7

ಶಾಸನ ಸಾಹಿತ್ಯ ಪರಿಷತ್ತು ಲೋಕಾರ್ಪಣೆ ಜುಲೈ 12ರಂದು

Published:
Updated:

ಧಾರವಾಡ: ‘ಶಾಸನ, ಚರಿತ್ರೆ, ರಾಜಕೀಯ ಇತಿಹಾಸ ಅಧ್ಯಯನ ಮಾಡುವ ಸಲುವಾಗಿ ‘ಕರ್ನಾಟಕ ಶಾಸನ ಸಾಹಿತ್ಯ ಪರಿಷತ್ತನ್ನು’ ನಗರದಲ್ಲಿ ಆರಂಭಿಸಲಾಗುತ್ತಿದ್ದು, ಜುಲೈ 12ರಂದು ಲೋಕಾರ್ಪಣೆಗೊಳ್ಳಲಿದೆ’ ಎಂದು ಪರಿಷತ್ತಿನ ಅಧ್ಯಕ್ಷೆ ಹನುಮಾಕ್ಷಿ ಗೋಗಿ ತಿಳಿಸಿದರು.

‘ರಾಷ್ಟ್ರಮಟ್ಟದಲ್ಲಿ ಆಲ್ ಇಂಡಿಯಾ ಎಪಿಗ್ರಾಫಿಕಲ್‌ ಸೊಸೈಟಿ ಇದೆ. ಆದರೆ ನಮ್ಮ ರಾಜ್ಯದಲ್ಲಿ ಇಂಥದ್ದೊಂದು ಸಂಸ್ಥೆ ಇಲ್ಲ. ಹೀಗಾಗಿ ನಮ್ಮ ಪ್ರಚೀನ ಸಂಸ್ಕೃತಿಯ ಕುರಿತು ಹೆಚ್ಚಿನ ಅಧ್ಯಯನಕ್ಕಾಗಿ ಈ ಪರಿಷತ್ತನ್ನು ಹುಟ್ಟುಹಾಕಲಾಗಿದೆ. ಇದೇ ವಿಷಯವಾಗಿ ಮುಂದಿನ ದಿನಗಳಲ್ಲಿ ದತ್ತಿ ಕಾರ್ಯಕ್ರಮ ಆಯೋಜಿಸಿ, ಈ ಕ್ಷೇತ್ರದ ಸಾಧಕರಿಗೆ ‘ಶಾಸನ ಶ್ರೀ’ ಎಂಬ ಬಿರುದು ನೀಡಿ ಸನ್ಮಾನಿಸುವ ಉದ್ದೇಶವೂ ಇದೆ’ ಎಂದು ಮಂಗಳವಾರ ಸುದ್ದಿಗೋಷ್ಠೀಯಲ್ಲಿ ಹೇಳಿದರು.

‘ಈ ಪರಿಷತ್ತಿನ ಮೂಲಕ, ಕರ್ನಾಟಕದ ಶಾಸನ ಅಧ್ಯಯನಕಾರರು, ಸಾಹಿತಿಗಳು, ಇತಿಹಾಸಕಾರರನ್ನು ಶಾಸನ ಸಾಹಿತ್ಯ ಪರಿಷತ್ತಿನ ಅಡಿಯಲ್ಲಿ ಒಂದುಗೂಡಿಸುವುದು, ನಾಡಿನ ಶಾಸನಗಳಲ್ಲಿ ಅಡಗಿರುವ ಸಾಂಸ್ಕೃತಿಕ ವಿಚಾರಗಳ ಕುರಿತು ರಾಜ್ಯ, ರಾಷ್ಟ್ರ ಹಾಗೂ ವಿಶ್ವವಿದ್ಯಾಲಯ ಮಟ್ಟದ ವಿಚಾರ ಸಂಕಿರಣ, ಕಾರ್ಯಾಗಾರ, ವಿಶೇಷ ಉಪನ್ಯಾಸ ಆಯೋಜಿಸುವ ಚಿಂತನೆ ಇದೆ. ಶಾಸನಗಳನ್ನು ಓದುವುದರ ಮೂಲಕ ಮರುಚಿಂತನೆಗೆ ಒಳಪಡಿಸಿ ಚರಿತ್ರೆಯನ್ನು ಕಟ್ಟಿಕೊಡುವುದು ಮತ್ತು ಪ್ರಾಥಮಿಕ ಉನ್ನತವ್ಯಾಸಂಗದವರಿಗೆ ಶಾಸನ ಅಧ್ಯಯನದ ಮಹತ್ವ ಸಾರುವುದು ನಮ್ಮ ಉದ್ದೇಶ’ ಎಂದರು.

ಸರ್ಕಾರಗಳು, ವಿಶ್ವವಿದ್ಯಾಲಯ ಹಾಗೂ ವಿವಿಧ ಸಂಘಸಂಸ್ಥೆಗಳಿಂದ ಆರ್ಥಿಕ ನೆರವು ಪಡೆದು ಪರಿಷತ್ತನ್ನು ಶೈಕ್ಷಣಿಕ ವಲಯದಲ್ಲಿ ಶ್ರೇಷ್ಠಗೊಳಿಸುವ ಉದ್ದೇಶವನ್ನು ಪರಿಷತ್ತು ಹೊಂದಿದೆ. ಈ ಎಲ್ಲದಕ್ಕೂ ಮುನ್ನುಡಿ ಎಂಬಂತೆ ಜುಲೈ 12ರಂದು ಸಂಜೆ 6ಕ್ಕೆ ಡಾ. ಗುರುಲಿಂಗ ಕಾಪಸೆ ಪರಿಷತ್ತನ್ನು ಲೋಕಾರ್ಪಣೆಗೊಳಿಸಲಿದ್ದಾರೆ. ಬೆಳಗಾವಿ ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ ಕುಲಸಚಿವ ಡಾ. ರಂಗರಾಜ ವನದುರ್ಗ ಅತಿಥಿಯಾಗಿ ಪಾಲ್ಗೊಳ್ಳಲಿದ್ದಾರೆ. ಡಾ. ಬಿ.ವಿ.ಶಿರೂರ ಆಶಯ ನುಡಿಗಳನ್ನಾಡಲಿದ್ದಾರೆ. ಪ್ರೊ. ಲಕ್ಷ್ಮಣ ತೆಲಗಾವಿ ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಲಿದ್ದಾರೆ’ ಎಂದು ಗೋಗಿ ತಿಳಿಸಿದರು.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !