ರಕ್ಷಣಾ ಇಲಾಖೆ ಭೂಮಿಯ ರಕ್ಷಣೆ ಅತ್ಯಗತ್ಯ: ರಕ್ಷಣಾ ಸಚಿವೆ

‘ರಕ್ಷಣಾ ಇಲಾಖೆ ಭೂಮಿ ಇರುವ ಸುತ್ತಮುತ್ತಲಿನ ಪ್ರದೇಶಗಳಿಂದ ಒತ್ತುವರಿಯಾಗುವ ಸಂಭವ ಹೆಚ್ಚಿರುತ್ತದೆ. ಒಮ್ಮೆ ಒತ್ತುವರಿಯಾದರೆ ಬಳಿಕ ತೆರವುಗೊಳಿಸಲು ಸಂಬಂಧಪಟ್ಟ ಎಲ್ಲರೂ ಸಾಕಷ್ಟು ಕಷ್ಟಪಡಬೇಕಾಗುತ್ತದೆ’ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ರಕ್ಷಣಾ ಪ್ರದೇಶಗಳ ಪ್ರಧಾನ ನಿರ್ದೇಶನಾಲಯ (ಡಿಜಿಡಿಇ) ಆಯೋಜಿಸಿದ್ದ, ‘2018ರ ಸಾಧನೆಗೆ ರಕ್ಷಾ ಮಂತ್ರಿ ಪ್ರಶಸ್ತಿ’ ವಿತರಣೆ ಸಮಾರಂಭದಲ್ಲಿ ಮಾತನಾಡಿದ ಅವರು ‘ರಕ್ಷಣಾ ಇಲಾಖೆಯ ಯಾವುದೇ ಭೂಮಿ ಒತ್ತುವರಿಗೊಳ್ಳದಂತೆ ನೋಡಿಕೊಳ್ಳಲು ಸೇನಾಧಿಕಾರಿಗಳು ಹಾಗೂ ಮುನ್ಸಿಪಲ್ ಅಧಿಕಾರಿಗಳ ನಡುವೆ ಹೆಚ್ಚಿನ ಸಾಮರಸ್ಯ ಅವಶ್ಯ’ ಎಂದು ತಿಳಿಸಿದ್ದಾರೆ.

‘ದೇಶದ ಗಡಿ ರಕ್ಷಣೆ ಎಷ್ಟು ಮುಖ್ಯವೋ ರಕ್ಷಣಾ ಇಲಾಖೆಯ ಭೂಮಿಗಳನ್ನು ಕಾಪಾಡಿಕೊಳ್ಳುವುದು ಸಹ ಅಷ್ಟೇ ಮುಖ್ಯ. ಹಲವು ಲಕ್ಷ ಎಕರೆ ಜಾಗಗಳು ಡಿಜಿಡಿಇ ವ್ಯಾಪ್ತಿಗೆ ಬರುತ್ತವೆ. ಇವು ಸಾಕಷ್ಟು ದೂರ ದೂರದಲ್ಲಿ ಹಾಗೂ ದೇಶದ ಒಳನಾಡುಗಳಲ್ಲಿ ಇರಬಹುದು. ಆದರೆ ತುರ್ತು ಪರಿಸ್ಥಿತಿ ಎದುರಿಸಲು, ದೇಶದ ರಕ್ಷಣೆಗಾಗಿ ಹಾಗೂ ಯೋಧರನ್ನು ನಿಯೋಜಿಸಲು ರಕ್ಷಣಾ ಸ್ವತ್ತುಗಳು ಎಲ್ಲೆಡೆ ಇರುವುದು ಮುಖ್ಯ’ ಎಂದು ಅವರು ಹೇಳಿದ್ದಾರೆ.