ಹೊರಬರುತ್ತಿರುವ ಲೈಂಗಿಕ ದೌರ್ಜನ್ಯ ಆರೋಪಗಳು: ಬಿಟ್ಟೆನೆಂದರೂ ಬಿಡದ ಮಿ–ಟೂ

7

ಹೊರಬರುತ್ತಿರುವ ಲೈಂಗಿಕ ದೌರ್ಜನ್ಯ ಆರೋಪಗಳು: ಬಿಟ್ಟೆನೆಂದರೂ ಬಿಡದ ಮಿ–ಟೂ

Published:
Updated:

ನವದೆಹಲಿ: ಲೈಂಗಿಕ ದೌರ್ಜನ್ಯದ ವಿರುದ್ಧ ಸಾಮಾಜಿಕ ಜಾಲ ತಾಣದಲ್ಲಿ ನಡೆಯುತ್ತಿರುವ ‘ಮಿ–ಟೂ’ ಅಭಿಯಾನ ದೇಶದ ದಶ ದಿಕ್ಕುಗಳಿಗೂ ಪಸರಿಸಿದೆ.

ಮಾಜಿ ಸಂಪಾದಕ ಮತ್ತು ವಿದೇಶಾಂಗ ಸಚಿವಾಲಯದ ರಾಜ್ಯ ಖಾತೆ ಸಚಿವ ಎಂ.ಜೆ. ಅಕ್ಬರ್‌, ಟಿ.ವಿ. ತಾರೆ ಅಲೋಕ್‌ ನಾಥ್‌, ಮಲಯಾಳ ನಟ–ರಾಜಕಾರಣಿ ಮುಕೇಶ್‌ ಮುಂತಾದವರ ವಿರುದ್ಧ ಲೈಂಗಿಕ ದೌರ್ಜನ್ಯದ ಗಂಭೀರ ಆರೋಪಗಳನ್ನು ಮಾಡಲಾಗಿದೆ. ‘ಮಿ–ಟೂ’ ಅಭಿಯಾನಕ್ಕೆ ಪೂರ್ಣ ಬೆಂಬಲ ಪ್ರಕಟಿಸಿರುವ ಕೇಂದ್ರ ಸಚಿವೆ ಮೇನಕಾ ಗಾಂಧಿ ಅವರು ಆರೋಪ ಕೇಳಿ ಬಂದಿ
ರುವ ಒಬ್ಬೊಬ್ಬರ ವಿರುದ್ಧವೂ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.  

‘ತನಿಖೆ ನಡೆಯಲೇಬೇಕು. ಅಧಿಕಾರದ ಸ್ಥಾನದಲ್ಲಿರುವ ಗಂಡಸರು ಸಾಮಾನ್ಯವಾಗಿ ಇಂತಹದ್ದನ್ನು ಮಾಡುತ್ತಾರೆ. ಇದು ಮಾಧ್ಯಮ, ರಾಜಕಾರಣಿಗಳು ಮತ್ತು ಕಂಪನಿಗಳಲ್ಲಿ ದೊಡ್ಡ ಹುದ್ದೆಯಲ್ಲಿರುವವರಿಗೆ ಅನ್ವಯ ಆಗುತ್ತದೆ’ ಎಂದು ಮೇನಕಾ ಹೇಳಿದ್ದಾರೆ. 

‘ಮಿ–ಟೂ’ ಅಭಿಯಾನ ಈಗ ಕೇಂದ್ರ ಸರ್ಕಾರಕ್ಕೂ ಇಕ್ಟಟ್ಟಿನ ಸ್ಥಿತಿ ತಂದಿಟ್ಟಿದೆ. ತಮ್ಮ ಸಚಿವಾಲಯದ ಕಿರಿಯ ಸಚಿವ ಅಕ್ಬರ್‌ ವಿರುದ್ಧದ ಆರೋಪದ ಬಗ್ಗೆ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಕೇಂದ್ರ ಸಚಿವೆ ಮೇನಕಾ ಗಾಂಧಿ ಅವರ ಮಾದರಿಯನ್ನು ಸುಷ್ಮಾ ಅವರು ಅನುಸರಿಸಿಲ್ಲ. 

ರಾಜ್ಯಸಭೆಯಲ್ಲಿ ಬಿಜೆಪಿಯ ಸದಸ್ಯರಾಗಿರುವ ಅಕ್ಬರ್‌ ಅವರು ‘ದ ಟೆಲಿಗ್ರಾಫ್‌’ ಮತ್ತು ‘ದ ಏಷ್ಯನ್‌ ಏಜ್‌’ ಪತ್ರಿಕೆಗಳಿಗೆ ಸಂಸ್ಥಾಪಕ ಸಂಪಾದಕರು. 

ತಮ್ಮ ಮೇಲಾದ ಲೈಂಗಿಕ ದೌರ್ಜನ್ಯದ ಬಗ್ಗೆ ಪರ್ತಕರ್ತೆ ಪ್ರಿಯಾ ರಮಣಿ ಅವರು ವರ್ಷದ ಹಿಂದೆ ಲೇಖನವೊಂದರನ್ನು ಪ್ರಕಟಿಸಿದ್ದರು. ಲೈಂಗಿಕ ದೌರ್ಜನ್ಯ ಎಸಗಿದ ವ್ಯಕ್ತಿ ಯಾರು ಎಂದು ಈ ಲೇಖನದಲ್ಲಿ ಅವರು ಗುರುತಿಸಿರಲಿಲ್ಲ. ಲೈಂಗಿಕ ದೌರ್ಜನ್ಯದ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ‘ಮಿ–ಟೂ’ ಅಭಿಯಾನ ತೀವ್ರಗೊಳ್ಳುತ್ತಿದ್ದಂತೆಯೇ ತಮ್ಮ ಮೇಲೆ ದೌರ್ಜನ್ಯ ಎಸಗಿದವರು ‘ಎಂ.ಜೆ. ಅಕ್ಬರ್‌’ ಎಂದು ರಮಣಿ ಟ್ವಿಟರ್‌ನಲ್ಲಿ ಹೇಳಿದ್ದಾರೆ. 

ಇದಾದ ಬಳಿಕ ಹಲವು ಪತ್ರಕರ್ತೆಯವರು ಅಕ್ಬರ್‌ ಅವರಿಂದ ತಮಗೆ ಆದ ಕಹಿ ಅನುಭವಗಳನ್ನು ಬಿಚ್ಚಿಟ್ಟಿದ್ದಾರೆ. ಯುವ ಪತ್ರಕರ್ತೆಯರನ್ನು ಅವರು ಹೋಟೆಲ್‌ ಕೊಠಡಿಯಲ್ಲಿಯೇ ಸಂದರ್ಶನ ನಡೆಸಲು ಒತ್ತಾಯಿಸುತ್ತಿದ್ದುದೇ ಇಲ್ಲಿ ಮುಖ್ಯವಾಗಿ ಪ್ರಸ್ತಾಪವಾ
ಗಿದೆ. ಆರೋಪದ ಬಗ್ಗೆ ಅಕ್ಬರ್‌ ಅವರಿಂದ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. 

‘ಸಂಭಾವಿತ ನಟನಿಂದ ಅತ್ಯಾಚಾರ’

1990ರ ದಶಕದ ಅತ್ಯಂತ ಜನಪ್ರಿಯ ಟಿ.ವಿ. ಕಾರ್ಯಕ್ರಮ ‘ತಾರಾ’ದ ಲೇಖಕಿ ಮತ್ತು ನಿರ್ಮಾಪಕಿ ವಿಂಟಾ ನಂದಾ ಅವರು ನಟ ಅಲೋಕ್‌ ನಾಥ್‌ ವಿರುದ್ಧ ಅತ್ಯಾಚಾರದ ಆರೋಪ ಮಾಡಿದ್ದಾರೆ. ‘ಅತ್ಯಂತ ಸಂಭಾವಿತ ನಟ’ ಎನಿಸಿಕೊಂಡ ಅಲೋಕ್‌ 20 ವರ್ಷ ಹಿಂದೆ ತಮ್ಮ ಮೇಲೆ ಅತ್ಯಾಚಾರ ಎಸಗಿದ್ದರು ಎಂದು ವಿಂಟಾ ಆರೋಪಿಸಿದ್ದಾರೆ. 

‘ಇದನ್ನು ನಾನು ಅಲ್ಲಗಳೆಯುವುದೂ ಇಲ್ಲ, ಒಪ್ಪಿಕೊಳ್ಳುವುದೂ ಇಲ್ಲ. ಇದು (ಅತ್ಯಾಚಾರ) ನಡೆದಿರಲೇಬೇಕು, ಆದರೆ ಬೇರೆ ಯಾರೋ ಮಾಡಿರಬೇಕು. ನಾನು ಮಾತನಾಡಿದರೆ ಇದು ಇನ್ನಷ್ಟು ಹಿಗ್ಗುತ್ತದೆ. ಹಾಗಾಗಿ ಈ ಬಗ್ಗೆ ಹೆಚ್ಚು ಮಾತನಾಡುವುದಿಲ್ಲ’ ಎಂದು ಅಲೋಕ್‌ ಪ್ರತಿಕ್ರಿಯೆ ನೀಡಿದ್ದಾರೆ. 

ಆರೋಪಕ್ಕೆ ಸಂಬಂಧಿಸಿ ಅಲೋಕ್‌ ಅವರಿಗೆ ನೋಟಿಸ್‌ ನೀಡಲು ಸಿನಿಮಾ ಮತ್ತು ಟಿ.ವಿ. ಕಲಾವಿದರ ಸಂಘಟನೆ ನಿರ್ಧರಿಸಿದೆ. 

ಇವನ್ನೂ ಓದಿ

ಮನರಂಜನಾ ಲೋಕದ ಮನಮೀಟಿದ ಮಿ–ಟೂ

ಮಿ–ಟೂ ಎಂದು ಹೇಳಿದ ಇನ್ನಷ್ಟು ಮನಗಳು

ಬರಹ ಇಷ್ಟವಾಯಿತೆ?

  • 10

    Happy
  • 0

    Amused
  • 1

    Sad
  • 0

    Frustrated
  • 0

    Angry

Comments:

0 comments

Write the first review for this !