99.9 ಡಿಗ್ರಿ ಉಷ್ಣಾಂಶ: ಏಪ್ರಿಲ್‌ ಫೂಲ್‌ ಮಾಡುತ್ತಿದೆಯೇ ಹವಾಮಾನ ಇಲಾಖೆ!

ಹೀಗೆಂದು ಹವಾಮಾನ ಇಲಾಖೆಯ ಅಧಿಕೃತ ವೆಬ್‌ಸೈಟ್ ಹೇಳುತ್ತಿದೆ. ಹಿಂದಿನ ದಿನ 35 ಡಿಗ್ರಿ ಉಷ್ಣಾಂಶ ಇರಲಿದ್ದು, ಮರುದಿನ ಇಷ್ಟೊಂದು ಉ‌ಷ್ಣಾಂಶ ಹೆಚ್ಚಾಗಲಿದೆ.

ಮುಂದಿನ ದಿನ 34 ಡಿಗ್ರಿಗೆ ಇಳಿಯಲಿದೆ ಎಂದು ದಾಖಲಿಸಿರುವುದು ಅಚ್ಚರಿ ಮೂಡಿಸಿದೆ. ಹವಾಮಾನ ಇಲಾಖೆಯ ಮಾಹಿತಿಯಂತೆ ಇಷ್ಟೊಂದು ಪ್ರಮಾಣದ ಉಷ್ಣಾಂಶವೇನಾದರೂ ಹೆಚ್ಚಿದರೆ ಜನರೆಲ್ಲ ಗುಳೆ ಹೋಗುವುದು ಅನಿವಾರ್ಯವಾಗಲಿದೆ! ತಾಪಮಾನದ ಈ ಪ್ರಮಾಣ ಸಾರ್ವಕಾಲಿಕ ದಾಖಲೆಯೂ ಆಗಲಿದೆ!

ಏಪ್ರಿಲ್ 1ರಂದು ಮೂರ್ಖರ ದಿನಾವಾಗಿರುವ ಕಾರಣ ತಮಾಷೆಗಾಗಿ ಈ ರೀತಿ ದಾಖಲಿಸಲಾಗಿದೆಯೋ, ಅಥವಾ ಕಣ್ತಪ್ಪಿನಿಂದ ಹೀಗೆ ಆಗಿದೆಯೋ ಎಂಬುದು ಗೊತ್ತಾಗಿಲ್ಲ. ಈ ಬಗ್ಗೆ ಹವಾಮಾನ ಇಲಾಖೆ ಅಧಿಕಾರಿಗಳನ್ನು ಕೇಳಿದಾಗ ‘ಕಣ್ತಪ್ಪಿನಿಂದ ಹೀಗೆ ಆಗಿರಬಹುದು, ಶುಕ್ರವಾರ ಪರಿಶೀಲಿಸುತ್ತೇವೆ’ ಎಂದು ಉತ್ತರಿಸಿದರು.