ಬೆಂಗಳೂರಿನಲ್ಲೇ 'ಏರೋ ಇಂಡಿಯಾ 2019'; ಜಾಗದ ಜಗ್ಗಾಟಕ್ಕೆ ತೆರೆ

ಬೆಂಗಳೂರು: ’ಏರೋ ಇಂಡಿಯಾ–2019’ ಹನ್ನೆರಡನೇ ವೈಮಾನಿಕ ಪ್ರದರ್ಶನವನ್ನು ಬೆಂಗಳೂರಿನಲ್ಲಿಯೇ ನಡೆಸುವುದಾಗಿ ಕೇಂದ್ರ ಸರ್ಕಾರ ಶನಿವಾರ ನಿರ್ಧಾರ ಪ್ರಕಟಿಸಿದೆ. 

ನಗರದಲ್ಲಿನ ಭಾರತೀಯ ವಾಯುಪಡೆಯ ಯಲಹಂಕ ನೌಕಾನೆಲೆಯಲ್ಲಿ 2019ರ ಫೆಬ್ರುವರಿ 20–24ರ ವರೆಗೆ ವೈಮಾನಿಕ ಪ್ರದರ್ಶನ ನಡೆಯಲಿದೆ. ಐದು ದಿನಗಳ ಕಾರ್ಯಕ್ರಮದಲ್ಲಿ ಹತ್ತಾರು ರಾಷ್ಟ್ರಗಳ ರಕ್ಷಣಾ ಮತ್ತು ವೈಮಾನಿಕ ಉತ್ಪನ್ನಗಳ ವಹಿವಾಟು ಸಂಸ್ಥೆಗಳು  ಪ್ರದರ್ಶನದ ಭಾಗವಾಗಿರಲಿವೆ. 

‘ಏರೋ ಇಂಡಿಯಾ’ ವೈಮಾನಿಕ ಪ್ರದರ್ಶನವನ್ನು ತಮ್ಮಲ್ಲಿ ಆಯೋಜಿಸುವಂತೆ ಹಲವು ರಾಜ್ಯಗಳು ಬೇಡಿಕೆ ಮುಂದಿಟ್ಟಿವೆ ಎಂದು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌, ಬೇರೆಡೆಗೆ ಪ್ರದರ್ಶನವನ್ನು ಸ್ಥಳಾಂತರಿಸುವ ಸುಳಿವು ನೀಡಿದ್ದರು. ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ, ಬೆಂಗಳೂರಿನಲ್ಲೇ ಏರೋ ಇಂಡಿಯಾ ನಡೆಸುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದರು. 

Ministry of Defence announces aeroshow https://t.co/BNHyseYjcA @DefenceMinIndia @drajaykumar_ias @PIB_India @MIB_India @nsitharaman

— Defence Spokesperson (@SpokespersonMoD) September 8, 2018

ವೈಮಾನಿಕ ಕ್ಷೇತ್ರದಲ್ಲಿನ ಬೃಹತ್‌ ಹೂಡಿಕೆದಾರರು, ಜಾಗತಿಕ ಮಟ್ಟದ ನಾಯಕರು, ವಿಚಾರವಾದಿಗಳೂ ಸೇರಿ ಜಗತ್ತಿನ ಹಲವು ಭಾಗಗಳಿಂದ ಗಣ್ಯರು ಕಾರ್ಯಕ್ರಮದಲ್ಲಿ ಭಾಗಿಯಾಗಲಿದ್ದಾರೆ. ನಾಗರಿಕ ವೈಮಾನಿಕ ಕ್ಷೇತ್ರದ ಬೆಳವಣಿಗೆ ಹಾಗೂ ಮೇಕ್‌ ಇಂಡಿಯಾಗೆ ಪೂರಕವಾಗಿ ಪ್ರದರ್ಶನ ಆಯೋಜಿಸಲು ರಕ್ಷಣಾ ಉತ್ಪಾದನಾ ವಿಭಾಗ ನಿರ್ಧರಿಸಿದೆ. 

1996ರಿಂದ ಏರೋ ಇಂಡಿಯಾ ಪ್ರಾರಂಭವಾದಾಗಿನಿಂದ ಬೆಂಗಳೂರಿನಲ್ಲಿ 11 ಬಾರಿ ವೈಮಾನಿಕ ಪ್ರದರ್ಶನ ಕಂಡಿದೆ. ಏರೋ ಇಂಡಿಯಾ ಎಂದರೆ ಬೆಂಗಳೂರು ಎಂಬುದು ಈ ಬಾರಿಯೂ ಮುಂದುವರಿದಿದೆ. ಸಾರ್ವಜನಿಕರಿಗೂ ಟಿಕೆಟ್‌, ಪಾಸ್‌ಗಳ ಮೂಲಕ ವೈಮಾನಿಕ ಪ್ರದರ್ಶನ ವೀಕ್ಷಣೆಗೆ ಅವಕಾಶವಿದೆ.