ಭಾನುವಾರ, ಆಗಸ್ಟ್ 18, 2019
26 °C

‘ಮ್ಯಾನ್‌ ವರ್ಸಸ್‌ ವೈಲ್ಡ್‌’ ಪ್ರಸಾರ

Published:
Updated:
Prajavani

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು  ಭಾಗವಹಿಸಿದ್ದ ‘ಮ್ಯಾನ್‌ ವರ್ಸಸ್‌ ವೈಲ್ಡ್‌’ ಕಾರ್ಯಕ್ರಮ ಡಿಸ್ಕವರಿ  ಚಾನೆಲ್‌ನಲ್ಲಿ ಸೋಮವಾರ ರಾತ್ರಿ 9 ಗಂಟೆಗೆ ಪ್ರಸಾರವಾಯಿತು. ನಿರೂಪಕ ಬೇರ್‌ ಗ್ರಿಲ್ಸ್ ಅವರು ಈ ಕಾರ್ಯಕ್ರಮ ನಡೆಸಿಕೊಟ್ಟರು. ಪ್ರಪಂಚದ 180 ದೇಶಗಳಲ್ಲಿ ಈ ಕಾರ್ಯಕ್ರಮ ಪ್ರಸಾರವಾಯಿತು. 

ಅರಣ್ಯದಲ್ಲಿ ಗ್ರಿಲ್ಸ್‌ ಅವರೊಂದಿಗೆ ನಡೆಯುತ್ತಾ, ಬೋಟ್‌ನಲ್ಲಿ ನದಿ ದಾಟುವ ಸಾಹಸದಲ್ಲಿ ಪ್ರಧಾನಿ ಭಾಗವಹಿಸಿದ್ದರು. ರಾಜಕೀಯ ಕಾರ್ಯಕ್ರಮ ಹೊರತಾಗಿ ‘ಮ್ಯಾನ್‌ ವರ್ಸಸ್‌ ವೈಲ್ಡ್‌’ನಲ್ಲಿ ವಿಭಿನ್ನವಾಗಿ ಮೋದಿ ಕಾಣಿಸಿಕೊಂಡರು.

‘ಜನರ ಆಶೋತ್ತರ ಈಡೇರಿಸುವುದು ನನಗೆ ಸಂತಸ ನೀಡುತ್ತದೆ. ಅಭಿವೃದ್ಧಿ ಮೇಲೆ ನನ್ನ ಗಮನ’ ಎಂದು ಕಾರ್ಯಕ್ರಮದ ಸಂಭಾಷಣೆಯೊಂದರಲ್ಲಿ ಪ್ರಧಾನಿ ಹೇಳಿದ್ದಾರೆ.

‘ಮೋದಿ ಅವರ ಬಾಲ್ಯ, ಪ್ರಧಾನಿಯಾಗಿ ಕನಸುಗಳು, ಯಾವುದಕ್ಕಾದರೂ ಭಯಗೊಂಡಿದ್ದು ಉಂಟೇ’ ಎಂದು ಗ್ರಿಲ್ಸ್‌ ಪ್ರಶ್ನಿಸಿದರು.

ಕಾರ್ಯಕ್ರಮ ವೀಕ್ಷಿಸಲು ಮನವಿ ಮಾಡಿದ್ದ ಪ್ರಧಾನಿ: ಕಾರ್ಯಕ್ರಮ ಪ್ರಸಾರವಾಗುವುದಕ್ಕಿಂತಲೂ ಮೊದಲು ಇದನ್ನು ವೀಕ್ಷಿಸುವಂತೆ ಪ್ರಧಾನಿ ಮನವಿ ಮಾಡಿದ್ದರು.

‘ಪರಿಸರ ಸಂರಕ್ಷಣೆ ಮತ್ತು ಹವಾಮಾನ ಬದಲಾವಣೆ ಕಡೆಗೆ ನಾವು ಗಮನ ಕೊಡೋಣ. ಇಂದು ರಾತ್ರಿ 9 ಗಂಟೆಗೆ ನೋಡೋಣ’ ಎಂದು ಮೋದಿ ಟ್ವೀಟ್‌ ಮಾಡಿದ್ದರು. ಕಾರ್ಯಕ್ರಮ ನಿರೂಪಕ ಗ್ರಿಲ್ಸ್‌ ಅವರೂ ವೀಕ್ಷಣೆ ಮಾಡುವಂತೆ ಮನವಿ ಮಾಡಿದ್ದರು. ಪ್ರಧಾನಿ ಜತೆಗಿನ ಪಯಣದಲ್ಲಿ ನೀವೂ ಜೊತೆಯಾಗಿ ಎಂದು ಹೇಳಿದ್ದರು.

‘ಈ ಗ್ರಹವನ್ನು ಉಳಿಸಲು ಎಲ್ಲರೂ ಸೇರೋಣ. ಶಾಂತಿ ಮತ್ತು ಪ್ರೋತ್ಸಾಹವನ್ನು ಉತ್ತೇಜಿಸೋಣ. ಯಾವುದೇ ಕಾರಣಕ್ಕೂ ಸ್ಫೂರ್ತಿ ಕಳೆದುಕೊಳ್ಳದಿರೋಣ. ಕಾರ್ಯಕ್ರಮ ನೋಡಿ ಖುಷಿಪಡಿ’ ಎಂದು ಗ್ರಿಲ್ಸ್‌ ಟ್ವೀಟ್‌ ಮಾಡಿದ್ದರು.

ಮಂಗಳವಾರ ರಾತ್ರಿ 9 ಗಂಟೆಗೆ ಇದೇ ಕಾರ್ಯಕ್ರಮ ದೂರದರ್ಶನದಲ್ಲಿ ಪ್ರಸಾರವಾಗಲಿದೆ ಎಂದು ಕೇಂದ್ರ ಸಚಿವ ಜಾವಡೇಕರ್‌ ಟ್ವೀಟ್‌ ಮಾಡಿದ್ದಾರೆ.

Post Comments (+)