ಸಿಬಿಎಸ್ಇ: ಜು.15ರೊಳಗೆ 10, 12ನೇ ತರಗತಿ ಫಲಿತಾಂಶ ಪ್ರಕಟ

ರದ್ದುಪಡಿಸಿರುವ ವಿಷಯಗಳ ಪರೀಕ್ಷೆಗೆ ಸಂಬಂಧಿಸಿ ಅಧಿಸೂಚನೆ ಹೊರಡಿಸಬೇಕು ಎಂದು ನ್ಯಾಯಮೂರ್ತಿಗಳಾದ ಎ.ಎಂ.ಖಾನ್‌ವಿಲ್ಕರ್‌ ಮತ್ತು ಸಂಜೀವ್‌ ಖನ್ನಾ ಅವರಿದ್ದ ನ್ಯಾಯಪೀಠವು ಅನುಮತಿ ನೀಡಿತು.

ಕೇಂದ್ರ ಸರ್ಕಾರ ಮತ್ತು ಸಿಬಿಎಸ್‌ಇ ಪರವಾಗಿ ವಿಷಯ ತಿಳಿಸಿದ ಸಾಲಿಸಿಟರ್ ಜನರಲ್‌ ತುಷಾರ್ ಮೆಹ್ತಾ ಅವರು, ‘ಅಧಿಸೂಚನೆ ಹೊರಡಿಸಲಾಗುವುದು. ಮಂಡಳಿಯ ವೆಬ್‌ಸೈಟ್‌ನಲ್ಲೂ ಈ ವಿವರಗಳನ್ನು ಪ್ರಕಟಿಸಲಾಗುವುದು’ ಎಂದರು.

‘ಬಹುತೇಕ ಜುಲೈ ಎರಡನೇ ವಾರದ ವೇಳೆಗೆ ಫಲಿತಾಂಶಗಳನ್ನು ಪ್ರಕಟಿಸಲಾಗುವುದು’ ಎಂದು ಸಿಬಿಎಸ್‌ಇ ಮತ್ತು ಐಸಿಎಸ್‌ಇ ಎರಡೂ ಮಂಡಳಿಗಳವಕೀಲರು ಇದೇ ಸಂದರ್ಭದಲ್ಲಿ ಸುಪ್ರೀಂ ಕೋರ್ಟ್‌ಗೆ ಮಾಹಿತಿ ನೀಡಿದರು.

ಐಸಿಎಸ್‌ಇ ಪರ ಹಾಜರಿದ್ದ ವಕೀಲರು, ‘ಸಿಬಿಎಸ್‌ಇ ಅನುಸರಿಸುವ ಕ್ರಮವನ್ನೇ ಬಹುತೇಕ ಐಸಿಎಸ್ಇ ಅನುಸರಿಸಲಿದೆ. ಆದರೆ, ಸರಾಸರಿ ಸೂತ್ರ ಭಿನ್ನವಾಗಿರಲಿದೆ. 10ನೇ ತರಗತಿಗೆ ಮರು ಪರೀಕ್ಷೆ ನಡೆಸುವ ಸಾಧ್ಯತೆಗಳನ್ನು ಪರಿಶೀಲಿಸಲಾಗುವುದು. ಈ ಬಗ್ಗೆ ವಾರದಲ್ಲಿ ಅಧಿಸೂಚನೆ ಹೊರಡಿಸಲಾಗುವುದು’ ಎಂದು ತಿಳಿಸಿದರು.

ಕೋವಿಡ್ ಹಿನ್ನೆಲೆಯಲ್ಲಿ ಜುಲೈ 1 ರಿಂದ 15ರವರೆಗೆ ನಡೆಸಲು ಉದ್ದೇಶಿಸಲಾಗಿದ್ದ ಪರೀಕ್ಷೆಗಳನ್ನು ರದ್ದುಪಡಿಸಲಾಗಿದೆ ಎಂದು ಗುರುವಾರವಷ್ಟೇ ಸಿಬಿಎಸ್‌ಇ ಮತ್ತು ಕೇಂದ್ರ ಸರ್ಕಾರ ಸುಪ್ರೀಂ ಕೋರ್ಟ್‌ಗೆ ಮಾಹಿತಿಯನ್ನು ನೀಡಿತ್ತು.

ಸಿಬಿಎಸ್‌ಇ ಮಾನದಂಡಗಳೇನು?

* 10 ಮತ್ತು 12ನೇ ತರಗತಿಗಳ ಪರೀಕ್ಷೆಯಲ್ಲಿ ಎಲ್ಲ ವಿಷಯಗಳಿಗೆ ಹಾಜರಾಗಿರುವ ವಿದ್ಯಾರ್ಥಿಗಳ ಫಲಿತಾಂಶವನ್ನು ಅವರ ಸಾಧನೆ ಆಧರಿಸಿ ಪ್ರಕಟಿಸಲಾಗುವುದು.

* 3ಕ್ಕಿಂತಲೂ ಹೆಚ್ಚು ವಿಷಯಗಳಿಗೆ ಹಾಜರಾಗಿದ್ದಲ್ಲಿ ಅತ್ಯುತ್ತಮ ಅಂಕ ಪಡೆದಿರುವ ಮೂರು ವಿಷಯಗಳ ಸರಾಸರಿ ಅಂಕವನ್ನು, ಪರೀಕ್ಷೆ ರದ್ದಾಗಿರುವ ವಿಷಯಗಳಿಗೂ ನಿಗದಿ ಪಡಿಸಲಾಗುವುದು.

* ಮೂರು ವಿಷಯಗಳ ಪರೀಕ್ಷೆಗಷ್ಟೇ ಹಾಜರಾಗಿದ್ದಲ್ಲಿ ಅತ್ಯುತ್ತಮ ಅಂಕ ಪಡೆದಿರುವ ಎರಡು ವಿಷಯಗಳ ಸರಾಸರಿ ಅಂಕವನ್ನು, ಪರೀಕ್ಷೆ ರದ್ದಾಗಿರುವ ವಿಷಯಗಳಿಗೆ ನಿಗದಿಪಡಿಸಲಾಗುತ್ತದೆ.

* ಕೆಲವೇ ವಿದ್ಯಾರ್ಥಿಗಳು ಮುಖ್ಯವಾಗಿ ದೆಹಲಿಯಲ್ಲಿ ಒಂದು ಅಥವಾ ಎರಡು ವಿಷಯಗಳ ಪರೀಕ್ಷೆಗಳಿಗೆ ಹಾಜರಾಗಿದ್ದಾರೆ. ಇವರ ಫಲಿತಾಂಶವನ್ನು ಹಾಜರಾದ ವಿಷಯಗಳಲ್ಲಿ ಅವರ ಸಾಧನೆ, ಆಂತರಿಕ ಮೌಲ್ಯಮಾಪನ, ಪ್ರಾಯೋಗಿಕ ಯೋಜನೆಗಳ ಅಂಕಗಳನ್ನು ಆಧರಿಸಿ ನಿಗದಿಪಡಿಸಲಾಗುವುದು.ಇಂಥ ವಿದ್ಯಾರ್ಥಿಗಳಿಗೆ ತಮ್ಮ ಸಾಧನೆ ಉತ್ತಮಪಡಿಸಿಕೊಳ್ಳಲು ಸಿಬಿಎಸ್‌ಇ ನಡೆಸಲಿರುವ ಪರ್ಯಾಯ ಪರೀಕ್ಷೆಗೆ ಹಾಜರಾಗುವ ಅವಕಾಶ ಸಿಗಲಿದೆ.

* ಈ ಎಲ್ಲ ವಿದ್ಯಾರ್ಥಿಗಳ ಫಲಿತಾಂಶವನ್ನು ಒಟ್ಟಿಗೇ ಪ್ರಕಟಿಸಲಾಗುತ್ತದೆ. 12ನೇ ತರಗತಿ ವಿದ್ಯಾರ್ಥಿಗಳಿಗಷ್ಟೇ ನಂತರ ಮರು ಪರೀಕ್ಷೆಗೆ ಹಾಜರಾಗುವ ಅಥವಾ ಹಿಂದಿನ ಪರೀಕ್ಷೆಗಳ ಸಾಧನೆಗಳನ್ನು ಆಧರಿಸಿ ಫಲಿತಾಂಶವನ್ನು ಪಡೆಯುವ ಆಯ್ಕೆಯನ್ನು ನೀಡಲಾಗುತ್ತದೆ.