ಜಲ ಮಾಲಿನ್ಯದ ಆತಂಕ

25 ದಿನಗಳ ಹಿಂದೆ ಮಹಾರಾಷ್ಟ್ರದ ಇಚಲಕರಂಜಿ ಪಟ್ಟಣದ ಹತ್ತಿರ ಇರುವ ಪಂಚಗಂಗಾ ನದಿಯಿಂದ ನರಸಿಂಹವಾಡಿ ಮೂಲಕ ಕೃಷ್ಣಾ ನದಿಯಲ್ಲಿ ನೀರ್ಬಳ್ಳಿ ಆವರಿಸಿತ್ತು. ಇದೀಗ ರಾಜಾಪುರ ಬ್ಯಾರೇಜ್ ಮೂಲಕ ರಾಜ್ಯ ವ್ಯಾಪ್ತಿಯ ನದಿ ಪಾತ್ರದಲ್ಲೂ ಆವರಿಸಿರುವ ನಿರ್ಬಳ್ಳಿ ಜನರಲ್ಲಿ ಆತಂಕ ಉಂಟು ಮಾಡಿದೆ. ನೀರ್ಬಳ್ಳಿಯಿಂದ ಜೀವಜಲ ಕಲುಷಿತವಾಗುತ್ತದೆ. ಚಿಕ್ಕೋಡಿ ಪಟ್ಟಣದ ಸೇರಿ ನದಿ ಪಾತ್ರದ 15 ಹಳ್ಳಿಗಳಿಗೆ ಕೃಷ್ಣಾ ನದಿಯಿಂದ ಕುಡಿಯುವ ನೀರು ಸರಬರಾಜು ಆಗುತ್ತದೆ. ಹೀಗಾಗಿ, ಕಲುಷಿತ ನೀರಿನಿಂದ ಜನರ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗುವ ಸಾಧ್ಯತೆ ಇದೆ. ಈ ನಿಟ್ಟಿನಲ್ಲಿ ಏನಾದರೂ ಅವಘಡ ಘಟಿಸುವ ಮೊದಲೇ ನದಿಯಿಂದ ನಿರ್ಬಳ್ಳಿಯನ್ನು ನಿರ್ಮೂಲಿಸುವಂತೆ ಸಂಬಂಧಿತ ಅಧಿಕಾರಿಗಳನ್ನು ಮಾಂಜರಿ ಗ್ರಾಮ ಪಂಚಾಯ್ತಿ ಅಧ್ಯಕ್ಷೆ ಸುನೀತಾ ಭೋಜಕರ ಒತ್ತಾಯಿಸಿದ್ದಾರೆ.