ಇಮ್ರಾನ್‌ಖಾನ್‌ ಹೊಸ ಇನ್ನಿಂಗ್ಸ್‌ ಶುರು

7
ಪಾಕಿಸ್ತಾನದ 22ನೇ ಪ್ರಧಾನಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ ಮಾಜಿ ಕ್ರಿಕೆಟಿಗ

ಇಮ್ರಾನ್‌ಖಾನ್‌ ಹೊಸ ಇನ್ನಿಂಗ್ಸ್‌ ಶುರು

Published:
Updated:
Deccan Herald

ಇಸ್ಲಾಮಾಬಾದ್‌: ಕ್ರಿಕೆಟ್‌ ಜಗತ್ತಿನಲ್ಲೇ ತನ್ನದೇ ಆದ ಛಾಪು ಮೂಡಿಸಿ ರಾಜಕೀಯ ಅಂಗಳಕ್ಕೆ ಇಳಿದಿದ್ದ ಪಾಕಿಸ್ತಾನ ತೆಹ್ರೀಕ್‌–ಎ–ಇನ್ಸಾಫ್‌ (ಪಿಟಿಐ) ಅಧ್ಯಕ್ಷ ಇಮ್ರಾನ್‌ ಖಾನ್‌ ಶನಿವಾರ ಪಾಕಿಸ್ತಾನದ ನೂತನ ಪ್ರಧಾನಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದರು. ರಾಜಕೀಯ ರಂಗ ಪ್ರವೇಶಿಸಿ 22 ವರ್ಷಗಳ ಸುದೀರ್ಘ ಅವಧಿ ಬಳಿಕ ಇಮ್ರಾನ್‌ ಅಧಿಕಾರದ ಗದ್ದುಗೆ ಅಲಂಕರಿಸಿದ್ದಾರೆ.

ಸರಳ ಸಮಾರಂಭದಲ್ಲಿ 65 ವರ್ಷದ ಇಮ್ರಾನ್‌ ಅವರಿಗೆ ಪಾಕಿಸ್ತಾನದ ಅಧ್ಯಕ್ಷ ಮಮ್ನೂನ್‌ ಹುಸೇನ್‌ ಅವರು ಪ್ರಮಾಣ ವಚನ ಬೋಧಿಸಿದರು. ಇಮ್ರಾನ್‌ ಅವರು ದೇಶದ 22ನೇ ಪ್ರಧಾನಿಯಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ.

ಸೇನಾ ಮುಖ್ಯಸ್ಥ ಜನರಲ್‌ ಖಮರ್ ಜಾವೇದ್‌ ಬಜ್ವಾ, ಭಾರತದ ಮಾಜಿ ಕ್ರಿಕೆಟಿಗ ನವಜೋತ್‌ ಸಿಂಗ್‌ ಸಿಧು ಸೇರಿದಂತೆ ಹಲವು ಮಾಜಿ ಮತ್ತು ಹಾಲಿ ಕ್ರಿಕೆಟಿಗರು ವಿಶೇಷ ಅತಿಥಿಗಳಾಗಿ ಸಮಾರಂಭದಲ್ಲಿ ಪಾಲ್ಗೊಂಡಿದ್ದರು. 1992ರಲ್ಲಿ ಪಾಕ್‌ ಕ್ರಿಕೆಟ್‌ ತಂಡದ ನಾಯಕತ್ವ ವಹಿಸಿಕೊಂಡು ವಿಶ್ವಕಪ್‌ ಜಯಗಳಿಸಿದ್ದ ಇಮ್ರಾನ್‌, ತಮ್ಮ ತಂಡದ ಮಾಜಿ ಸದಸ್ಯರನ್ನು ಸಹ ಸಮಾರಂಭಕ್ಕೆ ಆಹ್ವಾನಿಸಿದ್ದರು. ಇಮ್ರಾನ್‌ ಮೂರನೇ ಪತ್ನಿ ಬೂಷ್ರಾ ಮನೇಕಾ ಅವರು ಸಹ ಹಾಜರಿದ್ದರು.

ಇಮ್ರಾನ್‌ ಅವರು ಪ್ರಧಾನಿಯಾಗುವ ಮೂಲಕ ಪಾಕ್‌ ರಾಜಕೀಯದಲ್ಲಿ ದಶಕಗಳ ಕಾಲ ಪಾಕಿಸ್ತಾನ ಮುಸ್ಲಿಂ ಲೀಗ್‌–ನವಾಜ್‌ (ಪಿಎಂಎಲ್‌–ಎನ್‌) ಮತ್ತು ಪಾಕಿಸ್ತಾನ ಪೀಪಲ್ಸ್‌ ಪಾರ್ಟಿ (ಪಿಪಿಪಿ) ಪ್ರಾಬಲ್ಯ ಅಂತ್ಯಗೊಂಡಂತಾಗಿದೆ. ಸೇನೆಯ ಆಡಳಿತ ಇಲ್ಲದೇ ಇದ್ದಾಗ ಈ ಎರಡೇ ಪಕ್ಷಗಳು ಅಧಿಕಾರ ವಹಿಸಿಕೊಳ್ಳುತ್ತಿದ್ದವು.

ಶಹಬಾಜ್‌ ವಿರೋಧ ಪಕ್ಷದ ನಾಯಕ: ಪಾಕಿಸ್ತಾನ ಮುಸ್ಲಿಂ ಲೀಗ್‌–ನವಾಜ್‌ (ಪಿಎಂಎಲ್‌–ಎನ್‌) ಪಕ್ಷದ ಮುಖ್ಯಸ್ಥ ಶಹಬಾಜ್‌ ಷರೀಫ್‌ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ವಿರೋಧ ಪಕ್ಷದ ನಾಯಕರಾಗಲಿದ್ದಾರೆ. 111 ಸಂಸದರು ಷರೀಫ್‌ ಅವರಿಗೆ ಬೆಂಬಲ ಸೂಚಿಸಿದ್ದಾರೆ.

ತಡವರಿಸಿದ ನೂತನ ಪ್ರಧಾನಿ
ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಕಪ್ಪು ಶೇರ್ವಾನಿ ಧರಿಸಿ ಬಂದಿದ್ದ ಇಮ್ರಾನ್‌, ಸ್ವಲ್ಪ ಮಟ್ಟಿಗೆ ಬಳಲಿದಂತೆ ಕಂಡು ಬಂದರು. ಪ್ರಮಾಣ ವಚನ ಸ್ವೀಕರಿಸುವಾಗ ಕೆಲವು ಉರ್ದು ಶಬ್ದಗಳನ್ನು ಉಚ್ಚರಿಸುವಾಗ ತಡವರಿಸಿದರು. ಕೆಲವನ್ನು ತಪ್ಪಾಗಿಯೂ ಉಚ್ಚರಿಸಿದರು.

ರೋಜ್-ಇ- ಖಯಾಮತ್ (ತೀರ್ಪಿನ ದಿನ) ಎಂದು ಹೇಳುವ ಬದಲು 'ರೋಝ್ -ಇ- ಖಯಾದತ್ (ನಾಯಕತ್ವದ ದಿನ) ಎಂದು ಉಚ್ಚರಿಸಿದರು. ಹೀಗಾಗಿ, ಇಡೀ ವಾಕ್ಯದ ಅರ್ಥವೇ ಬದಲಾಯಿತು. ಆಗ ಅಧ್ಯಕ್ಷ ಮಮ್ನೂನ್‌ ಹುಸೇನ್‌ ಅವರು ತಪ್ಪುಗಳನ್ನು ತಿದ್ದಿದಾಗ ಮುಗುಳ್ನಕ್ಕು ಕ್ಷಮೆಯಾಚಿಸಿದರು.

ಅಧ್ಯಕ್ಷ ಸ್ಥಾನಕ್ಕೆ ಡಾ. ಅರೀಫ್‌ ಅಲ್ವಿ
ಪಾಕಿಸ್ತಾನದ ನೂತನ ಅಧ್ಯಕ್ಷ ಸ್ಥಾನಕ್ಕೆ ಸೆಪ್ಟೆಂಬರ್‌ 4ರಂದು ಚುನಾವಣೆ ನಡೆಯಲಿದೆ. ಪಾಕಿಸ್ತಾನ ತೆಹ್ರೀಕ್‌–ಎ– ಇನ್ಸಾಫ್‌ ಪಕ್ಷದಿಂದ ಡಾ. ಅರೀಫ್‌ ಅಲ್ವಿ ಅವರನ್ನು ಅಭ್ಯರ್ಥಿಯನ್ನಾಗಿ ಘೋಷಿಸಲಾಗಿದೆ. ದಂತ ವೈದ್ಯರಾಗಿರುವ ಅಲ್ವಿ ಅವರು ಪಿಟಿಐ ಸ್ಥಾಪನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಹಾಲಿ ಅಧ್ಯಕ್ಷ ಮಮ್ನೂನ್‌ ಹುಸೇನ್‌ ಅವರ ಅವಧಿ ಸೆ.9ರಂದು ಮುಕ್ತಾಯವಾಗಲಿದೆ.

*

ನವಜೋತ್‌ ಸಿಂಗ್‌ ಸಿಧು ಭಾಗಿ
ಪ್ರಮಾಣವಚನ ಸ್ವೀಕಾರ ಸಮಾರಂಭದಲ್ಲಿ ಮಾಜಿ ಕ್ರಿಕೆಟಿಗ ಮತ್ತು ಪಂಜಾಬ್‌ ಸಚಿವ ನವಜೋತ್‌ ಸಿಧು ಭಾಗವಹಿಸಿ ಗಮನಸೆಳೆದರು.

ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಜನರಲ್‌ ಖಮರ್‌ ಜಾವೇದ್‌ ಬಜ್ವಾ ಎರಡು ಬಾರಿ ಸಿಧು ಅವರನ್ನು ಅಪ್ಪಿಕೊಂಡು ಕೆಲ ನಿಮಿಷಗಳ ಕಾಲ ಚರ್ಚಿಸಿದರು. ಪಾಕ್‌ ಆಕ್ರಮಿತ ಕಾಶ್ಮೀರ ಅಧ್ಯಕ್ಷ ಮಸೂದ್‌ ಖಾನ್‌ ಅವರ ಪಕ್ಕದಲ್ಲಿ ಸಿಧು ಕುಳಿತಿದ್ದರು.

‘ಪಾಕಿಸ್ತಾನದಲ್ಲಿ ಹೊಸಯುಗ ಆರಂಭವಾಗಿದೆ. ಭಾರತ ಮತ್ತು ಪಾಕ್‌ ನಡುವಣ ಶಾಂತಿ ಪ್ರಕ್ರಿಯೆ ದೃಷ್ಟಿಯಿಂದ ಇದು ಉತ್ತಮ ಬೆಳವಣಿಗೆಯಾಗಿದೆ’ ಎಂದು ಸಿಧು ಆಶಾಭಾವ ವ್ಯಕ್ತಪಡಿಸಿದ್ದಾರೆ.

‘ನಾನು ರಾಜಕಾರಣಿಯಾಗಿ ಇಲ್ಲಿಗೆ ಬಂದಿಲ್ಲ. ಒಬ್ಬ ಸ್ನೇಹಿತನಾಗಿ ಬಂದಿದ್ದೇನೆ. ಸ್ನೇಹಿತನ ಸಂತೋಷದಲ್ಲಿ ಭಾಗಿಯಾಗಲು ಇಲ್ಲಿಗೆ ಬಂದಿರುವೆ’ ಎಂದು ಪ್ರತಿಕ್ರಿಯಿಸಿದ್ದಾರೆ.

’ಖಾನ್‌ ಸಾಹೇಬರಿಗೆ ಕಾಣಿಕೆಯಾಗಿ ನೀಡಲು ಕಾಶ್ಮೀರಿ ಶಾಲು ತಂದಿದ್ದೇನೆ’ ಎಂದು ಸಿಧು ಹೇಳಿದರು. ಮಾಜಿ ಕ್ರಿಕೆಟ್‌ ಆಟಗಾರರಾದ ಸುನೀಲ್‌ ಗವಾಸ್ಕರ್ ಮತ್ತು ಕಪಿಲ್‌ ದೇವ್‌ ಅವರಿಗೂ ಇಮ್ರಾನ್‌ ಆಹ್ವಾನಿಸಿದ್ದರು. ಆದರೆ, ವೈಯಕ್ತಿಕ ಕಾರಣಗಳನ್ನು ನೀಡಿ ಇಬ್ಬರು ಗೈರು ಹಾಜರಾಗಿದ್ದರು.

ಬಿಜೆಪಿ ಆಕ್ರೋಶ
ಚಂಡೀಗಡ:
ಇಮ್ರಾನ್‌ಖಾನ್‌ ಅವರ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ನವಜೋತ್‌ ಸಿಂಗ್‌ ಸಿಧು ಹಾಜರಾಗಿರುವುದಕ್ಕೆ ಪಂಜಾಬ್‌ನಲ್ಲಿ ವಿರೋಧ ಪಕ್ಷಗಳು ಕಿಡಿ ಕಾರಿದ್ದು, ಕ್ಷಮೆಯಾಚಿಸಬೇಕು ಎಂದು ಒತ್ತಾಯಿಸಿವೆ. ‘ಇದೊಂದು ನಾಚಿಕೆಗೇಡಿತನದ ಸಂಗತಿ’ ಎಂದು ಪಂಜಾಬ್‌ ಬಿಜೆಪಿ ಘಟಕದ ಅಧ್ಯಕ್ಷ ಶ್ವೈತ್‌ ಮಲೀಕ್‌ ಟೀಕಿಸಿದ್ದಾರೆ.

‘ನಮ್ಮ ಸೈನಿಕರ ಮೇಲೆ ಪಾಕಿಸ್ತಾನ ದಾಳಿ ನಡೆಸುತ್ತಿದೆ. ಇನ್ನೊಂದೆಡೆ, ಸಿಧು ಅಲ್ಲಿನ ಸೇನಾ ಮುಖ್ಯಸ್ಥರನ್ನು ಅಪ್ಪಿಕೊಳ್ಳುತ್ತಾರೆ. ಅಂದರೆ, ನಮ್ಮ ಸೈನಿಕರನ್ನು ಹತ್ಯೆ ಮಾಡಿರುವುದಕ್ಕೆ ಸಿಧು ಅಭಿನಂದನೆ ಸಲ್ಲಿಸಿದ್ದಾರೆಯೇ’ ಎಂದು ಪ್ರಶ್ನಿಸಿದ್ದಾರೆ.

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 1

    Frustrated
  • 0

    Angry

Comments:

0 comments

Write the first review for this !