ಮದುವೆ ಮನೆ ಸಂಭ್ರಮ ಮೂಡಿಸಿದ ‘ಮತದಾನ’

ಗದ್ದಲ, ಪೈಪೋಟಿ, ಆರೋಪ–ಪ್ರತ್ಯಾರೋಪಗಳ ನಡುವಿನ ಗೊಂದಲದ ಚುನಾವಣೆಗಳನ್ನು ಕಂಡ ಮತದಾರರಿಗೆ ಶನಿವಾರ ಮಾದರಿ ಮತಗಟ್ಟೆಗಳು, ಸಖಿ (ಪಿಂಕ್) ಮತಗಟ್ಟೆಗಳು, ಅಂಗವಿಕಲರಿಗೆ ತ್ರಿಚಕ್ರ ವಾಹನ, ಮತಗಟ್ಟೆಗೆ ಸಿಂಗಾರ, ಮೂಲ ಸೌಕರ್ಯ ಹುರುಪು ಮೂಡಿಸಿದವು.

ಕಳೆದೊಂದು ತಿಂಗಳಿನಿಂದ ನಡೆದ ಜಿಲ್ಲಾಡಳಿತ ಮತ್ತು ಸ್ವೀಪ್‌ನ ಜಾಗೃತಿ ಕಾರ್ಯಕ್ರಮಗಳು ಜನರನ್ನು ಸೆಳೆದಿತ್ತು. ಅಲ್ಲದೇ, 2018 ಜನವರಿ 1ರ ಬಳಿಕ ಸತತ ಅಭಿಯಾನದ ಮೂಲಕ 19,706 ಹೊಸ ಮತದಾರರನ್ನು ಸೇರ್ಪಡೆ ಮಾಡುವಲ್ಲೂ ಜಿಲ್ಲಾಡಳಿತ ಯಶಸ್ವಿಯಾಗಿತ್ತು. ಈ ಪೈಕಿ ಹಾನಗಲ್‌ ಕ್ಷೇತ್ರದಲ್ಲಿ 3,529 (ಗರಿಷ್ಠ)ಹಾಗೂ ಹಿರೇಕೆರೂರಿನಲ್ಲಿ 2,029 (ಕನಿಷ್ಠ) ಮತದಾರರು ಸೇರ್ಪಡೆಗೊಂಡಿದ್ದರು. 34 ಲಿಂಗತ್ವ ಅಲ್ಪಸಂಖ್ಯಾತರೂ ನೋಂದಾಯಿಸಿಕೊಂಡಿದ್ದರು.

ಡಿ.ಸಿ, ಜಿಲ್ಲಾ ಪಂಚಾಯ್ತ ಸಿಇಒ, ಎಡಿಸಿ ಸೇರಿದಂತೆ ಹಿರಿಯ ಅಧಿಕಾರಿಗಳು ರೈಲು, ಬಸ್‌ಗಳು, ಸಂತೆ, ಮಾರುಕಟ್ಟೆ, ಬೀದಿ ವ್ಯಾಪಾರ, ಮಹಿಳೆಯರು, ಲಿಂಗತ್ವ ಅಲ್ಪಸಂಖ್ಯಾತರು, ವ್ಯಾಪಾರಿಗಳು ಸೇರಿದಂತೆ ಸಮಾಜದ ವಿವಿಧ ವರ್ಗಗಳು, ಪ್ರದೇಶಗಳಲ್ಲಿ ಜಾಗೃತಿ ಮೂಡಿಸಿದ್ದರು. ನಾಮಪತ್ರ ಸಲ್ಲಿಕೆಯ ಮೊದಲಿನ ಅವಧಿಯಲ್ಲಿ ಅಭ್ಯರ್ಥಿಗಳಿಗಿಂತ ಅಧಿಕಾರಿಗಳೇ ಹೆಚ್ಚು ಪ್ರಚಾರದಲ್ಲಿದ್ದರು.

ಇದರ ಜೊತೆ ಭದ್ರತೆ, ಮತದಾರರ ಪಟ್ಟಿಯಲ್ಲಿ ಹೆಸರಿನ ಸಮಸ್ಯೆ, ತಾಂತ್ರಿಕ ಸಮಸ್ಯೆ, ಮೂಲಸೌಕರ್ಯಗಳು, ಸಿಬ್ಬಂದಿ ತರಬೇತಿ, ಸಾರ್ವಜನಿಕ ಸಂಪರ್ಕ ವಿಭಾಗದ ಸಮಸ್ಯೆಗಳೂ ಬಗೆಹರಿದಿದ್ದವು. ಆಯೋಗವೇ ಮತದಾರರಿಗೆ ಚೀಟಿ ನೀಡಿರುವುದು, ಅಂಗವಿಕಲರು, ವೃದ್ಧರಿಗೆ ನೆರವು, ವಿಶ್ರಾಂತಿ ವ್ಯವಸ್ಥೆಗಳು ಗೊಂದಲಗಳನ್ನು ಕಡಿಮೆ ಮಾಡಿತ್ತು. ಹೀಗಾಗಿ, ಮತಗಟ್ಟೆಗಳು ‘ಮದುವೆ ಮನೆ’ಯಂತೆ ಸಂಬಂಧ ಬೆಸೆದವು.

ಮಾದರಿ ಮತಗಟ್ಟೆಗೆ ಶ್ಲಾಘನೆ: ಹಳೇ ಜಿಲ್ಲಾ ಪಂಚಾಯ್ತಿ ಆವರಣದ ಮಾದರಿ ಮತಗಟ್ಟೆಯು ಗಮನಸೆಳೆಯಿತು. ಇಲ್ಲಿ ಬೆಳಿಗ್ಗೆ ಮತದಾನ ಮಾಡಿದ ಸಾಹಿತಿ ವಿರೂಪಾಕ್ಷಪ್ಪ ಕೋರಗಲ್ ‘ಪ್ರಜಾವಾಣಿ’ ಜೊತೆ ಮಾತನಾಡಿ, ‘ನಾನು 1957ರಿಂದ ಮತದಾನ ಮಾಡುತ್ತಿದ್ದೇನೆ. ಪ್ರತಿಬಾರಿ ನಮ್ಮ ಹಕ್ಕನ್ನು ಚಲಾಯಿಸಬೇಕು ಎಂಬ ಎಚ್ಚರಿಕೆಯಿಂದ ಬರುತ್ತಿದ್ದೆವು. ಕಿರಿಕಿರಿಗಳ ನಡುವೆ ಮತ ಚಲಾಯಿಸುತ್ತಿದ್ದೆವು. ಈ ಬಾರಿ ಜಿಲ್ಲಾಡಳಿತವು ಮದುವೆಯ ವಾತಾವರಣ ಸೃಷ್ಟಿಸಿದೆ’ ಎಂದರು.

‘ನಾನು, ಪತ್ನಿ (ಲೀಲಾವತಿ), ಮಗಳು (ನಂದಿನಿ) ಸಂಬಂಧಿಕರ ಮದುವೆಗೆ ಬಂದ ಖುಷಿಯಲ್ಲಿ ಮತ ಚಲಾಯಿಸಿದ್ದೇವೆ. ಯಾರೇ ಗೆಲ್ಲಲಿ, ಪ್ರಜಾಪ್ರಭುತ್ವ ಸುಭದ್ರವಾಗಲಿ. ಜಿಲ್ಲಾಡಳಿತ, ನೇತೃತ್ವ ವಹಿಸಿದ ಡಿ.ಸಿ. ಹಾಗೂ ಅಧಿಕಾರಿಗಳಿಗೆ ಹ್ಯಾಟ್ಸ್‌ ಅಪ್‌‘ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಜಿಲ್ಲೆಯ 14 ಪಿಂಕ್ ಮತಗಟ್ಟೆಗಳು ಗಮನ ಸೆಳೆದವು. ಇಲ್ಲಿ ಮಕ್ಕಳಿಗೆ ಆಟಿಕೆ, ಕುಡಿಯಲು ನೀರು, ಸೆಲ್ಫಿ ಸ್ಟ್ಯಾಂಡ್, ಅಂಗವಿಕಲರ ಕುರ್ಚಿ ಸೇರಿದಂತೆ ವಿವಿಧ ಸೌಲಭ್ಯಗಳನ್ನು ಕಲ್ಪಿಸಿದ್ದು, ಆಕರ್ಷಿಸಿದವು. ಅಂಗವಿಕಲರಿಗೆ ಹಾಗೂ ವೃದ್ಧರಿಗೆ ಗಾಲಿ ಕುರ್ಚಿ ಹಾಗೂ ಸಹಾಯಕ್ಕಾಗಿ ಆಶಾ ಮತ್ತು ಅಂಗನನವಾಡಿ ಕಾರ್ಯಕರ್ತರನ್ನು ನಿಯೋಜಿಸಲಾಗಿತ್ತು.

‘ಈ ಹಿಂದೆ ಯಾರದೋ ಒತ್ತಡಕ್ಕೆ ಬಂದು ಹೋಗುತ್ತಿದ್ದೆವು. ಈಗ, ನಮಗೇ ಮತದಾನದ ಖುಷಿಯಾಗುತ್ತಿದೆ’ ಎಂದು ಶಿಗ್ಗಾವಿಯಲ್ಲಿ ನೀಲವ್ವ ತಿಳಿಸಿದರು.

ಪೆಟ್ರೋಲ್ ರಿಯಾಯಿತಿ

ಹಾವೇರಿಯ ಎಚ್‌ಪಿ– ಹಿರೇಗೌಡ್ರ ಪೆಟ್ರೋಲ್‌ ಪಂಪ್‌ನಲ್ಲಿ ಮತದಾನ ಮಾಡಿ ಬಂದ ಮತದಾರರಿಗೆ ₹100 ಪೆಟ್ರೋಲ್ ಖರೀದಿಗೆ ₹ 1 ರಿಯಾಯಿತಿ ನೀಡಲಾಯಿತು.

ವಿವಿ ಪ್ಯಾಟ್

ಇವಿಎಂ ಮತಯಂತ್ರದ ಮೇಲೆ ಸಂಶಯ ವ್ಯಕ್ತಪಡಿಸುತ್ತಲೇ ಮತ ಚಲಾಯಿಸುತ್ತಿದ್ದ ಮತದಾರರಿಗೆ ವಿ.ವಿ. ಪ್ಯಾಟ್ ಖುಷಿ ನೀಡಿತು. ತಾವು ಚಲಾಯಿಸಿದ ಮತವನ್ನು ಸ್ಥಳದಲ್ಲೇ ಖಾತ್ರಿಗೊಳಿಸಿದ ಬಳಿಕ ಅವರು, ಹೊರ ಹೋಗುತ್ತಿದ್ದರು.

ಸೆಲ್ಫಿ ಸಂಭ್ರಮ

ಚುನಾವಣೆಯ ಬ್ರಾಂಡ್ ಅಂಬಾಸಿಡರ್ ಆಗಿದ್ದ ಕೂಲ್‌ ಮೆಂಟರ್ ‘ದಿ ವಾಲ್’ ಖ್ಯಾತಿಯ ಕ್ರಿಕೆಟರ್ ರಾಹುಲ್ ದ್ರಾವಿಡ್‌ (ಭಾವಚಿತ್ರದ) ಜೊತೆ ಸೆಲ್ಫಿ ತೆಗೆಸಿಕೊಳ್ಳುವ ವ್ಯವಸ್ಥೆಯು ಯುವ ಮತದಾರರಿಗೆ ಹುರುಪು ಮೂಡಿಸಿತು.

**
ನಮಗೆ ಮದುವೆಗೆ ಬಂದಂತೆ ಭಾಸವಾಯಿತು. ಮತದಾನದ ಮಹತ್ವದ ಜೊತೆಗೆ ಪ್ರಜಾಪ್ರಭುತ್ವದ ಮೇಲೆ ಇನ್ನಷ್ಟು ಪ್ರೀತಿಯನ್ನೂ ಮೂಡಿಸಿತು
– ವಿರೂಪಾಕ್ಷಪ್ಪ ಕೋರಗಲ್, ಹಿರಿಯ ಸಾಹಿತಿ