ಮುಂಬೈ: ರಾಜಭವನ ಆವರಣದಲ್ಲಿ ಬ್ರಿಟಿಷರ ಕಾಲದ ನೆಲದಡಿಯ ಬಂಕರ್ ಅನ್ನು ಮ್ಯೂಸಿಯಂ ಆಗಿ ಪರಿವರ್ತಿಸಲಾಗಿದ್ದು, ರಾಷ್ಟ್ರಪತಿ ರಾಮನಾಥ ಕೋವಿಂದ್ ಭಾನುವಾರ ಉದ್ಘಾಟಿಸಿದರು. ಕಳೆದ ವರ್ಷ ಈ ಬಂಕರನ್ನು ಪತ್ತೆ ಹಚ್ಚಲಾಗಿತ್ತು.
ಸುಮಾರು 15,000 ಚದರ ಅಡಿ ವಿಸ್ತೀರ್ಣ ಹೊಂದಿರುವ ಇದನ್ನು 19 ಶತಮಾನದ ಆರಂಭದಲ್ಲಿ ನಿರ್ಮಿಸಲಾಗಿತ್ತು. ಇದನ್ನು ನವೀಕರಿಸಿ ವಸ್ತು ಸಂಗ್ರಹಾಲಯವಾಗಿ ಮಾರ್ಪಡಿಸಲಾಗಿದೆ. ಈ ವರ್ಷದ ಅಂತ್ಯಕ್ಕೆ ಸಾರ್ವಜನಿಕರ ವೀಕ್ಷಣೆಗೆ ಲಭ್ಯವಾಗಲಿದೆ.
2 ಫಿರಂಗಿಗಳು, 13 ಕೊಠಡಿಗಳು, 20 ಅಡಿ ಎತ್ತರದ ಪ್ರವೇಶದ್ವಾರವನ್ನು ಒಳಗೊಂಡಿದೆ. ಮಾದರಿ ಒಳಚರಂಡಿ ವ್ಯವಸ್ಥೆ, ಮದ್ದು– ಗುಂಡುಗಳ ಕೊಠಡಿಗಳು ಗಮನ ಸೆಳೆಯುವ ಅಂಶಗಳಾಗಿವೆ ಎಂದು ರಾಜಭವನ ತಿಳಿಸಿದೆ.