ರಾಯಚೂರು: ಉತ್ಪಾದನೆ ತಗ್ಗಿದರೂ ಲಾಭದಲ್ಲಿ ಹಟ್ಟಿ ಚಿನ್ನದ ಕಂಪೆನಿ

ಮಾಸಿಕ ಸರಾಸರಿ 180 ಕೆಜಿ ಚಿನ್ನ ಉತ್ಪಾದನೆ ಗುರಿ ಇದ್ದು, ಏಪ್ರಿಲ್‌ನಿಂದ ಜುಲೈ ನಾಲ್ಕು ತಿಂಗಳಲ್ಲಿ 720 ಕೆಜಿ ಚಿನ್ನ ಉತ್ಪಾದನೆ ಗುರಿಯಲ್ಲಿ ಶೇ 50 ರಷ್ಟು ಮಾತ್ರ ಸಾಧನೆ ಆಗಿದೆ. ಮಾರ್ಚ್‌ನಲ್ಲಿಪ್ರತಿ 10 ಗ್ರಾಂ ಚಿನ್ನದ ದರ ₹33 ಸಾವಿರದಿಂದ ಸದ್ಯ ₹53 ಸಾವಿರ ಶೇ 60 ರಷ್ಟು ಏರಿಕೆ ಆಗಿದ್ದರಿಂದ ಕಂಪೆನಿ ನಷ್ಟದಿಂದ ಲಾಭದ ಕಡೆಗೆ ವಾಲಿದೆ.

‘ಲಾಕ್‌ಡೌನ್‌ನಿಂದ ಏಪ್ರಿಲ್‌ನಲ್ಲಿ ಸಂಪೂರ್ಣ ಸ್ಥಗಿತವಾಗಿತ್ತು. ಭಾಗಶಃ ಕಾರ್ಮಿಕರನ್ನು ಬಳಸಲು ಅವಕಾಶ ನೀಡಿದ್ದರಿಂದ ಮೇ ತಿಂಗಳು 75 ಕೆಜಿ, ಜೂನ್‌ನಲ್ಲಿ 140 ಕೆಜಿ ಹಾಗೂ ಜುಲೈ ಸುಮಾರು 145 ಕೆಜಿ ಚಿನ್ನದ ಉತ್ಪಾದಿಸಲು ಸಾಧ್ಯವಾಗಿದೆ’ ಎಂದು ಕಂಪೆನಿಯ ಕಾರ್ಯನಿರ್ವಾಹಕ ನಿರ್ದೇಶಕ ಪ್ರಕಾಶ್‌ ಬಿ. ‘ಪ್ರಜಾವಾಣಿ’ಗೆ ತಿಳಿಸಿದರು.

2019–20ನೇ ಸಾಲಿನಲ್ಲಿ ಒಟ್ಟು 1,740 ಕೆಜಿ ಚಿನ್ನ ಉತ್ಪಾದನೆ ಆಗಿತ್ತು. 2020–21ನೇ ಸಾಲಿನಲ್ಲಿ 1,800 ಕೆಜಿ ಚಿನ್ನ ಉತ್ಪಾದಿಸುವ ಗುರಿ ಇದೆ. ಕಂಪೆನಿಗೆ ಲಾಭ ಬರುತ್ತಿರುವುದರಿಂದ ವೇತನ, ಬೋನಸ್‌ ಸಮರ್ಪಕವಾಗಿ ಕೈಸೇರುತ್ತವೆ ಎಂದು ಕಾರ್ಮಿಕ ವರ್ಗ ಕೂಡಾ ಹರ್ಷ ಚಿತ್ತವಾಗಿದೆ. ಸದ್ಯಕ್ಕೆ ಕಂಪೆನಿಯಲ್ಲಿ ಗಣಿಯೊಳಗೆ ಕಾರ್ಮಿಕರನ್ನು ಪಾಳಿಗಳಲ್ಲಿ ಕಳುಸಲಾಗುತ್ತಿದೆ. ಮೊದಲಿದ್ದ ಸಾಮಾನ್ಯ ವ್ಯವಸ್ಥೆಯನ್ನು ಅನುಸರಿಸುತ್ತಿಲ್ಲ ಎಂದು ಹೇಳಿದರು.