ಪಿಲ್ಲರ್‌ 155ಕ್ಕೆ ಐಐಎಸ್‌ಸಿ ನಿಗಾ

ಐಐಎಸ್‌ಸಿಯ ತಜ್ಞ ಪ್ರೊ.ಚಂದ್ರ ಕಿಶನ್‌ ಜೈನ್‌ ಅವರು ಭಾನುವಾರ ಸಂಜೆ ದುರಸ್ತಿ ಕಾಮಗಾರಿ ಪರಿಶೀಲಿಸಿದರು. ‘ಮಾರ್ಗದ ರಚನೆಗಳು ಸುರಕ್ಷಿತವಾಗಿಯೇ ಇವೆ. ಆದರೆ ಗುಣಮಟ್ಟದಲ್ಲಿ ಯಾವುದೇ ರಾಜಿಯಾಗುವಂತಿಲ್ಲ. ಅದಕ್ಕಾಗಿ ಒಂದು ತಿಂಗಳ ಕಾಲ ನಿಗಾ ವಹಿಸಲಾಗುತ್ತದೆ’ ಎಂದರು.

‘ದುರಸ್ತಿ ಕಾಮಗಾರಿ ವೇಳೆ ನಾವೂ ತೊಡಗಿಸಿಕೊಂಡಿದ್ದೆವು. ವಯಡಕ್ಟನ್ನು ಎತ್ತುವಾಗ ಎಲ್ಲಿಯಾದರೂ ಒತ್ತಡ ಬಿದ್ದು ಯಾವುದೇ ಭಾಗದಲ್ಲಿ ಬಿರುಕು ಉಂಟಾಗುವುದನ್ನು ತಪ್ಪಿಸಬೇಕಾಗಿತ್ತು. ಇದು ಹನಿಕಾಂಬ್‌ ಉಂಟಾದ ಕ್ರಾಸ್‌ಬೀಮ್‌ ಪ್ರದೇಶಕ್ಕೂ ಅನ್ವಯಿಸುತ್ತದೆ. ಸಮಸ್ಯಾತ್ಮಕ ಪ್ರದೇಶಕ್ಕೆ ಅಧಿಕ ಒತ್ತಡದಲ್ಲಿ ಕಾಂಕ್ರಿಟ್‌ ತುಂಬಲಾಗಿದೆ. ಹಾನಿಗೊಳಗಾದ ಪ್ರದೇಶವನ್ನು ಗಟ್ಟಿಗೊಳಿಸಲು ಈ ರೀತಿ ಮಾಡಲಾಗಿದೆ’ ಎಂದು ಅವರು ವಿವರಿಸಿದರು.

‘27 ಸೆನ್ಸರ್‌ಗಳನ್ನು ಹಾನಿಗೊಳಗಾದ ರಚನೆಯ ಸಮೀಪ ಅಳವಡಿಸಲಾಗಿದೆ. ಈಗ ಜಾಕ್‌ಗಳ ಮೂಲಕ ವಯಡಕ್ಟ್‌ಗೆ ಕಾಂಕ್ರಿಟ್‌ ತುಂಬಿದ ಬಳಿಕ ಅದನ್ನು ಇಳಿಸಿ ನಿಗದಿತ ಸ್ಥಾನದಲ್ಲಿ ಕೂರಿಸಲಾಗುತ್ತದೆ’ ಎಂದು ತಿಳಿಸಿದರು.