ಲಖನೌ: ಉತ್ತರ ಪ್ರದೇಶದಲ್ಲಿನ ಬಿಜೆಪಿ ಆಡಳಿತ ಟೀಕಿಸಿದ ಅಂಗವಿಕಲ ಯುವಕನ ಮೇಲೆ ಪಕ್ಷದ ನಾಯಕರೊಬ್ಬರು ಹಲ್ಲೆ ಮಾಡಿದ್ದಾರೆ.
ಸಂಭಾಲ್ ಜಿಲ್ಲೆಯಲ್ಲಿ ನಡೆದಿರುವ ಈ ಘಟನೆಯ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರಿಗೆ ಮತ ನೀಡುವುದಾಗಿ ಕೂಗುವ ಅಂಗವಿಕಲ ಯುವಕನ ಮುಖಕ್ಕೆ ಸ್ಥಳೀಯ ಬಿಜೆಪಿ ನಾಯಕ ಮೊಹಮ್ಮದ್ ಮಿಯಾ, ಕೋಲಿನಿಂದ ಪದೇ ಪದೇ ತಿವಿದಿದ್ದಾರೆ.
ರಸ್ತೆಯಲ್ಲಿ ಸಾಗುವಾಗ ಈ ಘಟನೆ ನಡೆದಿದೆ. ಯುವಕನನ್ನು ಬೈದು ದೂರ ಹೋಗುವಂತೆ ಹೇಳುವ ಮಿಯಾ, ಬಾಯಿಯಲ್ಲಿ ಕೋಲು ತುರುಕಿಸಲು ಸಹ ಪ್ರಯತ್ನಿಸಿದ್ದಾರೆ. ಪೊಲೀಸರು ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ತಮ್ಮ ಕೃತ್ಯವನ್ನು ಮಿಯಾ, ಸಮರ್ಥಿಸಿಕೊಂಡಿದ್ದಾರೆ. ಆತ ಮೋದಿ ಮತ್ತು ಯೋಗಿ ಅವರನ್ನು ನಿಂದಿಸುತ್ತಿದ್ದ ಎಂದಿದ್ದಾರೆ.