ಕೋವಿಡ್‌ ವಾರಿಯರ್‌ಗಳ ಸುರಕ್ಷೆಗಾಗಿ ಕೇರಳದಲ್ಲಿ ನಿತ್ಯ ಕೊರೊನಾ ದೇವಿಯ ಪೂಜೆ!

ಥರ್ಮಕೋಲ್‌ನಿಂದ ಈ ವೈರಸ್‌ನ ಪ್ರತಿಕೃತಿ ನಿರ್ಮಿಸಿರುವ ಅನಿಲನ್‌ ಅದಕ್ಕೆ ‘ಕೊರೊನಾ ದೇವಿ’ ಎಂದು ಕರೆದಿದ್ದಾರೆ. ‘ಈ ಮಾರಕ ವೈರಸ್‌ ವಿರುದ್ಧ ಹೋರಾಡುತ್ತಿರುವ ಯೋಧರ ಯೋಗಕ್ಷೇಮಕ್ಕೆ ಪ್ರಾರ್ಥಿಸಿ, ನಿತ್ಯವೂ ಕೊರೊನಾ ದೇವಿಗೆ ಪೂಜೆ ಸಲ್ಲಿಸುತ್ತಿದ್ದೇನೆ’ ಎಂದು ಅನಿಲನ್‌ ಹೇಳುತ್ತಾರೆ.

‘ಕೋವಿಡ್‌ ರೋಗಿಗಳ ಚಿಕಿತ್ಸೆಯಲ್ಲಿ ವೈದ್ಯರು, ಆರೋಗ್ಯ ಕಾರ್ಯಕರ್ತರು ನಿರತರಾಗಿದ್ದರೆ, ಇದಕ್ಕೆ ಪರಿಣಾಮಕಾರಿಯಾದ ಔಷಧಿ ಕಂಡು ಹಿಡಿಯಲು ವಿಜ್ಞಾನಿಗಳು ಹಗಲಿರುಳು ಶ್ರಮಿಸುತ್ತಿದ್ದಾರೆ. ಪೊಲೀಸರು, ಅಗ್ನಿ ಶಾಮಕ ಸಿಬ್ಬಂದಿ, ಪೌರ ಕಾರ್ಮಿಕರು, ಮಾಧ್ಯಮ ಪ್ರತಿನಿಧಿಗಳು ಸೇರಿದಂತೆ ವಿವಿಧ ವರ್ಗದ ಜನರೂ ಈ ವೈರಸ್‌ ಸೋಂಕಿನ ವಿರುದ್ಧ ಹೋರಾಡುತ್ತಿದ್ದು, ಅವರೆಲ್ಲರೂ ಸುರಕ್ಷತವಾಗಿರಲಿ’ ಎಂದೂ ಪ್ರಾರ್ಥಿಸುತ್ತೇನೆ ಎನ್ನುತ್ತಾರೆ.

‘ನಾನೂ ಈ ರೀತಿ ಪೂಜೆ ಮಾಡುವುದನ್ನು ನೋಡಿ ಅನೇಕ ಜನ ಅಪಹಾಸ್ಯ ಮಾಡಿದರು. ಆದರೆ, ಜನರಲ್ಲಿ ಕೋವಿಡ್‌ ಬಗ್ಗೆ ಜಾಗೃತಿ ಮೂಡಿಸಲು ನಾನು ಆಯ್ಕೆ ಮಾಡಿಕೊಂಡಿರುವ ಮಾರ್ಗ ಇದು’ ಎಂದು ಅವರು ತಮ್ಮ ಪೂಜಾ ಕೈಂಕರ್ಯವನ್ನು ಸಮರ್ಥಿಸಿಕೊಳ್ಳುತ್ತಾರೆ.