ಎಂಜಿನಿಯರಿಂಗ್ ಕಚೇರಿ ಎದುರು ಚಾಲಕನ ಹತ್ಯೆ

ಆಂಧ್ರಪ್ರದೇಶದ ಕುಪ್ಪಂನವರಾದ ಅವರು, 25 ವರ್ಷಗಳ ಹಿಂದೆ ನಗರಕ್ಕೆ ಬಂದು ಪತ್ನಿ–ಮಕ್ಕಳ ಜತೆ ಹೊಸ
ಕೆರೆಹಳ್ಳಿ ಸಮೀಪದ ವೀರಭದ್ರನಗರದಲ್ಲಿ ನೆಲೆಸಿದ್ದರು. ರಾತ್ರಿ 12 ಗಂಟೆ ಸುಮಾರಿಗೆ ‘ಏರ್‌ಟೆಲ್ ಕಂಪನಿ’ಯ ಆಪ್ಟಿಕಲ್ ಕೇಬಲ್ ಅಳವಡಿಕೆ ಕೆಲಸಕ್ಕೆಂದು ಬಂದಿದ್ದಾಗ ಅವರ ಕೊಲೆ ನಡೆದಿದೆ.

ಸಹಕಾರ್ಮಿಕರ ಜತೆ ರಾತ್ರಿ ಕೇಬಲ್ ಅಳವಡಿಕೆ ಕೆಲಸದಲ್ಲಿ ನಿರತರಾಗಿದ್ದ ಶಿವನಾಯಕ್, ಸ್ವಲ್ಪ ಸಮಯದ ಬಳಿಕ ಏಕಾಏಕಿ ನಾಪತ್ತೆಯಾಗಿದ್ದರು. ಕಾರ್ಮಿಕರು ಅವರನ್ನು ಹುಡುಕಿಕೊಂಡು ಹೊರಟಾಗ, ಎಂಜಿನಿಯರಿಂಗ್ ಕಚೇರಿ ಎದುರು ರಕ್ತದ ಮಡುವಿನಲ್ಲಿ ಬಿದ್ದಿದ್ದರು. ತಕ್ಷಣ ಆಸ್ಪತ್ರೆಗೆ ಕರೆದೊಯ್ದರಾದರೂ, ಚಿಕಿತ್ಸೆಗೆ ಸ್ಪಂದಿಸದೆ ಕೊನೆಯುಸಿರೆಳೆದರು ಎಂದು ಪೊಲೀಸರು ಹೇಳಿದ್ದಾರೆ.

ಸುಲಿಗೆ ಸಂಶಯವಿತ್ತು: ‘ಯಾರೋ ಸುಲಿಗೆಕೋರರು ಹಣಕ್ಕಾಗಿ ಚಾಕುವಿನಿಂದ ಇರಿದಿರಬಹುದು ಎಂಬ ಸಂಶಯ ಆರಂಭದಲ್ಲಿ ಮೂಡಿತ್ತು. ಆದರೆ, ಮೊಬೈಲ್ ಹಾಗೂ ಹಣ ಮೃತರ ಜೇಬಿನಲ್ಲೇ ‍ಪತ್ತೆಯಾಗಿದೆ. ಸಿ.ಸಿ ಟಿ.ವಿ ಕ್ಯಾಮೆರಾಗಳ ದೃಶ್ಯಾವಳಿ ಪರಿಶೀಲಿಸಲಾಗುತ್ತಿದೆ. ಗುತ್ತಿಗೆದಾರ ವೇಣುಗೋಪಾಲ್ ಹಾಗೂ ಎಲ್ಲ ಕಾರ್ಮಿಕರನ್ನೂ ವಿಚಾರಣೆ ನಡೆಸುತ್ತಿದ್ದೇವೆ’ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

‘ವೇಣುಗೋಪಾಲ್ ಹಾಗೂ ಶಿವನಾಯಕ್ ನಡುವೆ ಕೆಲಸದ ಸ್ಥಳದಲ್ಲಿ ಮಾತಿನ ಚಕಮಕಿ ನಡೆದಿತ್ತು. ಅದೇ ಹಿನ್ನೆಲೆಯಲ್ಲಿ ಹತ್ಯೆ ನಡೆದಿದೆ. ಹೀಗಾಗಿ, ವೇಣುಗೋಪಾಲ್ ಅವರನ್ನು ತಕ್ಷಣ ಬಂಧಿಸಬೇಕು’ ಎಂದು ಮೃತರ ಸಂಬಂಧಿಕರು ಠಾಣೆ ಬಳಿ ಜಮಾಯಿಸಿ ಆಗ್ರಹಿಸಿದರು.