ಲಾಕ್‌ಡೌನ್‌ನಿಂದ ಗೊಂದಲ, ಆತಂಕ ಸೃಷ್ಟಿ: ರಾಹುಲ್‌ ಗಾಂಧಿ

ಈ ಕುರಿತು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿರುವ ರಾಹುಲ್‌ ಗಾಂಧಿ, ಬಡವರು, ವಲಸಿಗರ ಸ್ಥಿತಿಯ ಕುರಿತು ಪ್ರಧಾನಿಯವರ ಗಮನಸೆಳೆದಿದ್ದಾರೆ.

‘ಇತರೆ ರಾಷ್ಟ್ರಗಳು ಘೋಷಿಸಿರುವ ಲಾಕ್‌ಡೌನ್‌ ತಂತ್ರದ ಹೊರತಾಗಿಯೂ ಇತರೆ ಹೆಜ್ಜೆಗಳನ್ನು ತೆಗೆದುಕೊಳ್ಳಬೇಕಾಗಿದೆ. ಭಾರತದ ಸ್ಥಿತಿಯು ಇತರೆ ದೇಶಗಳಿಗಿಂತ ವಿಭಿನ್ನವಾಗಿದೆ. ಭಾರತದಲ್ಲಿ ದಿನಗೂಲಿ ನೌಕರರೇ ಅಧಿಕವಾಗಿದ್ದಾರೆ. ಏಕಾಏಕಿ ಲಾಕ್‌ಡೌನ್‌ ಘೋಷಿಸಿರು ವುದು ಜನರಲ್ಲಿ ಆತಂಕ ಸೃಷ್ಟಿಸಿದೆ. ಸಣ್ಣ ಕೈಗಾರಿಕೆಗಳು, ಫ್ಯಾಕ್ಟರಿಗಳು ಮುಚ್ಚಿರುವುದರಿಂದ ವಲಸೆ ಬಂದಂತಹ ಲಕ್ಷಾಂತರ ಕಾರ್ಮಿಕರು ತಮ್ಮ ಊರುಗಳನ್ನು ಸೇರಲು ಹೆಣಗಾಡುತ್ತಿದ್ದಾರೆ’ ಎಂದು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.

‘ಈ ಸಂದರ್ಭದಲ್ಲಿ ಕಾರ್ಮಿಕರಿಗೆ ನಾವು ನೆರವು ನೀಡಬೇಕು. ಮುಂದಿನ ಕೆಲ ತಿಂಗಳು ಅವರಿಗೆ ಸೂರು ಹಾಗೂ ನೇರವಾಗಿ ಖಾತೆಗೆ ಹಣ ತಲುಪುವಂತಾಗಬೇಕು. ಹಳ್ಳಿಗಳತ್ತ ಸಾವಿರಾರು ನಿರುದ್ಯೋಗಿ ಯುವಜನತೆ ತೆರಳುತ್ತಿದ್ದು, ಇದರಿಂದ ಸೋಂಕು ಹರಡುವ ಭೀತಿ ಎದುರಾಗಿದೆ’ ಎಂದಿದ್ದಾರೆ.