ಗರ್ಭಪಾತ ನಿಷೇಧ: ನಾನು ಜೀವ ಪರ– ಟ್ರಂಪ್‌

ಅಮೆರಿಕದ ಎರಡು ರಾಜ್ಯಗಳು ಇತ್ತೀಚೆಗೆ ಗರ್ಭಪಾತಕ್ಕೆ ಕಠಿಣ ನಿರ್ಬಂಧಗಳನ್ನು ವಿಧಿಸಿರುವುದಕ್ಕೆ ಟ್ರಂಪ್‌ ಈ ಪ್ರತಿಕ್ರಿಯೆ ನೀಡಿದ್ದಾರೆ. ಮುಂದಿನ ಅಧ್ಯಕ್ಷೀಯ ಚುನಾವಣೆಯಲ್ಲೂ ಗರ್ಭಪಾತ ವಿಷಯ ಪ್ರಮುಖವಾಗಿ ಚರ್ಚೆಯಾಗುವ ನಿರೀಕ್ಷೆ ಇದೆ.

‘ನಾನು ಜೀವ ಪರ. ಆದರೆ, ಮೂರು ವಿನಾಯಿತಿಗಳನ್ನು ನೀಡಬೇಕು. ಅತ್ಯಾಚಾರ, ಸಂಬಂಧಿಕರು ಅಥವಾ ತಂದೆಯಿಂದಲೇ ಅತ್ಯಾಚಾರಕ್ಕೆ ಒಳಗಾದ ಪ್ರಕರಣಗಳಲ್ಲಿ ಹಾಗೂ ತಾಯಿಯ ಜೀವ ಉಳಿಸುವ ಸಂದರ್ಭಗಳಲ್ಲಿ ವಿನಾಯತಿ ನೀಡಬೇಕು. ರೊನಾಲ್ಡ್‌ ರೇಗನ್‌ ಸಹ ಇದೇ ನಿಲುವು ಹೊಂದಿದ್ದರು’ ಎಂದು
ಟ್ರಂಪ್‌ ಭಾನುವಾರ ಟ್ವೀಟ್‌ ಮಾಡಿದ್ದಾರೆ.

ಗರ್ಭಪಾತವನ್ನು ಸಂಪೂರ್ಣವಾಗಿ ನಿಷೇಧಿಸುವ ಕಾನೂನಿಗೆ ಅಲಬಾಮಾ ಗವರ್ನರ್‌ ಬುಧವಾರ ಸಹಿ ಹಾಕಿದ್ದರು. ಮಿಸ್ಸೌರಿಯಲ್ಲೂ ಎಂಟು ವಾರಗಳ ಗರ್ಭಪಾತ ಕಾನೂನುಬಾಹಿರ ಎಂದು ಕಾನೂನು ರೂಪಿಸಲಾಗಿತ್ತು. ಒಹಿಯೊ, ಕೆಂಟುಕಿ, ಲೊವಾ ಸೇರಿದಂತೆ ಹಲವು ರಾಜ್ಯಗಳು ಸಹ ಇದೇ ರೀತಿಯ ಕಾನೂನುಗಳನ್ನು ಈ ಹಿಂದೆಯೇ ರೂಪಿಸಿವೆ.