ಜಮ್ಮು : ಕಾಶ್ಮೀರದ ದಕ್ಷಿಣ ಭಾಗದಲ್ಲಿ ಭದ್ರತೆಯನ್ನು ಇನ್ನಷ್ಟು ಬಲಪಡಿಸುವ ಕ್ರಮವಾಗಿ ಏಳು ನೂತನ ಠಾಣೆಗಳನ್ನು ಸ್ಥಾಪಿಸಲು ಹಾಗೂ ಹೆಚ್ಚುವರಿ ಸಿಬ್ಬಂದಿಯನ್ನು ನಿಯೋಜಿಸಲು ಜಮ್ಮು ಮತ್ತು ಕಾಶ್ಮೀರದ ಆಡಳಿತವು ನಿರ್ಧರಿಸಿದೆ.
ಈ ಪ್ರದೇಶವು ಕೆಲವು ವರ್ಷಗಳಿಂದ ಉಗ್ರ ಚಟುವಟಿಕೆಗಳ ತಾಣವಾಗಿದೆ. ಉಗ್ರ ಸಂಘಟನೆಗಳು ಈ ಭಾಗದಲ್ಲಿ ಹೆಚ್ಚಿನ ಜನರನ್ನು ಸೇರಿಸಿ ಕೊಳ್ಳುತ್ತಿವೆ. ಪುಲ್ವಾಮಾ ದಾಳಿ ಕೂಡಾ ಈ ಭಾಗದಲ್ಲಿಯೇ ನಡೆದಿತ್ತು ಎಂಬ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಕ್ವಾಜಿಗುಂದ್‌ನಲ್ಲಿ ಕೇಂದ್ರ ಸ್ಥಾನ ಇರುವಂತೆ ಹೆದ್ದಾರಿ ವ್ಯಾಪ್ತಿಗೊಳಪಟ್ಟು ಹೆಚ್ಚುವರಿ ಪೊಲೀಸ್‌ ವರಿಷ್ಠಾಧಿಕಾರಿ ಕಚೇರಿ ಮತ್ತು ಹಿಲ್ಲರ್‌, ದಕ್ಷುಂ, ಹತಿಪೊರಾ,ನಿಲ್ಲೊ, ಚುರ್ಸೂವಿನಲ್ಲಿ ಠಾಣೆ ಸ್ಥಾಪನೆ, ಬೆಹಿಬಾಗ್‌ ಠಾಣೆ ಉನ್ನತೀಕರಣ ಕಾರ್ಯ ಕೈಗೊಳ್ಳಲಾಗುವುದು ಎಂದು ಆದೇಶ ತಿಳಿಸಿದೆ.
