ಮೋದಿ–ಮಾರಿಸನ್‌ ಸಮೋಸಾ ರಾಜಕಾರಣ
ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಸ್ಟ್ರೇಲಿಯಾದ ಪ್ರಧಾನಿ ಸ್ಕಾಟ್ ಮಾರಿಸನ್‌ ಅವರು ಗುರುವಾರ ವಿಡಿಯೊ ಸಂವಾದ ನಡೆಸಲಿದ್ದಾರೆ. ಆದರೆ, ಅದಕ್ಕೂ ಮುನ್ನ, ಸೋಮವಾರ ಇಬ್ಬರು ನಡೆಸಿದ ‘ಸಮೋಸಾ ರಾಜತಾಂತ್ರಿಕತೆ’ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸುದ್ದಿ ಮಾಡಿದೆ.
ಮಾರಿಸನ್‌ ಅವರು ಸೋಮವಾರ ತಮ್ಮ ಮನೆಯಲ್ಲಿ ಸಮೋಸಾ ಹಾಗೂ ಮಾವಿನಕಾಯಿ ಚಟ್ನಿ ತಯಾರಿಸಿ, ಅದರ ಚಿತ್ರಗಳನ್ನು ಟ್ವಿಟರ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಜತೆಗೆ, ‘ಮೋದಿ ಅವರು ಸಸ್ಯಾಹಾರಿ. ಇದನ್ನು ನಾನು ಅವರ ಜತೆ ಹಂಚಿಕೊಳ್ಳಲು ಇಚ್ಛಿಸುತ್ತೇನೆ. ಆದರೆ ನಮ್ಮ ಸಂವಾದ ವಿಡಿಯೊ ಮುಖಾಂತರ ನಡೆಯಲಿದೆ’ ಎಂದು ಬರೆದಿದ್ದಾರೆ. ಟ್ವೀಟ್‌ನಲ್ಲಿ ಅವರು ‘ಸಮೋಸಾ’ ಪದವನ್ನು ‘ಸ್ಕೊಮೊಸಾ’ (ScoMosas) ಎಂದು ಬರೆದಿದ್ದಾರೆ.
Connected by the Indian Ocean, united by the Indian Samosa!
— Narendra Modi (@narendramodi) May 31, 2020
Looks delicious, PM @ScottMorrisonMP!
Once we achieve a decisive victory against COVID-19, we will enjoy the Samosas together.
Looking forward to our video meet on the 4th. https://t.co/vbRLbVQuL1
ಈ ಟ್ವೀಟ್‌ಗೆ ಸಾಕಷ್ಟು ಪ್ರತಿಕ್ರಿಯೆಗಳು ಬಂದಿವೆ. ಸಾವಿರಾರು ಬಾರಿ ಮರು ಟ್ವೀಟ್‌ ಆಗಿದೆ. ಇದನ್ನು ಗಮನಿಸಿದ ಮೋದಿ ಅವರು, ‘ನಾವು ಹಿಂದೂ ಮಾಹಾಸಾಗರದಿಂದ ಬೆಸೆದುಕೊಂಡಿದ್ದು, ಸಮೋಸಾ ಮೂಲಕ ಒಗ್ಗಟ್ಟಾಗೋಣ. ಸಮೋಸಾ ರುಚಿಕರವಾಗಿರುವಂತಿದೆ. ಕೋವಿಡ್‌–19 ವಿರುದ್ಧ ಗೆಲುವು ಸಾಧಿಸಿದ ನಂತರ ಜತೆಯಾಗಿ ಸಮೋಸಾ ಸೇವಿಸೋಣ. ಜೂನ್‌ 4ರ ವಿಡಿಯೊ ಸಂವಾದಕ್ಕಾಗಿ ಉತ್ಸುಕನಾಗಿದ್ದೇನೆ’ ಎಂದು ಟ್ವಿಟರ್‌ ಮೂಲಕವೇ ಪ್ರತಿಕ್ರಿಯೆ ನೀಡಿದ್ದಾರೆ.
ಕಳೆದ ಜನವರಿ 13ರಿಂದ 16ರವರೆಗೆ ಮಾರಿಸನ್‌ ಅವರ ದೆಹಲಿ ಪ್ರವಾಸ ನಿಗದಿಯಾಗಿತ್ತು. ಆದರೆ ಆಸ್ಟ್ರೇಲಿಯಾದಲ್ಲಿ ಕಾಣಿಸಿಕೊಂಡ ಕಾಳ್ಗಿಚ್ಚಿನಿಂದ ಪ್ರವಾಸ ಮುಂದೂಡಬೇಕಾಯಿತು. ನಂತರ ಲಾಕ್‌ಡೌನ್‌ನಿಂದ ಪ್ರವಾಸವನ್ನು ಮರುನಿಗದಿ ಮಾಡಲು ಸಾಧ್ಯವಾಗಿಲ್ಲ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.