ಮೊಬೈಲ್ ಕೊಡದಿದ್ದಕ್ಕೆ ಕೊಂದಿದ್ದವರ ಸೆರೆ

6

ಮೊಬೈಲ್ ಕೊಡದಿದ್ದಕ್ಕೆ ಕೊಂದಿದ್ದವರ ಸೆರೆ

Published:
Updated:
Deccan Herald

ಬೆಂಗಳೂರು: ಮೊಬೈಲ್ ಕೊಡಲು ನಿರಾಕರಿಸಿದ್ದಕ್ಕೆ ಚಂದ್ರಶೇಖರ್ (20) ಎಂಬಾತನನ್ನು ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದ ಸುಲಿಗೆಕೋರರಿಬ್ಬರು ಪೊಲೀಸರ ಬಲೆಗೆ ಬಿದ್ದಿದ್ದಾರೆ.

ಮತ್ತೀಕೆರೆಯ ಚೇತನ್ ಅಲಿಯಾಸ್ ಬಬ್ಲಿ (22) ಹಾಗೂ ಮಹಮದ್ ಮನ್ಸೂರ್ ಷರೀಫ್ (22) ಬಂಧಿತರು. ಆರೋಪಿಗಳಿಂದ ಎರಡು ಮೊಬೈಲ್‌ಗಳು, ಕೃತ್ಯಕ್ಕೆ ಬಳಸಿದ್ದ ಬಟನ್ ಚಾಕು ಹಾಗೂ ಟಿವಿಎಸ್ ವಿಕ್ಟರ್ ಬೈಕ್ ಜಪ್ತಿ ಮಾಡಲಾಗಿದೆ. ಮಾದಕ ವ್ಯಸನಿಗಳಾದ ಇವರು, ಆ.19ರ ರಾತ್ರಿ ಗಾಂಜಾ ಸೇದಲು ಭದ್ರಪ್ಪ ಲೇಔಟ್‌ಗೆ ಬಂದಿದ್ದರು. ಆಗ ಬೈಕ್ ಅಡ್ಡಗಟ್ಟಿ ಚಂದ್ರಶೇಖರ್ ಅವರಿಗೆ ಇರಿದಿದ್ದರು ಎಂದು ಪೊಲೀಸರು ಹೇಳಿದ್ದಾರೆ.

ಗೌರಿಬಿದನೂರಿನ ಚಂದ್ರಶೇಖರ್, ಕೆಲಸ ಅರಸಿ ಆರು ತಿಂಗಳ ಹಿಂದೆ ನಗರಕ್ಕೆ ಬಂದಿದ್ದ. ಹೆಬ್ಬಾಳದ ಬಾಪೂಜಿ ಲೇಔಟ್‌ನಲ್ಲಿ ನೆಲೆಸಿದ್ದ ಆತ, ಆ.19ರ ರಾತ್ರಿ 10 ಗಂಟೆ ಸುಮಾರಿಗೆ ಸ್ನೇಹಿತ ನಾರಾಯಣಸ್ವಾಮಿ ಜತೆ ಹೋಟೆಲ್‌ಗೆ ತೆರಳಿದ್ದ. ಊಟ ಮಾಡಿ ಬೈಕ್‌ನಲ್ಲಿ ಮನೆಗೆ ವಾಪಸಾಗುತ್ತಿದ್ದಾಗ ಡ್ರಾಪ್ ಕೇಳುವ ನೆಪದಲ್ಲಿ ಚೇತನ್ ಕೈ ಅಡ್ಡ ಹಾಕಿದ್ದ.

‘ವಾಹನ ನಿಲ್ಲಿಸಬೇಡ’ ಎಂದು ಗೆಳೆಯ ನಾರಾಯಣಸ್ವಾಮಿ ಹೇಳಿದರೂ ಮಾತು ಕೇಳದ ಚಂದ್ರಶೇಖರ್, ‘ಪಾಪ, ಒಬ್ಬನೇ ಇದ್ದಾನೆ. ಕರೆದುಕೊಂಡು ಹೋಗೋಣ’ ಎಂದು ಕನಿಕರ ತೋರಿ ಬೈಕ್ ನಿಲ್ಲಿಸಿದ್ದ. ಆಗ ಜೇಬಿನಿಂದ ಚಾಕು ತೆಗೆದು ಅವರನ್ನು ಬೆದರಿಸಿದ್ದ ಚೇತನ್, ಪೊದೆಯಲ್ಲಿ ಅಡಗಿ ಕುಳಿತಿದ್ದ ಸಹಚರ ಮನ್ಸೂರ್‌ನನ್ನೂ ಕರೆದಿದ್ದ. ಬಳಿಕ ಹಣ–ಮೊಬೈಲ್ ಕೊಡದಿದ್ದರೆ ಚುಚ್ಚಿಬಿಡುವುದಾಗಿ ಇಬ್ಬರೂ ಬೆದರಿಸಿದ್ದರು.

ನಾರಾಯಣಸ್ವಾಮಿ ಕೂಡಲೇ ₹ 3 ಸಾವಿರ ನಗದು ಹಾಗೂ ಮೊಬೈಲನ್ನು ಕೊಟ್ಟಿದ್ದ. ಆದರೆ, ಚಂದ್ರಶೇಖರ್ ತನ್ನ ಬಳಿ ಮೊಬೈಲ್ ಇಲ್ಲ ಎಂದಿದ್ದ. ಆರೋಪಿಗಳು ಆತನ ಜೇಬು ಪರಿಶೀಲಿಸಿದಾಗ ಮೊಬೈಲ್ ಪತ್ತೆಯಾಗಿತ್ತು. ಅದನ್ನು ಕೊಡಲು ಒಪ್ಪದಿದ್ದಾಗ ತೊಡೆಗೆ ಚಾಕು ಇರಿದು ಮೊಬೈಲ್ ಕಿತ್ತುಕೊಂಡು ಹೋಗಿದ್ದರು. ಸ್ನೇಹಿತ ಹೊಯ್ಸಳ ಪೊಲೀಸರ ನೆರವಿನಿಂದ ಗಾಯಾಳುವನ್ನು ಆಸ್ಪತ್ರೆಗೆ ದಾಖಲಿಸಿದ್ದ. ಚಿಕಿತ್ಸೆಗೆ ಸ್ಪಂದಿಸದೆ ಆ.20ರ ರಾತ್ರಿ ಆತ ಕೊನೆಯು
ಸಿರೆಳೆದಿದ್ದ.

ಪೊಲೀಸರ ತಲೆದಂಡ: ಈ ಪ್ರಕರಣದಲ್ಲಿ ಗಾಯಾಳುವಿನ ಹೇಳಿಕೆ ದಾಖಲಿಸಿಕೊಳ್ಳದೆ ಕರ್ತವ್ಯಲೋಪ ಎಸಗಿದ ಆರೋಪದಡಿ ಕೊಡಿಗೇಹಳ್ಳಿ ಇನ್ಸ್‌ಪೆಕ್ಟರ್‌ ರಾಜಣ್ಣ, ಹೆಡ್‌ಕಾನ್‌ಸ್ಟೆಬಲ್ ರಾಜಣ್ಣ ಹಾಗೂ ಕಾನ್‌ಸ್ಟೆಬಲ್ ಜಯರಾಮ್ ಅವರನ್ನು ಅಮಾನತು ಮಾಡಲಾಗಿತ್ತು.

Tags: 

ಬರಹ ಇಷ್ಟವಾಯಿತೆ?

  • 13

    Happy
  • 0

    Amused
  • 2

    Sad
  • 2

    Frustrated
  • 2

    Angry

Comments:

0 comments

Write the first review for this !