ಉದ್ಯಮ ದೇಣಿಗೆ: ಬಿಜೆಪಿಗೆ ಸಿಂಹಪಾಲು

ನವದೆಹಲಿ: ಕೇಂದ್ರದ ಆಡಳಿತಾರೂಢ ಎನ್‌ಡಿಎ ಮೈತ್ರಿಕೂಟದ ನೇತೃತ್ವ ವಹಿಸಿರುವ ಬಿಜೆಪಿಗೆ 2016–17, 2017–18ನೇ ಆರ್ಥಿಕ ವರ್ಷಗಳಲ್ಲಿ ಉದ್ಯಮ ಸಂಸ್ಥೆಗಳಿಂದ ಅತ್ಯಧಿಕ ಅಂದರೆ ₹ 915.96 ಕೋಟಿ ದೇಣಿಗೆ ಸಂದಾಯವಾಗಿದೆ.

ಎರಡು ವರ್ಷಗಳ ಅವಧಿಯಲ್ಲಿ ವಿವಿಧ ಆರು ರಾಜಕೀಯ ಪಕ್ಷಗಳಿಗೆ ಒಟ್ಟಾರೆ ₹ 1059.25 ಕೋಟಿ ದೇಣಿಗೆ ದೊರೆತಿದೆ. ಇದರಲ್ಲಿ ಉದ್ಯಮ ವಲಯದ ದೇಣಿಗೆಯೇ ₹ 985.18 ಕೋಟಿ. ಇದು, ಒಟ್ಟು ದೇಣಿಗೆ ಮೊತ್ತದಲ್ಲಿ ಶೇ 93 ರಷ್ಟಿದೆ. ಒಟ್ಟು ಮೊತ್ತದಲ್ಲಿ ₹ 20,000ಕ್ಕೂ ಹೆಚ್ಚಿನ ಮೊತ್ತದ ವೈಯಕ್ತಿಕ ಸಂದಾಯದ ದೇಣಿಗೆಯೂ ಸೇರಿದೆ. 

ಎರಡೂ ವರ್ಷಗಳಲ್ಲಿ ಸಂದಾಯವಾದ ದೇಣಿಗೆಯ ಅಂಕಿ ಅಂಶಗಳನ್ನು ಆಧರಿಸಿ ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಟಿಕ್‌ ರಿಫಾರ್ಮ್ಸ್‌ (ಎಡಿಆರ್) ವಿಶ್ಲೇಷಣೆ ಮಾಡಿದ್ದು, ವರದಿ ಬಿಡುಗಡೆ ಮಾಡಿದೆ.