ಕೊನೆಯ ಹಂತದಲ್ಲಿ ಬಿಜೆಪಿಯನ್ನು ಕಾಡಿದ ಪ್ರತಿಮೆ ಧ್ವಂಸ

ಭಾನುವಾರ, ಜೂನ್ 16, 2019
29 °C

ಕೊನೆಯ ಹಂತದಲ್ಲಿ ಬಿಜೆಪಿಯನ್ನು ಕಾಡಿದ ಪ್ರತಿಮೆ ಧ್ವಂಸ

Published:
Updated:

ಕೋಲ್ಕತ್ತ: ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿಯ ಮುನ್ನಡೆಯನ್ನು ತಡೆಯಲೇಬೇಕು ಎಂದು ತೃಣಮೂಲ ಕಾಂಗ್ರೆಸ್‌ (ಟಿಎಂಸಿ) ಟೊಂಕ ಕಟ್ಟಿ ನಿಂತಿತ್ತು. ಹಾಗಿದ್ದರೂ, ಲೋಕಸಭೆಗೆ ಮೊದಲ ಆರು ಹಂತಗಳಲ್ಲಿ ಮತದಾನ ನಡೆದ ಕ್ಷೇತ್ರಗಳಲ್ಲಿ ಬಿಜೆಪಿಗೆ ಗಮನಾರ್ಹ ಗೆಲುವು ಸಾಧ್ಯವಾಗಿದೆ. ಆದರೆ, ಕೊನೆಯ ಹಂತದಲ್ಲಿ ಮತದಾನ ನಡೆದ ಒಂಬತ್ತು ಕ್ಷೇತ್ರಗಳ ಪೈಕಿ ಒಂದರಲ್ಲಿಯೂ ಬಿಜೆಪಿ ಗೆದ್ದಿಲ್ಲ. ಕೋಲ್ಕತ್ತ ನಗರದ ಮೂರು ಕ್ಷೇತ್ರಗಳನ್ನು ಸೇರಿಸಿ ಎಲ್ಲ ಕ್ಷೇತ್ರಗಳಲ್ಲಿಯೂ ಟಿಎಂಸಿ ಗೆದ್ದಿದೆ.

ಸಮಾಜ ಸುಧಾರಕ ಮತ್ತು ಬಂಗಾಳ ಪುನರುತ್ಥಾನದ ಮೇರು ನಾಯಕ ಈಶ್ವರಚಂದ್ರ ವಿದ್ಯಾಸಾಗರ್‌ ಅವರ ಪ್ರತಿಮೆಯ ಧ್ವಂಸ ಪ್ರಕರಣವೇ ಕೊನೆಯ ಹಂತದಲ್ಲಿ ಬಿಜೆಪಿಯ ಹಿನ್ನಡೆಗೆ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ. ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಅವರು ಮೇ 14ರಂದು ಕೋಲ್ಕತ್ತದಲ್ಲಿ ರೋಡ್‌ ಷೋ ನಡೆಸಿದ ಸಂದರ್ಭದಲ್ಲಿ ಪ್ರತಿಮೆ ಧ್ವಂಸ ಮಾಡಲಾಗಿತ್ತು. ಪಶ್ಚಿಮ ಬಂಗಾಳದ ವಿದ್ಯಾವಂತ ಮತ್ತು ನಗರ ಪ್ರದೇಶದ ಜನರಲ್ಲಿ ಈ ಘಟನೆ ಆಕ್ರೋಶ ಉಂಟು ಮಾಡಿತ್ತು. ಇದಾಗಿ ನಾಲ್ಕು ದಿನಕ್ಕೆ ಮತದಾನ ಆಗಿತ್ತು. 

ಈ ಘಟನೆಗೆ ಸಂಬಂಧಿಸಿ ಬಿಜೆಪಿ ಮತ್ತು ಟಿಎಂಸಿ ಪರಸ್ಪರ ದೂಷಿಸಿಕೊಂಡಿವೆ. ಆದರೆ, ಬಿಜೆಪಿಗೆ ಪಾಠ ಕಲಿಸಬೇಕು ಎಂದು ಪಶ್ಚಿಮ ಬಂಗಾಳದ ವಿದ್ಯಾವಂತ ವರ್ಗ ನಿರ್ಧರಿಸಿದಂತೆ ಕಾಣಿಸುತ್ತಿದೆ. ಕೋಲ್ಕತ್ತ ಉತ್ತರ, ದಕ್ಷಿಣ ಮತ್ತು ಜಾದವಪುರ ಲೋಕಸಭಾ ಕ್ಷೇತ್ರಗಳ ಫಲಿತಾಂಶದಲ್ಲಿಯೂ ಇದು ವ್ಯಕ್ತ. 

ವಿದ್ಯಾಸಾಗರರ ಪ್ರತಿಮೆ ಇದ್ದ ಕೋಲ್ಕತ್ತ ಉತ್ತರ ಕ್ಷೇತ್ರದ ಫಲಿತಾಂಶ ಗಮನಾರ್ಹ. 2009ರಿಂದ ಇಲ್ಲಿ ಸುದೀಪ್‌ ಬಂದೋಪಾಧ್ಯಾಯ ಗೆಲ್ಲುತ್ತಿದ್ದಾರೆ. ಈ ಬಾರಿಯೂ ಅವರೇ ಗೆದ್ದಿದ್ದಾರೆ. ಆದರೆ, 2014ರಲ್ಲಿ ಅವರು ಗಳಿಸಿದ ಮತಪ್ರಮಾಣ ಶೇ 36.30 ಇದ್ದರೆ, ಈ ಬಾರಿ ಅದು ಶೇ 49.96ಕ್ಕೆ ಏರಿದೆ. ವಿದ್ಯಾಸಾಗರರಿಗೆ ಸಂಬಂಧಿಸಿ ಬಂಗಾಳಿಗಳ ಭಾವನೆ ಎಷ್ಟೊಂದು ಪ್ರಬಲ ಎಂಬುದೂ ಈಗ ಸ್ಪಷ್ಟವಾಗಿದೆ. ಚಿಟ್‌ ಫಂಡ್‌ ಹಗರಣದಲ್ಲಿ ಸುದೀಪ್‌ ಅವರು ಭಾಗಿಯಾಗಿದ್ದಾರೆ ಎಂದು ಬಿಜೆಪಿ ಅಬ್ಬರದ ಪ್ರಚಾರ ಮಾಡಿದ್ದರೂ ಅದರಿಂದ ಯಾವುದೇ ಪ್ರಯೋಜನ ಆಗಿಲ್ಲ. 

ಟಿಎಂಸಿ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಅವರು ಪ್ರತಿಮೆ ಧ್ವಂಸ ಪ್ರಕರಣವನ್ನು ರಾಜಕೀಯವಾಗಿ ಬಳಸಿಕೊಂಡರು. ಬಂಗಾಳಿ ಸಂಸ್ಕೃತಿಯ ಮೇಲೆ ಬಿಜೆಪಿ ಪ್ರಹಾರ ಮಾಡುತ್ತಿದೆ ಎಂದು ದೊಡ್ಡ ಧ್ವನಿಯಲ್ಲಿ ಕೂಗಿದರು. ಚುನಾವಣಾ ಆಯೋಗವು ಪ್ರಚಾರದ ಅವಧಿಯನ್ನು ಕಡಿತಗೊಳಿಸಿದರೂ ಸಿಕ್ಕ ಎರಡು ದಿನದ ಅವಧಿಯಲ್ಲಿ ಹೇಳಬೇಕಾದುದೆಲ್ಲವನ್ನೂ ಮಮತಾ ಹೇಳಿದ್ದರು. ಅದು ದೊಡ್ಡ ಪ್ರತಿಫಲವನ್ನೇ ಅವರಿಗೆ ತಂದು ಕೊಟ್ಟಿದೆ.  

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 12

    Happy
  • 1

    Amused
  • 1

    Sad
  • 0

    Frustrated
  • 1

    Angry

Comments:

0 comments

Write the first review for this !