ಕಾರವಾರ: ಜಿಲ್ಲೆಯ ಪ್ರವಾಸಿ ತಾಣಗಳ ಸಮಗ್ರ ಮಾಹಿತಿಗಳನ್ನು ಒಳಗೊಂಡಿರುವ ‘ದಿ ಡ್ರೀಮ್ ಲ್ಯಾಂಡ್ ಕ್ಯಾಪ್ಟಿವೇಟಿಂಗ್ ಗ್ಲಿಂಪ್ಸೆಸ್ ಆಫ್ ದಿ ಮೋಸ್ಟ್ ಡೈವರ್ಸ್ ಡಿಸ್ಟ್ರಿಕ್ಟ್ ಉತ್ತರ ಕನ್ನಡ’ ಕಾಫಿಟೇಬಲ್ ಪುಸ್ತಕಕ್ಕೆ ‘ಏಷ್ಯನ್ ಪ್ರಿಂಟ್ ಅವಾರ್ಡ್– 2018’ ದೊರೆತಿದೆ.
ಏಷ್ಯಾದಲ್ಲಿನ ಉತ್ತಮ ಮುದ್ರಣ ಉತ್ಪನ್ನಕ್ಕೆ ನೀಡಲಾಗುವ ಈ ಪ್ರಶಸ್ತಿಗಳಲ್ಲಿ ಪುಸ್ತಕದ ವಿನ್ಯಾಸ ಹಾಗೂ ಮುದ್ರಣ ವಿಭಾಗಕ್ಕೆ ಸಂಬಂಧಿಸಿದ ಕಂಚಿನ ಪ್ರಶಸ್ತಿಯನ್ನು ಈ ಪುಸ್ತಕಕ್ಕೆ ನೀಡಲಾಗಿದೆ. ಇದರ ವಿನ್ಯಾಸಗಾರರಾಗಿರುವ ಬೆಂಗಳೂರಿನ ರಮ್ಯಾ ರೆಪ್ರೊಗ್ರಾಫಿಕ್ ಕಂಪನಿಯ ‘ಫ್ಲವರ್ ಗ್ರಾಫಿಕ್’ ವಿಭಾಗಕ್ಕೆ ಗುರುವಾರ ಹಾಂಕಾಂಗ್ನಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಪುಸ್ತಕದ ಮಾಹಿತಿ: ಜಿಲ್ಲೆಯ ಪ್ರವಾಸೋದ್ಯಮದ ಮಾಹಿತಿಗಳನ್ನು ಒದಗಿಸುವ ನಿಟ್ಟಿನಲ್ಲಿ ‘ದಿ ಡ್ರೀಮ್ ಲ್ಯಾಂಡ್' ಹೆಸರಿನ ಛಾಯಾಚಿತ್ರವನ್ನು ಒಳಗೊಂಡ ಪುಸ್ತಕವನ್ನು ಜಿಲ್ಲಾಡಳಿತವು ಕಳೆದ ಫೆಬ್ರುವರಿಯಲ್ಲಿ ಬಿಡುಗಡೆ ಮಾಡಿತ್ತು. ಇಲ್ಲಿನ ಪ್ರವಾಸಿ ಸ್ಥಳಗಳನ್ನು ಮತ್ತು ವೈಶಿಷ್ಟವನ್ನು ಇಲ್ಲಿಗೆ ಬರುವ ಪ್ರವಾಸಿಗರಿಗೆ ತಿಳಿಸುವ ಕೈಪಿಡಿಯಾಗಿ ಈ ಪುಸ್ತಕ ಬಳಕೆಯಾಗುತ್ತಿದೆ.
ಪ್ರಮುಖ ಪ್ರವಾಸಿ ತಾಣಗಳಾದ ಮುರ್ಡೇಶ್ವರ, ಗೋಕರ್ಣ, ಯಾಣ, ದೇವಭಾಗ ಕಡಲತೀರ, ದಾಂಡೇಲಿ ಅರಣ್ಯ ಪ್ರದೇಶ, ಹೀಗೆ ಜಿಲ್ಲೆಯಲ್ಲಿನ ವಿಶೇಷ ಛಾಯಾಚಿತ್ರಗಳನ್ನು ಕ್ರೋಡೀಕರಿಸಿ ಈ ಪುಸ್ತಕವನ್ನು ಸಿದ್ಧಪಡಿಸಲಾಗಿದೆ.