕು ವಾತಾವರಣ ಕಂಡು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು.

ಸ್ವಚ್ಛತೆ ಕಾಪಾಡಲು ಕಾಳಜಿ ವಹಿಸದ ಆರೋಗ್ಯಾಧಿಕಾರಿಗಳು, ಸಹಾಯಕ ಎಂಜಿನಿಯರ್‌ಗಳನ್ನು ತರಾಟೆಗೆ ತೆಗೆದುಕೊಂಡ ಅವರು, ‘ನೀವು ಕಾರ್ಮಿಕರಿಗೆ ಸರಿಯಾಗಿ ಸೂಚನೆ ಕೊಟ್ಟು ಕೆಲಸದ ಮೇಲೆ ನಿಗಾ ವಹಿಸಿದ್ದರೆ ಹೀಗಾಗುತ್ತಿರಲಿಲ್ಲ. ಎಲ್ಲವನ್ನೂ ಮೇಯರ್‌ ಬಂದೇ ಮಾಡಬೇಕೇ? ಇದು ಈ ರೀತಿ ಮುಂದುವರಿಯಬಾರದು’ ಎಂದು ಎಚ್ಚರಿಸಿದರು. 

‘ವ್ಯಾಪಾರಿಗಳ ನಡವಳಿಕೆ ಮೇಲೂ ಬೇಸರ ವ್ಯಕ್ತಪಡಿಸಿದ ಮೇಯರ್‌, ಕಸ-ಕೊಳಚೆ ಮಧ್ಯೆ ಕುಳಿತು ವ್ಯಾಪಾರ ಮಾಡುತ್ತಿದ್ದೀರಿ. ದುರ್ಗಂಧದ ಮಧ್ಯೆ ಇರುತ್ತೀರಿ. ನಿಮ್ಮ ಆರೋಗ್ಯದ ಮೇಲೆ ಕಾಳಜಿ ಇಲ್ಲವೇ? ಕಸವನ್ನು ಪ್ರತ್ಯೇಕಿಸಿ ದೂರವಿಡಬಾರದೇ’ ಎಂದು ಪ್ರಶ್ನಿಸಿದರು. 

ಪ್ರತಿಕ್ರಿಯಿಸಿದ ವ್ಯಾಪಾರಿಗಳು, ‘ಇಲ್ಲಿ ಪೌರ ಕಾರ್ಮಿಕರು ಕಸಗುಡಿಸುತ್ತಿಲ್ಲ’ ಎಂದು ದೂರಿದರು.

‘ಕಸವನ್ನು ಅವರು ಎತ್ತಿ ಸಾಗಿಸಲು ಅನುಕೂಲವಾಗುವಂತೆ ಪ್ರತ್ಯೇಕವಾಗಿಡಬೇಕು. ಓಡಾಟಕ್ಕೆ ಅಡ್ಡಿಯಾಗುವಂತೆ ಸಾಮಗ್ರಿ ಹರಡಬಾರದು. ಸ್ವಚ್ಛತೆ ಕಾಪಾಡಲು ನಿಮ್ಮ ಸಹಕಾರವೂ ಮುಖ್ಯ' ಎಂದರು.

‘ಯಾರೂ ಪ್ಲಾಸ್ಟಿಕ್‌ ಚೀಲ ಮಾರಾಟ ಮಾಡಬಾರದು. ಬಟ್ಟೆಯ ಚೀಲಗಳನ್ನು ಬಳಸಬೇಕು. ಎಲ್ಲ ವ್ಯಾಪಾರಿಗಳು ಒಗ್ಗೂಡಿ ಇಂಥ ನಿರ್ಧಾರಕ್ಕೆ ಬರಬೇಕು. ಪರಿಸರ ಸ್ವಚ್ಛತೆ ಕಾಪಾಡದಿದ್ದರೆ ಭಾರೀ ಮೊತ್ತದ ದಂಡ ಪಾವತಿಸಬೇಕಾಗುತ್ತದೆ’ ಎಂದು ಎಚ್ಚರಿಸಿದರು.

ನಾಯಕರ ಭೇಟಿ: ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡ ಹಾಗೂ ಕಾಂಗ್ರೆಸ್‌–ಜೆಡಿಎಸ್‌ ಸರ್ಕಾರದ ಸಮನ್ವಯ ಸಮಿತಿ ಅಧ್ಯಕ್ಷ ಸಿದ್ದರಾಮಯ್ಯ ಅವರ ನಿವಾಸಕ್ಕೆ ತೆರಳಿ, ತಮ್ಮ ಆಯ್ಕೆಗೆ ಸಹಕರಿಸಿದ್ದಕ್ಕೆ ಇಬ್ಬರೂ ನಾಯಕರಿಗೆ ಮೇಯರ್‌ ಕೃತಜ್ಞತೆ ಅರ್ಪಿಸಿದರು.  

ಬರಹ ಇಷ್ಟವಾಯಿತೆ?

  • 7

    Happy
  • 2

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !