ಹೈದರಾಬಾದ್‌ನಿಂದ ಸ್ಪರ್ಧಿಸಲು ಅಮಿತ್‌ ಶಾಗೆ ಆಹ್ವಾನ ನೀಡಿದ ಅಸಾದುದ್ದೀನ್‌ ಒವೈಸಿ

7
ಬಿಜೆಪಿಯವರು ಜಾಣ ಮರೆವಿನಿಂದ ಬಳಲುತ್ತಿದ್ದಾರೆ: ಎಐಎಂಐಎಂ ಅಧ್ಯಕ್ಷ ವ್ಯಂಗ್ಯ

ಹೈದರಾಬಾದ್‌ನಿಂದ ಸ್ಪರ್ಧಿಸಲು ಅಮಿತ್‌ ಶಾಗೆ ಆಹ್ವಾನ ನೀಡಿದ ಅಸಾದುದ್ದೀನ್‌ ಒವೈಸಿ

Published:
Updated:

ಹೈದರಾಬಾದ್‌: ತೆಲಂಗಾಣ ವಿಧಾನಸಭೆಯ ಅವಧಿಪೂರ್ವ ವಿಸರ್ಜನೆ ವಿರುದ್ಧ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ನೀಡಿದ್ದ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಆಲ್‌ ಇಂಡಿಯಾ ಮಜ್ಲಿಸ್‌ ಇತ್ತೆಹಾದುಲ್‌ ಮುಸ್ಲಿಮೀನ್(ಎಐಎಂಐಎಂ) ಪಕ್ಷದ ಅಧ್ಯಕ್ಷ ಅಸಾದುದ್ದೀನ್‌ ಒವೈಸಿ, ‘ಭಾರತೀಯ ಜನತಾ ಪಕ್ಷವು(ಬಿಜೆಪಿ) ಜಾಣ ಮರೆವಿನಿಂದ ಬಳಲುತ್ತಿರುವಂತಿದೆ’ ಎಂದು ವ್ಯಂಗ್ಯವಾಡಿದ್ದಾರೆ.

ಮೆಹಬೂಬ್‌ ನಗರದಲ್ಲಿ ಆಯೋಜಿಸಿದ್ದ ಬಿಜೆಪಿಯ ಚುನಾವಣೆ ಪ್ರಚಾರ ಸಭೆಯಲ್ಲಿ ಶನಿವಾರ ಮಾತನಾಡಿದ್ದ ಅಮಿತ್ ಶಾ, ‘ನಾನು ಕೆ.ಚಂದ್ರಶೇಖರ ರಾವ್(ಕೆಸಿಆರ್‌) ಅವರನ್ನು ಕೇಳುತ್ತೇನೆ, ಯಾಕೆ, ವಿಧಾನಸಭೆಯನ್ನು ಬೇಗ ವಿಸರ್ಜಿಸಿದಿರಿ? ನಿಮಗೆ ಮೇ ತಿಂಗಳಲ್ಲಿ  ಗೆಲ್ಲುವ ವಿಶ್ವಾಸವಿರಲಿಲ್ಲವೇ? ನವೆಂಬರ್ ಮತ್ತು ಡಿಸೆಂಬರ್‌ ತಿಂಗಳಲ್ಲಿ ಮಾತ್ರ ಸರ್ಕಾರ ರಚಿಸಲು ಸಾಧ್ಯವೆ?’ ತರಾಟೆಗೆ ತೆಗೆದುಕೊಂಡಿದ್ದರು. 

ಈ ಕುರಿತು ಎಎನ್‌ಐ ಸುದ್ದಿ ಸಂಸ್ಥೆ ನಡೆಸಿದ ಸಂದರ್ಶನದ ವೇಳೆ ಮಾತನಾಡಿದ ಒವೈಸಿ, ‘ನರೆಂದ್ರ ಮೋದಿ ಅವರು 2002ರಲ್ಲಿ ಗುಜರಾಜ್‌ ಮುಖ್ಯಮಂತ್ರಿಯಾಗಿದ್ದ ವೇಳೆ ವಿಧಾನಸಭೆ ವಿಸರ್ಜಿಸಿದ್ದನ್ನು ಅವರು(ಬಿಜೆಪಿ) ಹೇಗೆ ಮರೆಯಲು ಸಾಧ್ಯ? ಅವರು ಜಾಣ ಮರೆವಿನಿಂದ ಬಳಲುತ್ತಿರುವಂತೆ ಕಾಣುತ್ತದೆ. ಆದರೆ ನಾವು ಅದನ್ನು ಮರೆತಿಲ್ಲ. ಕಳೆದ ನಾಲ್ಕು ವರ್ಷದ ಅವಧಿಯಲ್ಲಿ ತೆಲಂಗಾಣದಲ್ಲಿ ಒಂದೇ ಒಂದು ಕೋಮುಗಲಭೆ ಪ್ರಕರಣ ವರದಿಯಾಗಿಲ್ಲ. ತೆಲಂಗಾಣ ಅಭಿವೃದ್ಧಿಯತ್ತ ಸಾಗಿದ್ದು, ಶಾಂತಿ ನೆಲೆಸಿದೆ. ಹೀಗಿದ್ದೂ ಕೆಸಿಆರ್‌ ಅವರು 9 ತಿಂಗಳು ಮುಂಚಿತವಾಗಿ ವಿಧಾನಸಭೆ ವಿಸರ್ಜಸಿರುವುದು ಅವರ ದಿಟ್ಟ ನಿರ್ಧಾರ. ನೀವೇಕೆ(ಬಿಜೆಪಿ) ಹೆದರುತ್ತಿದ್ದೀರಿ?’ ಎಂದು ಪ್ರಶ್ನಿಸಿದ್ದಾರೆ.

ಶಾ ವಿರುದ್ಧ ಮಾತು ಮುಂದುವರಿಸಿದ ಅವರು, ‘ಒಂದು ವೇಳೆ ನೀವು ತೆರಿಗೆ ವಂಚಕರ ಬಗ್ಗೆ ಅಪಾರವಾಗಿ ಚಿಂತಿಸುತ್ತಿರುವವರಾಗಿದ್ದರೆ, ಸ್ವಿಟ್ಜರ್‌ಲೆಂಡ್‌ನಲ್ಲಿ ನೀರವ್‌ ಮೋದಿ ಜೊತೆಗಿದ್ದ ಫೋಟೊ ಹೊರಬಂದದ್ದು ಹೇಗೆ? ಲಂಡನ್‌ಗೆ ತೆರಳುವ ಮುನ್ನ ಸಚಿವರನ್ನು ಭೇಟಿ ಮಾಡಿದ್ದೆ ಎಂದು ಹೇಳಿದವರು ಯಾರು? ಅವರು ತೆರಿಗೆ ವಂಚಕರಲ್ಲವೇ’ ಎಂದು ಹರಿಹಾಯ್ದಿದ್ದಾರೆ.

ತೆಲಂಗಾಣದಲ್ಲಿ ಸ್ಪರ್ಧಿಸಲು ಬಿಜೆಪಿಗೆ ಭಯ ಕಾಡುತ್ತಿದೆ ಎಂದು ಟೀಕಿಸಿರುವ ಅವರು, ‘ಬಿಜೆಪಿ ಸದ್ಯ ಹೊಂದಿರುವ ಐದು ಸ್ಥಾನಗಳನ್ನೂ ಮುಂದಿನ ಚುನಾವಣೆಯಲ್ಲಿ ಉಳಿಸಿಕೊಳ್ಳುವುದಿಲ್ಲ. ಲೋಕಸಭೆ ಕ್ಷೇತ್ರ ಸಿಖಂದರಾಬಾದ್‌ನಲ್ಲಿಯೂ ಸೋಲು ಕಾಣಲಿದೆ. ಒಂದೇಒಂದು ಸ್ಥಾನದಲ್ಲಿಯಾದರೂ ಬಿಜೆಪಿ ಗೆಲ್ಲುವುದನ್ನು ಒಪ್ಪಲು ತೆಲಂಗಾಣ ಜನತೆ ಸಿದ್ಧರಿಲ್ಲ’ ಎಂದು ಗುಡುಗಿದ್ದಾರೆ.

‘ವಿಧಾನಸಭೆ ಚುನಾವಣೆಯಲ್ಲಿ ನಾವು ತೆಲಂಗಾಣ ರಾಷ್ಟ್ರೀಯ ಸಮಿತಿ(ಟಿಆರ್‌ಎಸ್‌) ವಿರುದ್ಧ ಕಣಕ್ಕಿಳಿಯಲಿದ್ದೇವೆ. ಆದರೆ, ತೆಲಂಗಾಣದ ಮುಖ್ಯಮಂತ್ರಿಯಾಗಿದ್ದುಕೊಂಡು ಬಿಜೆಪಿಯನ್ನು ಎದುರಿಸಲಿರುವ ಕೆಸಿಆರ್‌ ಮುಂದಿನ ಮುಖ್ಯಮಂತ್ರಿಯಾಗಲಿದ್ದಾರೆ ಎಂದು ಯಾವಾಗಲೂ ಹೇಳುತ್ತೇವೆ’ ಎಂದಿದ್ದಾರೆ.

ತೆಲಂಗಾಣ ವಿಧಾನಸಭೆ ಚುನಾವಣೆ 2019ರ ಜೂನ್‌ನಲ್ಲಿ ನಿಗದಿಯಾಗಿತ್ತು. ಆದರೆ, ಅವಧಿಪೂರ್ವ ಚುನಾವಣೆ ಎದುರಿಸಲು ನಿರ್ಧರಿಸಿರುವ ಮುಖ್ಯಮಂತ್ರಿ ಕೆಸಿಆರ್‌, ವಿಧಾನಸಭೆಯನ್ನು ವಿಸರ್ಜಿಸಿದ್ದಾರೆ. ಚುನಾವಣೆ ದಿನಾಂಕ ಇನ್ನಷ್ಟೇ ಪ್ರಕಟವಾಗಬೇಕಿದೆ.

ಟ್ವಿಟರ್‌ನಲ್ಲೂ ಸವಾಲು

ಟಿಆರ್‌ಎಸ್‌ ಹಾಗೂ ಎಐಎಂಐಎಂ ಪಕ್ಷಗಳು ರಹಸ್ಯವಾಗಿ ಹೊಂದಾಣಿಕೆ ಮಾಡಿಕೊಂಡಿವೆ ಎಂದು ಆರೋಪಿಸಿದ್ದ ಅಮಿತ್‌ ಶಾ ಅವರಿಗೆ ಟ್ವಿಟರ್‌ನಲ್ಲಿ ತಿರುಗೇಟು ನೀಡಿರುವ ಒವೈಸಿ, ಲೋಕಸಭಾ ಚುನಾವಣೆಯಲ್ಲಿ ತಾವು ಪ್ರತಿನಿಧಿಸುವ ಹೈದರಾಬಾದ್‌ ಕ್ಷೇತ್ರದಿಂದ ಸ್ಪರ್ಧಿಸುವಂತೆ ಸವಾಲು ಹಾಕಿದ್ದಾರೆ.

‘ಸ್ವಾಗತ, ಹೈದರಾಬಾದ್‌ ಮತ್ತು ತೆಲಂಗಾಣ ಜನರು ನಿಮ್ಮ ಕಾರ್ಯತಂತ್ರವನ್ನು ಸೋಲಿಸಲಿದ್ದಾರೆ. ನಾನು ವಿನಂತಿಸಿಕೊಳ್ಳುತ್ತೇನೆ ನೀವು ಹೈದರಾಬಾದ್‌ನಿಂದ ಸ್ಪರ್ಧಿಸಿ. ಎಐಎಂಐಎಂ ಪಕ್ಷ ಗೆಲುವು ಸಾಧಿಸಲಿದೆ. ಸದ್ಯ ಇರುವ ವಿಧಾನಸಭೆಯ ಐದು ಸ್ಥಾನಗಳನ್ನು ಉಳಿಸಿಕೊಳ್ಳಲು ಬಿಜೆಪಿಗೆ ಸಾಧ್ಯವಾಗುವುದಿಲ್ಲ. ಇಂಧನ ದರ ನಿಯಂತ್ರಿಸಲು, ಯುವಕರಿಗೆ ಉದ್ಯೋಗ ಸೃಷ್ಟಿಸಲು ನಿಮ್ಮ ಕಾರ್ಯತಂತ್ರವೇನು? ಇದಕ್ಕೆ ಬಿಜೆಪಿ ಬಳಿ ಉತ್ತರವಿಲ್ಲ’ ಎಂದು ಟ್ವೀಟ್‌ ಮಾಡಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿ ಸಮಾರಂಭವೊಂದರಲ್ಲಿ ಮಾತನಾಡಿರುವ ತೆಲಂಗಾಣ ಬಿಜೆಪಿ ಅಧ್ಯಕ್ಷ ಕೆ. ಲಕ್ಮಣ್‌, ‘ಅಮಿತ್‌ ಶಾ ಅವರಂತಹ ದೊಡ್ಡ ನಾಯಕರು, ಒವೈಸಿ ವಿರುದ್ಧ ಸ್ಪರ್ಧಿಸುವ ಅಗತ್ಯವಿಲ್ಲ. ಅವರನ್ನು ಸೋಲಿಸಲು ಸಾಮಾನ್ಯ ಕಾರ್ಯಕರ್ತ ಸಾಕು. 2019ರ ಲೋಕಸಭೆ ಚುನಾವಣೆಯಲ್ಲಿ ಹೈದರಾಬಾದ್‌ನಲ್ಲಿ ಬಿಜೆಪಿ ಗೆಲುವು ಸಾಧಿಸಲಿದೆ’ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಬರಹ ಇಷ್ಟವಾಯಿತೆ?

  • 8

    Happy
  • 1

    Amused
  • 0

    Sad
  • 0

    Frustrated
  • 2

    Angry

Comments:

0 comments

Write the first review for this !