ಬೆಂಗಳೂರು: ಬರಗೂರು ರಾಮಚಂದ್ರಪ್ಪ ಅವರು ಸಿದ್ಧಪಡಿಸಿರುವ ಸಾಂಸ್ಕೃತಿಕ ನೀತಿಯ ವರದಿ ಜಾರಿಗೆ ಒತ್ತಾಯಿಸಿ ಕರ್ನಾಟಕ ನಾಟಕ ಅಕಾಡೆಮಿಯು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿ ಟಿ.ಎಂ.ವಿಜಯಭಾಸ್ಕರ್ ಅವರಿಗೆ ಪತ್ರ ಬರೆದಿದೆ.
ರಾಮಚಂದ್ರಪ್ಪ ವರದಿ ಬಗ್ಗೆ ಸಚಿವ ಸಂಪುಟದಲ್ಲಿ ಚರ್ಚೆಯಾಗಿದ್ದು, ಅಂದು ಸಚಿವರಾಗಿದ್ದ ಎಚ್.ಕೆ.ಪಾಟೀಲ ಅಧ್ಯಕ್ಷತೆಯ ಸಂಪುಟ ಉಪಸಮಿತಿ ಕೂಡ ಕೂಲಂಕುಷವಾಗಿ ಪರಿಶೀಲಿಸಿ ವರದಿ ಸಲ್ಲಿಸಿದೆ. ಇದನ್ನು ಆಧರಿಸಿ ಸರ್ಕಾರ 2017ರ ಅಕ್ಟೋಬರ್ 10ರಂದು ವರದಿ ಜಾರಿಗೆ ಆದೇಶ ನೀಡಿದೆ.
ಆರ್ಥಿಕ ಇಲಾಖೆ ಅನುಮೋದನೆಯೂ ದೊರೆತಿದೆ.ಬರಗೂರು ರಾಮಚಂದ್ರಪ್ಪ ಅವರು ಹಲವು ಬಾರಿ ನೆನಪಿನೋಲೆ ಬರೆದಿದ್ದಾರೆ. ಆದರೂ, ವರದಿ ಜಾರಿಗೆ ಅಧಿಕಾರಿಗಳು ಇಚ್ಛಾಶಕ್ತಿ ತೋರಿಸುತ್ತಿಲ್ಲ ಎಂದು ಅಕಾಡೆಮಿ ಅಧ್ಯಕ್ಷ ಜಿ.ಲೋಕೇಶ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
