‘ನಮ್ಗ ಇರಾಕ ಮನಿ ಕೊಡ್ರಿ’

4
ವಿಜಯನಗರ ರಾಜಕಾಲುವೆ ಸಮೀಪದ ನಿವಾಸಿಗಳ ಮನವಿ

‘ನಮ್ಗ ಇರಾಕ ಮನಿ ಕೊಡ್ರಿ’

Published:
Updated:
Deccan Herald

ಬೆಂಗಳೂರು: ‘ನಾವು ಕೂಲಿ ಮಾಡೋ ಜನ. ಕೆಲಸ ಹುಡ್ಕೊಂಡು ಇಲ್ಲಿಗಿ ಬಂದೀವಿ. ದುಡಿದಿದ್ದ ದುಡ್ಡು ಹೊಟ್ಟಿ, ಬಟ್ಟಿಗೆ ಸಾಲಲ್ಲ. ಸ್ವಂತದ ಸೂರಿಲ್ಲ, ನಮಗ್ ಇರಾಕ ಮನಿ ಕೊಡ್ರಿ’  

–ಹೀಗೆ ಹೇಳಿದ್ದು, ವಿಜಯನಗರದ ಪೈಪ್‌ಲೈನ್ ರಸ್ತೆಯ ರಾಜಕಾಲುವೆ ಪಕ್ಕದಲ್ಲಿಯೇ ಶೆಡ್‌ ನಿರ್ಮಿಸಿಕೊಂಡಿರುವ ಕಲಬುರ್ಗಿ, ಯಾದಗಿರಿಯ ಜನ.

‘ಭಾಳ್‌ ವರ್ಷದಿಂದ ಇಲ್ಲೇ ಶೆಡ್‌ ಹಾಕ್ಕೊಂಡದೀವಿ. ಬ್ಯಾರೆ ಗತಿ ಇಲ್ದ ಇಲ್ಲಿ ಇರ್‌ಬೇಕಾಗೈತಿ. ಸಣ್ಣ ಮಳೆ ಬಂದ್ರೂ ಮನಿಗೊಳು ಸೋರ್ತಾವು. ಇನ್ನ, ಜೋರ್‌ ಮಳೆ ಬಂದ್ರಂತೂ ನೀರು ಮನ್ಯಾಗ ನುಗ್ಗತಾದ’ ಎಂದು ರೂತಮ್ಮ ಅಳಲು ತೋಡಿಕೊಂಡರು. 

ಪ್ರತಿದಿನ ಆತಂಕದಲ್ಲೇ ದಿನ ದೂಡುತ್ತಿರುವ ನಿವಾಸಿಗಳು ಮಳೆಗಾಲದಲ್ಲಾಗುವ ಅನಾಹುತಗಳಿಗೆ ದೇವರೇ ಗತಿ ಎಂಬಂತೆ ತಲೆ ಮೇಲೆ ಕೈಹೊತ್ತು ಕುಳಿತಿದ್ದಾರೆ. ಹೊಸಹಳ್ಳಿ, ವಿಜಯನಗರದ ಮೂಲಕ ಹಾಯ್ದು ಹೋಗಿರುವ ಈ ರಾಜಕಾಲುವೆ ಕೆಂಗೇರಿ ಮೋರಿ
ಯನ್ನು ಸೇರುತ್ತದೆ. ಕಾಲುವೆ ಆಸುಪಾಸುಮೂಗು ಮುಚ್ಚಿಕೊಂಡೇ ಓಡಾಡುವ ಸ್ಥಿತಿ ಇದೆ.  ಕಾಲುವೆಗೆ ಕೆಲವು ವರ್ಷಗಳ ಹಿಂದೆ ಎತ್ತರದ ತಡೆಗೋಡೆ ನಿರ್ಮಿಸಲಾಗಿದೆ. ಆದರೆ, ಜೋರಾಗಿ ಮಳೆಯಾದಾಗಲೆಲ್ಲ ಕಾಲುವೆಯಿಂದ ಚರಂಡಿ ನೀರೆಲ್ಲ ಸುತ್ತಮುತ್ತಲಿನ ಮನೆ, ಬಡಾವಣೆಗಳಿಗೆ ನುಗ್ಗುತ್ತದೆ. 

ಮಳೆ ಬಂದಾಗಲೆಲ್ಲ ಸಂಕಷ್ಟ: ಸಾಧಾರಣ ಮಳೆ ಬಂದಾಗಲೂ ರಾಜಕಾಲುವೆ ಗಬ್ಬು ವಾಸನೆ ಹೊಡೆಯುತ್ತದೆ. ರಾಜಕಾಲುವೆಯಲ್ಲಿ ನೋಡಲಾಗದಷ್ಟು ಹೂಳು ತುಂಬಿಕೊಂಡಿದೆ. ಸುತ್ತಮುತ್ತಲ ಮನೆಗಳಿಗೆ ಸೊಳ್ಳೆಕಾಟ, ದುರ್ನಾತ ತಪ್ಪಿದ್ದಲ್ಲ. ಮನೆ ಹತ್ತಿರ ಸರಿಯಾದ ಪಾದಚಾರಿ ಮಾರ್ಗವೂ ಇಲ್ಲ. ಸಾಂಕ್ರಾಮಿಕ ರೋಗಗಳು ಹರಡುವ ಭೀತಿಯೂ ಹೆಚ್ಚಾಗಿದೆ.

ಪೂರ್ಣಗೊಳ್ಳದ ಕಾಮಗಾರಿ: ಸೇತುವೆ ಬಳಿ ಕಾಲುವೆಗೆ ಹೊಂದಿಕೊಂಡಂತೆ ಹಿಂದೂಮುಂದೂ ಕೊನೆಯಿಲ್ಲದಂತೆ ತಡೆಗೋಡೆ ನಿರ್ಮಿಸಲಾಗಿದೆ. ಕೆಲವು ತಿಂಗಳ ಹಿಂದೆ ಬಿಬಿಎಂಪಿ ಇಲ್ಲಿ ಹೂಳೆತ್ತುವ ಕೆಲಸ ಆರಂಭಿಸಿದರೂ ಅರ್ಧಕ್ಕೆ ನಿಲ್ಲಿಸಿದೆ. ಸುತ್ತಲಿನ ಪ್ರದೇಶದಲ್ಲಿ ಪೈಪ್‌ಗಳನ್ನು ತಂದು ಹಾಕಲಾಗಿದೆ. ಆದರೆ, ಕಾಮಗಾರಿ ಮಾತ್ರ ಪುನಃ ಆರಂಭಗೊಂಡಿಲ್ಲ.

‘ರಾಜಕಾಲುವೆ ನಿರ್ವಹಣೆ ಇಲ್ಲದೆ ತ್ಯಾಜ್ಯ ಸುರಿಯುವ ತಾಣವಾಗಿದೆ. ಹೂಳಿನ ಜತೆ ತ್ಯಾಜ್ಯದ ರಾಶಿ ಸೇರಿಕೊಂಡು, ನೀರಿನ ಹರಿವಿಗೂ ತೊಡಕಾಗಿದೆ. ಅಧಿಕಾರಿಗಳು ಇತ್ತ ಗಮನಹರಿಸಿ, ಮುಂದಾಗುವ ಅನಾಹುತ ತಪ್ಪಿಸಬೇಕು’ ಎಂದು ಸ್ಥಳೀಯರು ಒತ್ತಾಯಿಸುತ್ತಾರೆ.

ಈ ಬಗ್ಗೆ ವಾರ್ಡ್‌ ನಂ.124ರ ಕಾರ್ಪೊರೇಟರ್‌ ಮಹಾಲಕ್ಷ್ಮಿ ರವೀಂದ್ರ ಅವರನ್ನು ಕೇಳಿದರೆ, ‘ಅಲ್ಲಿ ನಡೆಯುತ್ತಿರುವ ಕಾಮಗಾರಿಗಳ ಬಗ್ಗೆ ನನಗೆ ಕಿಂಚಿತ್ತೂ ಗೊತ್ತಿಲ್ಲ. ಹೆರಿಗೆಯ ಕಾರಣದಿಂದಾಗಿ ಬಹುದಿನಗಳಿಂದ ಆ ಕಡೆ ನಾನು ಗಮನಹರಿಸಿಲ್ಲ. ಅಲ್ಲಿ ನಡೆಯುತ್ತಿರುವ ಕಾಮಗಾರಿಗಳ ಬಗ್ಗೆ ನನ್ನ ತಂದೆ ಹಾಗೂ ಪತಿಗೆ ಗೊತ್ತು, ಅವರನ್ನು ಕೇಳಿ ತಿಳಿಸುವೆ’ ಎಂದು ಪ್ರತಿಕ್ರಿಯಿಸಿದರು. 

‘ಬೀದಿ ದೀಪವೂ ಸ್ಥಗಿತ’

ಮೇಲ್ಸೇತುವೆಯಲ್ಲಿರುವ ಬೀದಿದೀಪ ನಾಲ್ಕೈದು ತಿಂಗಳಿನಿಂದ ಸ್ಥಗಿತಗೊಂಡಿದೆ. ಇಲ್ಲಿನ ಮಕ್ಕಳಿಗೆ ರಾತ್ರಿ ಓದಿಕೊಳ್ಳಲು ಅದೇ ನೆರವಾಗಿತ್ತು. ಆದರೆ, ಇದೀಗ ಮೇಣದಬತ್ತಿ, ಚಿಮಣಿ ಬುಡ್ಡಿ ಬೆಳಕೆ ಗತಿ ಎನ್ನುವಂತಾಗಿದೆ.

ಇರಾಕ ಸ್ವಂತ ಸೂರಿಲ್ಲ. ಮಳೆ ಬಂದ್ರ ಎಲ್ಲಿಗೆ ಹೋಗೂಣು? ಯಾರ್‌ ನಮ್ಮನ್ನ ಕರೀತಾರ? ಮನಿ ಸೋರ್ತಿದ್ರೂ ಇಲ್ಲೇ ಇರ್ತೀವಿ. ನಮ್ಮ ಕಷ್ಟ ಕೇಳೋರು ಯಾರ್‌ ಅದಾರ್ರಿ?
-ರೂತಮ್ಮ, ನಿವಾಸಿ

* ಕುಡ್ಯಾಕ್‌ ನೀರು, ಬೀದಿದೀಪದ ವ್ಯವಸ್ಥೆ ಮಾಡಿಕೊಟ್ರ ಭಾಳ ಛೊಲೊ ಆಗತೈತಿ. ಪರೀಕ್ಷೆ ದಿನಗಳು ಶುರು ಆಗ್ತಾವ. ಓದಾಕ್‌ ಬೆಳಕ ಇಲ್ದಂಗಾಗೈತಿ

-ತಾಯಮ್ಮ, ಪಿಯುಸಿ ವಿದ್ಯಾರ್ಥಿನಿ

* ಸರ್ಕಾರದಿಂದ ನಮಗ್‌ ಮನಿ ವ್ಯವಸ್ಥೆ ಮಾಡಿ ಕೊಟ್ರ ಭಾಳ ಪುಣ್ಯಾ ಬರ್ತೈತಿ. ಕೂಲಿ ಮಾಡ್‌ಕೊಂಡು ಬದುಕೊ ನಮಗ್‌ ಸ್ವಂತ ಮನಿ ತಗೊಳ್ಳುವ ಶಕ್ತಿ ಇಲ್ಲ.
-ಭೀಮಾಬಾಯಿ

Tags: 

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !