ಬುಧವಾರ, ಏಪ್ರಿಲ್ 1, 2020
19 °C

ಬೆಂಗಳೂರು ವಾಯು ಮಾರ್ಗದಲ್ಲಿ ತಪ್ಪಿದ ಇಂಡಿಗೊ ವಿಮಾನಗಳ ಡಿಕ್ಕಿ

ಏಜೆನ್ಸಿಸ್‌ Updated:

ಅಕ್ಷರ ಗಾತ್ರ : | |

ತಪ್ಪಿದ ಇಂಡಿಗೊ ವಿಮಾನಗಳ ಘರ್ಷಣೆ 

ಬೆಂಗಳೂರು: ನಗರದ ವಿಮಾನ ಮಾರ್ಗ ನಿಯಂತ್ರಣ ವಲಯದಲ್ಲಿ ಹಾರಾಟ ನಡೆಸಿದ್ದ ಎರಡು ಇಂಡಿಗೊ ವಿಮಾನಗಳು ಒಂದಕ್ಕೊಂದು ಡಿಕ್ಕಿಯಾಗಿ ಸಂಭವಿಸಲಿದ್ದ ಭಾರೀ ದುರಂತ ಎಚ್ಚರಿಕೆಯ ಸಂದೇಶದಿಂದ ತಪ್ಪಿದೆ. 

ಜುಲೈ 10ರಂದು ಕೊಯಮತ್ತೂರು–ಹೈದರಾಬಾದ್‌ ಹಾಗೂ ಬೆಂಗಳೂರು–ಕೊಚ್ಚಿ ಮಾರ್ಗದ ವಿಮಾನಗಳಲ್ಲಿ ಸಂಚಾರ ಘರ್ಷಣೆ ನಿಯಂತ್ರಣ ವ್ಯವಸ್ಥೆ(ಟಿಸಿಎಎಸ್‌) ಮೂಲಕ ಪೈಲಟ್‌ಗಳಿಗೆ ಎಚ್ಚರಿಕೆ ರವಾನೆಯಾಗಿದೆ. ಎಚ್ಚೆತ್ತ ಪೈಲಟ್‌ಗಳು 200 ಅಡಿ ದೂರದವರೆಗೂ ವಿಮಾನಗಳ ಮಾರ್ಗ ಬದಲಿಸಿಕೊಂಡಿದ್ದಾರೆ. 

ಎರಡು ವಿಮಾನಗಳಲ್ಲಿ ಸುಮಾರು 330 ಪ್ರಯಾಣಿಕರಿದ್ದರು. ಸಮೀಪದಲ್ಲಿ ಹಾರಾಟ ನಡೆಸಿರುವ ಕುರಿತು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ(ಡಿಜಿಸಿಎ)ಕ್ಕೆ ವರದಿ ನೀಡಿರುವುದಾಗಿ ಏರ್‌ಲೈನ್ಸ್‌ ಪ್ರಕಟಣೆ ತಿಳಿಸಿದೆ.

ಎರಡು ವಿಮಾನಗಳು ಸಮೀಪಿಸುತ್ತಿದ್ಧಂತೆ ಘರ್ಷಣೆಯ ಎಚ್ಚರಿಕೆಯನ್ನು ’ಸಂಚಾರ ಘರ್ಷಣೆ ನಿಯಂತ್ರಣ ವ್ಯವಸ್ಥೆ’ ಎರಡೂ ವಿಮಾನಗಳಿಗೆ ನೀಡುತ್ತದೆ. ಆಕಾಶ ಮಾರ್ಗದಲ್ಲಿ ಘರ್ಷಣೆ ತಪ್ಪಿಸುವುದಕ್ಕಾಗಿ ನಿಗಾ ವಹಿಸಲು ವಿಮಾನಗಳಿಗೆ ಈ ವ್ಯವಸ್ಥೆ ಅಳವಡಿಸಲಾಗಿರುತ್ತದೆ. ಡಿಕ್ಕಿ ತಪ್ಪಿಸಲು ಕಾಯ್ದುಕೊಳ್ಳಬೇಕಿರುವ ಅಂತರವನ್ನೂ ಈ ವ್ಯವಸ್ಥೆ ಸೂಚಿಸುತ್ತದೆ. 

ಹೈದರಾಬಾದ್‌ ವಿಮಾನದಲ್ಲಿ 162 ಪ್ರಯಾಣಿಕರು ಹಾಗೂ ಮತ್ತೊಂದು ವಿಮಾನದಲ್ಲಿ 166 ಪ್ರಯಾಣಿಕರು ಇದ್ದಿರುವುದಾಗಿ ವರದಿಯಾಗಿದೆ. ಈ ಪ್ರಕರಣದ ಕುರಿತು ವಿಮಾನ ಅಪಘಾತ ತನಿಖಾ ಮಂಡಳಿ ತನಿಖೆ ಕೈಗೊಂಡಿದೆ. 

ಮೇ 21ರಂದು ಚೆನ್ನೈನ ವಾಯು ವಲಯದಲ್ಲಿ ವಿಶಾಖಪಟ್ಟಣ–ಬೆಂಗಳೂರು ವಿಮಾನ ಮತ್ತು ಭಾರತೀಯ ವಾಯು ಪಡೆಯ ವಿಮಾನಗಳ ನಡುವಿನ ಡಿಕ್ಕಿ ಸ್ವಲ್ಪದರಲ್ಲಿಯೇ ತಪ್ಪಿತ್ತು. ಮೇ 2ರಂದು ಅಗರ್ತಲಾದಿಂದ ಕೋಲ್ಕತಾ ಸಂಚಾರ ಕೈಗೊಂಡಿದ್ದ ಇಂಡಿಗೊ ವಿಮಾನ ಹಾಗೂ ಏರ್‌ ಡೆಕ್ಕನ್ ವಿಮಾನ ಡಿಎನ್‌ 602 ಢಾಕಾ ವಾಯು ವಲಯದಲ್ಲಿ ತಪ್ಪಿತ್ತು. 

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು