ಗುರುವಾರ, 28 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಮರೆವು ಕಾಯಿಲೆ ನಿಗ್ರಹಕ್ಕೊಂದು ಸಂಶೋಧನೆ

Last Updated 1 ಏಪ್ರಿಲ್ 2018, 19:30 IST
ಅಕ್ಷರ ಗಾತ್ರ

ವಯಸ್ಸು ಹೆಚ್ಚಾಗುತ್ತಾ ಸಾಗಿದಾಗ, ಸ್ಮರಣೆಯು ಇಳಿಜಾರಿನ ಕಡೆಗೆ ಹೊರಳಲು ಆರಂಭಿಸುತ್ತದೆ. ಆದರೆ, ಬದುಕಿನ ಅತ್ಯಂತ ಮೂಲ ವಿಷಯಗಳನ್ನೇ ಮರೆತುಬಿಡುವುದು ಎಂದರೆ ಸುಮ್ಮನೆಯಾ? ತಿನ್ನುವುದು, ಮಾತನಾಡುವುದು, ಕುಟುಂಬದ ಸದಸ್ಯರ ಹೆಸರುಗಳನ್ನೇ ಮರೆಯುವಷ್ಟು ಸ್ಮರಣೆಯ ಸಮಸ್ಯೆ ಉಂಟಾದರೆ ಆ ಸ್ಥಿತಿಯನ್ನು ಬಹಳ ಗಂಭೀರವಾದ ಮಾನಸಿಕ ವ್ಯಾಧಿ ಎಂದು ಪರಿಗಣಿಸಲಾಗುತ್ತದೆ.

ಈ ಗಂಭೀರ ಮರೆಗುಳಿತನದ ಅತ್ಯಂತ ಸಾಮಾನ್ಯ ವಿಧ-ಅಲ್ಝೈಮರ್‌ (Alzheimer) ಕಾಯಿಲೆ. ಇದು ಚಿಕಿತ್ಸೆ ಇಲ್ಲದ ಒಂದು ರೋಗವಾಗಿದ್ದು, ಸುಮಾರು 16 ಲಕ್ಷ ಹಿರಿಯರು ಬಳಲುತ್ತಿದ್ದಾರೆ. ಈ ರೋಗವನ್ನು ಸಂಪೂರ್ಣವಾಗಿ ಗುಣಪಡಿಸಲು ಸಾಧ್ಯವಿಲ್ಲದಿದ್ದರೂ, ಮೊದಲ ಹಂತಗಳಲ್ಲೇ ಪತ್ತೆಹಚ್ಚಲು ಸಾಧ್ಯವಾದರೆ, ಸೂಕ್ತ ಔಷಧೋಪಚಾರದ ಸಹಾಯದಿಂದ ತಕ್ಕಮಟ್ಟಿಗೆ ಈ ರೋಗವನ್ನು ನಿಯಂತ್ರಿಸಬಹುದು. ಅದೇ ನಿಟ್ಟಿನಲ್ಲಿ ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ ಸಂಶೋಧಕರು ಸಂಶೋಧನೆ ಕೈಗೊಂಡಿದ್ದು, ಅಧ್ಯಯನವು ಹೊಸ ಒಳನೋಟಗಳನ್ನು ತೆರೆದಿಟ್ಟಿದೆ.

1906ರಲ್ಲಿ ಡಾ.ಅಲೊಯಿಸ್ ಅಲ್ಝೈಮರ್ ವ್ಯಾಖ್ಯಾನಿಸಿದ್ದ ಈ ಕಾಯಿಲೆಗೆ, ಒಂದು ಶತಮಾನದ ನಂತರವೂ ವಿಜ್ಞಾನಿಗಳು ಇನ್ನೂ ಚಿಕಿತ್ಸೆಗಾಗಿ ಹುಡುಕಾಟ ನಡೆಸಿದ್ದಾರೆ. ಆದರೆ, ಮಿದುಳಿನಲ್ಲಿ ಕಂಡುಬರುವ ಅಸಹಜತೆಯನ್ನು ಜೀವಕೋಶ ಮತ್ತು ಆನುವಂಶಿಕ ನೆಲೆಗಟ್ಟಿನಲ್ಲಿ ಅರ್ಥೈಸಿಕೊಳ್ಳುವ ಮಟ್ಟದಲ್ಲಿ ವಿಜ್ಞಾನ ಕ್ಷೇತ್ರ ಮುಂದುವರೆದಿರುವುದು ಹೊಸ ಭರವಸೆ ನೀಡುತ್ತದೆ.

’ಅಲ್ಝೈಮರ್‌ನ ರೋಗದಲ್ಲಿ ಕಣ್ಣಿಗೆ ಕಾಣುವಂತೆ ರೋಗಲಕ್ಷಣಗಳು ಗೋಚರಿಸುವುದಕ್ಕೂ ಕನಿಷ್ಠ ಎರಡು ದಶಕಗಳ ಮೊದಲೇ, ಆಣ್ವಿಕ ಮಟ್ಟದಲ್ಲಿ ಬದಲಾವಣೆ ಪ್ರಾರಂಭವಾಗಿರುತ್ತದೆ ಎಂದು ವಿಶ್ವದಾದ್ಯಂತ ನಡೆದ ಸಂಶೋಧನೆ ಬಹಿರಂಗಪಡಿಸಿದೆ’ ಎನ್ನುತ್ತಾರೆ ಪ್ರಾಧ್ಯಾಪಕಿ ವಿಜಯಲಕ್ಷ್ಮಿ ರವೀಂದ್ರನಾಥ್.

'ದಿ ಜರ್ನಲ್ ಆಫ್ ನ್ಯೂರೊಸೈನ್ಸ್'ನಲ್ಲಿ ಪ್ರಕಟವಾದ ಈ ಅಧ್ಯಯನದಲ್ಲಿ, ಸಂಶೋಧಕರು ಮೊದಲ ಬಾರಿಗೆ, ಒಂದು ಬಗೆಯ ಕೋಶಕವಚದ ಪ್ರೊಟೀನ್‌ನ ನಷ್ಟವು, ಅಲ್ಝೈಮರ್‌ನ ಕಾಯಿಲೆಯಲ್ಲಿ ಕಂಡುಬರುವ ಅರಿವಿನ ಅಸಮರ್ಪಕತೆಗೆ ಕಾರಣ ಎಂದು ತೋರಿಸಿದ್ದಾರೆ. ’ಅಲ್ಝೈಮರ್ ರೋಗದ ಪ್ರಗತಿಯ ಅವಧಿಯಲ್ಲಿ, ಅಣುಗಳ ಬದಲಾವಣೆಗಳು ಎಷ್ಟು ಶೀಘ್ರದಲ್ಲಿ ಸಂಭವಿಸುತ್ತವೆ ಎಂದು ನಾವು ಕಂಡುಕೊಳ್ಳಲು ಪ್ರಯತ್ನಿಸಿದ್ದೇವೆ. ಈ ಬದಲಾವಣೆಗಳ ಬಗೆಗಿನ ಜ್ಞಾನವನ್ನು ಮೊದಲ ಹಂತಗಳಲ್ಲಿ ಬೇಕಾಗುವ ರೋಗ ನಿರ್ಣಯ ಪರೀಕ್ಷೆಗಳನ್ನು ಅಭಿವೃದ್ಧಿಪಡಿಸಲು ಬಳಸಲಾಗುತ್ತದೆ’ ಎನ್ನುತ್ತಾರೆ ಡಾ. ವಿಜಯಲಕ್ಷ್ಮಿ.

ಮಿದುಳನ್ನೂ ಸೇರಿದಂತೆ, ನಮ್ಮ ನರಮಂಡ ಲವು 'ನ್ಯೂರಾನ್' ಅಥವಾ 'ನರಕೋಶಿಕೆ' ಎಂಬ 100 ಶತಕೋಟಿ ನರಕೋಶಗಳಿಂದ ಮಾಡಲ್ಪಟ್ಟಿದೆ. ಈ ಪ್ರತಿಯೊಂದು ನರಕೋಶವೂ ಜೀವಕೋಶೀಯ ದೇಹವನ್ನು, ’ಅಕ್ಸಾನ್’ ಎಂಬ ಉದ್ದನೆಯ ಬಾಲದಂಥ ರಚನೆಯನ್ನು ಮತ್ತು ’ಡೆಂಡ್ರೈಟ್’ ಎಂಬ ರೆಂಬೆಕೊಂಬೆಗಳಂತೆ ಹರಡಿಕೊಂಡಿರುವ ರಚನೆಗಳನ್ನು ಹೊಂದಿರುತ್ತದೆ. ಈ ಡೆಂಡ್ರೈಟ್‌ಗಳು ಅಂದರೆ ನರ ಕವಲುಗಳು, ನೆರೆಹೊರೆಯ ನರಕೋಶಿಕೆಗಳ ಆಕ್ಸಾನ್‌ಗಳಿಂದ ಮಾಹಿತಿಯನ್ನು ಸಂಗ್ರಹಿಸುತ್ತವೆ. ಈ ನರಕವಲುಗಳಿಂದ ಹೊರಬಂದಿರುವ ಸಣ್ಣ ಮುಂಚಾಚುವಿಕೆಗಳೇ, ಮಾಹಿತಿ ಪಡೆಯುವ ಕೇಂದ್ರಗಳು. ಅವು ಪ್ರಾಥಮಿಕವಾಗಿ 'ಆಕ್ಟಿನ್' ಎಂಬ ಕೋಶಕವಚೀಯ ಪ್ರೊಟೀನ್‌ನ ಮೂಲಕ ಕಾರ್ಯನಿರ್ವಹಿಸುತ್ತವೆ.

ನರಕೋಶಗಳಲ್ಲಿ, ಆಕ್ಟಿನ್ ಎಂಬ ಈ ಬಹುಮುಖ್ಯ ಪ್ರೊಟೀನ್ ಗ್ಲೋಬುಲರ್ ಆಕ್ಟಿನ್ (ಜಿ-ಆಕ್ಟಿನ್) ಮತ್ತು ಫಿಲಮೆಂಟಸ್ ಆಕ್ಟಿನ್ (ಎಫ್-ಆಕ್ಟಿನ್) ಎಂಬ ಎರಡು ಸ್ಥಿತಿಗಳಲ್ಲಿ ಅಸ್ತಿತ್ವದಲ್ಲಿದೆ. ತಂತು ಆಕಾರದ ಎಫ್-ಆಕ್ಟಿನ್ ಪ್ರೊಟೀನ್‌ನ ಕೆಲಸ, ನರಕವಲುಗಳ ಮುಂಚಾಚುವಿಕೆಯ ಸ್ವರೂಪವನ್ನು ಮತ್ತು ಸ್ಮರಣೆಯನ್ನು ಕಾಪಾಡಿಕೊಳ್ಳುವುದು. ಅನೇಕ ಜಿ-ಆಕ್ಟಿನ್ ಪ್ರೊಟೀನ್‌ ಅಣುಗಳು ಸೇರಿ ಎಫ್-ಆಕ್ಟಿನ್‌ನ್ನು ರೂಪಿಸುತ್ತವೆ. ಹೆಚ್ಚು ಎಫ್-ಆಕ್ಟಿನ್ ಅಣುಗಳಿದ್ದರೆ ಮಿದುಳಿನ ಚಟುವಟಿಕೆಯು ಉತ್ತಮವಾಗಿರುತ್ತದೆ ಎಂದು ಅಧ್ಯಯನಗಳು ತೋರಿಸಿವೆ. ಆದ್ದರಿಂದ, ನರಕೋಶಗಳಲ್ಲಿ ಈ ಎರಡೂ ಪ್ರೊಟೀನ್ ಅಣುಗಳ ಆರೋಗ್ಯಕರ ಸಂಖ್ಯೆಯನ್ನು ಕಾಪಾಡಿಕೊಳ್ಳುವುದು ಡೆಂಡ್ರೈಟ್‌ಗಳ ಕಾರ್ಯನಿರ್ವಹಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಈ ಅಧ್ಯಯನದ ಮೂಲಕ, ಎಫ್-ಆಕ್ಟಿನ್ ಪ್ರೊಟೀನ್‌ನ ನಷ್ಟವು, ಅಲ್ಝೈಮರ್ ಕಾಯಿಲೆಗೆ ಕಾರಣವಾಗಬಹುದೆಂದು ಸಂಶೋಧಕರು ಕಂಡುಕೊಂಡಿದ್ದಾರೆ.

ಸಂಶೋಧಕರು, ಇಲಿಗಳ ಮಿದುಳಿನ ಜೀವಕೋಶಗಳಲ್ಲಿ ಮತ್ತು ಅಲ್ಝೈಮನ್‌ನಿಂದ ಬಳಲುತ್ತಿರುವ ಮನುಷ್ಯರ ಮಿದುಳಿನಲ್ಲಿ ಎಫ್-ಅಕ್ಟಿನ್ ಮತ್ತು ಜಿ-ಆಕ್ಟಿನ್ ಮಟ್ಟ ಅಧ್ಯಯನ ಮಾಡಿದರು. ಅವರು ಎಫ್-ಅಕ್ಟಿನ್ ಅಣುಗಳ ರಚನೆ ಮತ್ತು ಸಂಯೋಜನೆಯಲ್ಲಿನ ಬದಲಾವಣೆಯನ್ನು ತನಿಖೆ ಮಾಡಲು, ಜೀವರಾಸಾಯನಿಕ ಮತ್ತು ನಡವಳಿಕೆಯ ಪ್ರಯೋಗಗಳನ್ನು ನಡೆಸಿದರು. ಇದರ ಪರಿಣಾಮವಾಗಿ ಆಗುವ ಬದಲಾವಣೆಗಳು ನೇರವಾಗಿ ಸ್ಮರಣಶಕ್ತಿಯ ಮೇಲೆ ಪರಿಣಾಮ ಬೀರಿದೆಯೇ ಎಂದು ಕೂಲಂಕಷವಾಗಿ ಗಮನಿಸಿದರು. ಒಂದು ವಿಶೇಷ ಬಗೆಯ ಸೂಕ್ಷ್ಮದರ್ಶಕವು ನರಕೋಶಗಳಲ್ಲಿನ ಎಫ್-ಆಕ್ಟಿನ್‌ನ ತೀವ್ರತರವಾದ ವಿಘಟನೆಯನ್ನು ವೀಕ್ಷಿಸಲು ವಿಜ್ಞಾನಿಗಳಿಗೆ ಸಹಾಯ ಮಾಡಿತು.

ಇಲಿಗಳ ಮಿದುಳಿನ ಜೀವಕೋಶಗಳಲ್ಲಿ, ಎಫ್-ಆಕ್ಟಿನ್ ವಿಭಜನೆಯಾದಾಗ, ನರಕವಲುಗಳ ಮುಂಚಾಚುವಿಕೆಯ ವಾಸ್ತುಶಿಲ್ಪವೇ ಬದಲಾಯಿತು ಎಂದು ಫಲಿತಾಂಶಗಳು ತೋರಿಸಿಕೊಟ್ಟವು. ಅಲ್ಝೈಮನ್‌ನ ಲಕ್ಷಣಗಳು ಸಾಮಾನ್ಯವಾಗಿ ಏಳು ಅಥವಾ ಒಂಬತ್ತು ತಿಂಗಳ ನಂತರ ಕಾಣಿಸಿಕೊಳ್ಳುತ್ತವೆ. ಆದರೆ, ಇಲ್ಲಿ ಒಂದು ತಿಂಗಳಿನಲ್ಲೇ ಬದಲಾವಣೆ ಕಂಡುಬಂತು. ಎಫ್-ಆಕ್ಟಿನ್‌ನ ವಿಭಜನೆಯನ್ನು ನಿಲ್ಲಿಸಲು ಸಂಶೋಧಕರು ಸ್ಥಿರವಾದ ರಾಸಾಯನಿಕವನ್ನು ಬಳಸಿದಾಗ, ಧನಾತ್ಮಕ ಫಲಿತಾಂಶವೂ ಕಂಡುಬಂತು. ಹಾಗೆಯೇ, ಎಫ್-ಆಕ್ಟಿನ್‌ನ ವಿಭಜನೆಯನ್ನು ಹೆಚ್ಚಿಸಲು ರಾಸಾಯನಿಕವನ್ನು ಬಳಸಿದಾಗ, ಇಲಿಗಳ ವರ್ತನೆಯಲ್ಲಿ ಅಲ್ಝೈಮರ್‌ನ ಗುಣಲಕ್ಷಣಗಳು ಕಂಡುಬಂತು ಎಂದು ಸಂಶೋಧಕರು ಗಮನಿಸಿದ್ದಾರೆ.

ಸಾಮಾನ್ಯ ಮನುಷ್ಯರ ಮಿದುಳಿನಲ್ಲಿನ ಎಫ್-ಆಕ್ಟಿನ್ ಮಟ್ಟಕ್ಕೆ ಹೋಲಿಸಿದರೆ ಅಲ್ಝೈಮರ್‌ನ ರೋಗಿಗಳಲ್ಲಿ ಎಫ್-ಆಕ್ಟಿನ್ ಮಟ್ಟ ಕಡಿಮೆ ಎಂದು ಸಂಶೋಧಕರು ಗಮನಿಸಿದ್ದಾರೆ. ಈ ರೋಗದ ಪ್ರಕ್ರಿಯೆಯಲ್ಲಿ ಬಹಳ ಮುಂಚಿನ ಹಂತದಲ್ಲೇ ಎಫ್-ಆಕ್ಟಿನ್‌ಗೆ ಯಾವುದೇ ರೀತಿಯ ಹಾನಿ ಉಂಟಾದರೆ ಕಂಡುಕೊಳ್ಳಬಹುದು ಎಂದು ಅವರು ಪ್ರತಿಪಾದಿಸಿದ್ದಾರೆ.

‘ಈ ಕಾಯಿಲೆಯಲ್ಲಿ, ಮಿದುಳಿನಲ್ಲಿ ಉಂಟಾಗುತ್ತಿರುವ ಅಸಹಜತೆಯ ಆರಂಭಿಕ ಸೂಚಕವಾಗಿ ಎಫ್-ಆಕ್ಟಿನ್‌ನ ವಿಭಜನೆಯನ್ನು ಮಾನದಂಡವಾಗಿ ಇರಿಸಿಕೊಳ್ಳಬಹುದು ಎಂದು ನಮ್ಮ ಅಧ್ಯಯನವು ತೋರಿಸಿಕೊಟ್ಟಿದೆ. ಹಾಗಾಗಿ, ಇದರ ಮೂಲಕ ಕಾಯಿಲೆಯನ್ನು ಮೊದಲ ಹಂತದಲ್ಲೇ ಗುರುತಿಸಬಹುದಾಗಿದೆ’ ಎನ್ನುತ್ತಾರೆ ಡಾ.ವಿಜಯಲಕ್ಷ್ಮಿ.

ಗುಬ್ಬಿ ಲ್ಯಾಬ್ಸ್‌
(ಸಂಶೋಧನಾ ಚುಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿರುವ ಸಾಮಾಜಿಕ ಉದ್ಯಮ)

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT