ಇನ್ನೇನು ಸ್ವಲ್ಪ ದಿನಗಳಲ್ಲಿಯೇ ಮಕ್ಕಳಿಗೆ ಬೇಸಿಗೆ ರಜೆ ಶುರುವಾಗಲಿದೆ. ಮಕ್ಕಳಿಗೆ ರಜೆಯ ಮಜಾ ನೀಡಲು ಊರೂರು ಸುತ್ತಿಸಬೇಕು ಎಂಬುದು ನಿಮ್ಮ ಆಸೆಯೇ? ಹಾಗೊಂದು ಪ್ರವಾಸಕ್ಕೆ ತಯಾರಾಗುವುದು ಹೇಗೆ ಎಂಬ ಗೊಂದಲವಿದ್ದರೆ ಈ ಲೇಖನ ಓದಿ.
* ಮಕ್ಕಳು ಖುಷಿಪಡುವಂತಹ ಸ್ಥಳಗಳಿಗೆ ಹೋಗುವ ಯೋಜನೆ ಹಾಕಿಕೊಳ್ಳಿ. ಬೀಚ್, ಅಮ್ಯೂಸ್ಮೆಂಟ್ ಪಾರ್ಕ್, ಮೃಗಾಲಯ, ಮ್ಯೂಸಿಯಂಗೆ ಹೋಗಲು ಆದ್ಯತೆ ನೀಡಿ.
* ನೀವು ಹೋಗುವ ಸ್ಥಳದ ವಾತಾವರಣ ತಿಳಿದುಕೊಳ್ಳಿ. ತುಂಬಾ ಬಿಸಿಲಿದ್ದರೆ ಮಕ್ಕಳಿಗೆ ಕಾಟನ್ ಬಟ್ಟೆಗಳನ್ನೇ ಹೆಚ್ಚಾಗಿ ತೆಗೆದುಕೊಂಡು ಹೋಗಿ. ಶೀತ ವಾತಾವರಣವಾದರೆ ಮಕ್ಕಳನ್ನು ಬೆಚ್ಚಗಿರಿಸುವ ಉಡುಪನ್ನು ಆಯ್ದುಕೊಳ್ಳಿ.
* ಸೂರ್ಯನಿಂದ ಬರುವ ಪ್ರಬಲ ವಿಕಿರಣಗಳು ಮಕ್ಕಳ ಮೃದು ಚರ್ಮವನ್ನು ಹಾಳು ಮಾಡಬಹುದು. ಹಾಗಾಗಿ ಬಿಸಿಲಿಗೆ ಹೊರಗೆ ಹೋಗುವ ಮೊದಲು ಸನ್ಸ್ಕ್ರೀನ್ ಲೋಶನ್ ಬಳಸಿ.
* ಮಕ್ಕಳು ಚೆನ್ನಾಗಿ ನೀರು ಕುಡಿಯುವಂತೆ ನೋಡಿಕೊಳ್ಳಿ. ಎಳೆನೀರು, ಜ್ಯೂಸ್ ಕೊಡುತ್ತಿರಿ. ಮಿತಿಮೀರಿ ಉಷ್ಣವಾದರೆ ತಲೆ
ಸುತ್ತು, ವಾಕರಿಕೆ ಕಾಣಿಸಿಕೊಳ್ಳಬಹುದು. ಮೂತ್ರದ ಸೋಂಕು ಮತ್ತು ಅದರಿಂದಾಗಿ ಚಳಿ ಜ್ವರ ಕಾಡಬಹುದು.
* ಮಕ್ಕಳು ಬೈಕ್, ಸೈಕಲ್, ಸ್ಕೇಟಿಂಗ್ ಮಾಡುವಾಗ ಕಡ್ಡಾಯವಾಗಿ ಹೆಲ್ಮೆಟ್ ಧರಿಸುವಂತೆ ನೋಡಿಕೊಳ್ಳಿ.
* ಮಕ್ಕಳು ನೀರಿನ ಬಳಿ ಹೋಗದಂತೆ ಎಚ್ಚರವಹಿಸಿ. ಬೀಚ್, ಈಜುಕೊಳದಲ್ಲಿ ಅವರು ಆಡುವಾಗ ನಿಮ್ಮ ಗಮನ ಅವರ ಮೇಲಿರಲಿ.
* ಮಕ್ಕಳ ಮೇಲೆ ನಿಗಾ ವಹಿಸಿ. ಅವರು ಎಲ್ಲಿ ಹೋಗುತ್ತಾರೆ, ಏನು ಮಾಡುತ್ತಾರೆ ಎಂಬುದನ್ನು ಗಮನಿಸುತ್ತಲೇ ಇರಿ.
* ಪ್ರವಾಸದ ವೇಳೆ ಅವರು ಕಂಡ ವಿಷಯಗಳನ್ನು ಚಿತ್ರಿಸುವ ಮತ್ತು ಪಟ್ಟಿ ಮಾಡುವಂತೆ ಹೇಳಿ. ಇದರಿಂದ ಅವರು ಪ್ರಯಾಣದ ಅನುಭವಗಳನ್ನು ನೆನಪಿನಲ್ಲಿ ಇರಿಸಿಕೊಳ್ಳುವುದು ಸಾಧ್ಯವಾಗುತ್ತದೆ. ವಿಭಿನ್ನ ಆಹಾರಗಳನ್ನು ಪ್ರಯತ್ನಿಸಲು ಉತ್ತೇಜನ ನೀಡಿ.
* ದೂರದೂರಿಗೆ ಪ್ರವಾಸ ಮಾಡುವಿರಾದರೆ ಅವರಿಗೆ ಸಮಯ ಕಳೆಯಲು ಚಿಕ್ಕಪುಟ್ಟ ಆಟದ ಸಾಮಾನು, ಚಿತ್ರಕಲೆ ಪುಸ್ತಕ, ಒಗಟಿನ ಪುಸ್ತಕಗಳನ್ನು ತೆಗೆದುಕೊಂಡು ಹೋಗಿ.
* ಜಂಕ್ಫುಡ್, ಸ್ವೀಟ್ಗಳನ್ನು ಹೆಚ್ಚು ತಿನ್ನಲು ಬಿಡಬೇಡಿ. ಪ್ರವಾಸದ ಮಧ್ಯೆ ಅವರಿಗೆ ಆರೋಗ್ಯ ಸಮಸ್ಯೆಯಾದರೆ ಕಷ್ಟವಾದೀತು.
* ವೈದ್ಯರ ಸಲಹೆ ಪಡೆದು ಮಕ್ಕಳಿಗೆ ಅಗತ್ಯವಾದ ಔಷಧಿಗಳನ್ನು ತೆಗೆದುಕೊಂಡು ಹೋಗಿ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.