ಬದಲಾವಣೆಯ ಈ ದಾರಿ
ಪ್ರಕೃತಿ ರಕ್ಷಣೆ ಎನ್ನುವುದು ಕೇವಲ ಮಾತಾಗಿ ಉಳಿಯುತ್ತಿದೆ. ಅದನ್ನು ಜಾರಿಗೆ ತರದೆ ಒಂದಲ್ಲ ಒಂದು ರೀತಿಯಿಂದ ವಾತಾವರಣವನ್ನು ನಾವು ಹಾಳು ಮಾಡುತ್ತಲೇ ಇದ್ದೇವೆ. ಬದಲಾಗುತ್ತಿರುವ ಹವಾಮಾನದ ಕುರುಹನ್ನು ಪ್ರಕೃತಿ ಹೊರಚೆಲ್ಲಿದ್ದು ಹೇಗೆಲ್ಲಾ ಗೊತ್ತೇ?
* ಬಟಾಬಯಲು ಸಹರಾ ಮರುಭೂಮಿ. ಆದರೆ ಈ ವರ್ಷ ಇಲ್ಲಿ ಹಿಮಪಾತ ಉಂಟಾಗಿದೆ. ಪ್ರಪಂಚದ ಅತಿ ಉಷ್ಣ ಪ್ರದೇಶ ಎಂದೇ ಹೆಸರು ಗಳಿಸಿರುವ ಇಲ್ಲಿ ಹಿಮಪಾತ ಆಗಿದೆ ಎಂದರೆ ಹವಾಮಾನ ಬದಲಾವಣೆಯ ಸ್ಪಷ್ಟ ಕಲ್ಪನೆ ಸಿಗದಿರುತ್ತದೆಯೇ.
* ಹವಾಮಾನ ಬದಲಾವಣೆಯ ನೇರ ಪರಿಣಾಮ ಅನುಭವಿಸಿದ್ದು ಆಸ್ಟ್ರೇಲಿಯಾದಲ್ಲಿರುವ ಆಮೆಗಳು. ಹೊರಗಿನ ವಾತಾವರಣದ ಉಷ್ಣತೆಗನುಗುಣವಾಗಿ ಆಮೆಗಳು ಗಂಡು ಇಲ್ಲವೇ ಹೆಣ್ಣಾಗುತ್ತವೆ. ಸದ್ಯ ಆಸ್ಟ್ರೇಲಿಯಾದಲ್ಲಿನ ವಿಪರೀತ ಉಷ್ಣದಿಂದಾಗಿ ಶೇ 99ರಷ್ಟು ಆಮೆಗಳು ಹೆಣ್ಣು.
* ಆಸ್ಟ್ರೇಲಿಯಾದಲ್ಲಿ ಈಗ ಬೇಸಿಗೆ ಕಾಲ. ಅತಿ ಹೆಚ್ಚಿನ ಉಷ್ಣಾಂಶ (117ಡಿಗ್ರಿ ಫ್ಯಾರನ್‌ಹೀಟ್‌) ಇಲ್ಲಿ ದಾಖಲಾಗಿದೆ. ಅಲ್ಲಿಯ ಶಾಖಕ್ಕೆ ಬಾವಲಿಗಳು ಸತ್ತು ಬೀಳುತ್ತಿವೆ. ಇತ್ತೀಚೆಗೆ 400 ಬಾವಲಿ ಶಾಖದಿಂದ ಸತ್ತಿವೆ ಎಂದು ವರದಿ ಮಾಡಲಾಗಿತ್ತು. ಅಲ್ಲದೆ ರಸ್ತೆಗೆ ಹಾಕಲಾದ ಡಾಂಬರುಗಳೂ ಕರಗುತ್ತಿವೆಯಂತೆ.
.gif)
* ಅಮೆರಿಕದಲ್ಲಿಯೂ ವಿಪರೀತ ಶೀತ ದಾಖಲಾಗಿದೆ. ಶಾರ್ಕ್‌ ಮೀನುಗಳು ಚಳಿಗೆ ಹೆಪ್ಪುಗಟ್ಟಿ ಜೀವ ಕಳೆದುಕೊಳ್ಳುತ್ತಿವೆ. ಮರದ ಮೇಲೆ ವಾಸಿಸುವ ಉಡಗಳೂ (ಇಗ್ವಾನಾ) ಹೆಪ್ಪುಗಟ್ಟಿ ಕೆಳಗೆ ಉದುರುತ್ತಿವೆ.
* ಸಮುದ್ರ ಮಟ್ಟ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಫೆಸಿಫಿಕ್‌ ಸಾಗರದಲ್ಲಿದ್ದ ಎಂಟು ಮಹಾದ್ವೀಪಗಳು ಕಣ್ಮರೆಯಾಗಿವೆ.
* ಒರಟಾದ ಧ್ರುವೀಯ ಮರುಭೂಮಿ ಎಂದೇ ಹೇಳಲಾಗುತ್ತಿದ್ದ ಅಟಕಾಮಾ ಮರುಭೂಮಿಯಲ್ಲಿ ವಿಪರೀತ ಮಳೆಯಾಗಿದ್ದು, ಹೂವುಗಳು ಅರಳಿ ನಿಂತಿವೆ. ದಶಕಗಳಲ್ಲಿ ಇಲ್ಲಿ ಹೂಬಿಟ್ಟ ದಾಖಲೆಯೇ ಇರಲಿಲ್ಲ.
* ಉಷ್ಣಾಂಶ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಕೊಕೊವಾ ಗಿಡಗಳು ಚೆನ್ನಾಗಿ ಬೆಳೆಯುತ್ತಿಲ್ಲ. ಚಾಕೊಲೆಟ್‌ ತಯಾರಿಕಾ ಕಂಪೆನಿಗಳಿಗೆ ಕೊಕೊವಾ ಸಿಗುತ್ತಿಲ್ಲ. 2050ರ ಹೊತ್ತಿಗೆ ಚಾಕೊಲೇಟ್‌ ನೋಡಲು ಸಿಗುವುದಿಲ್ಲ.
* ಯುರೋಪ್‌ ದೇಶಗಳಲ್ಲಿ ಎಂದಿಗಿಂತಲೂ ವೈನ್‌ ಉತ್ಪನ್ನ ಕಡಿಮೆ ಆಗಿದೆ. ಅತಿಯಾದ ಚಳಿಯಿಂದಾಗಿ ವೈನ್‌ ಅನ್ನು ಹೆಚ್ಚು ಉತ್ಪಾದಿಸುವ ಇಟಲಿ, ಸ್ಪೇನ್‌, ಜರ್ಮನಿ, ಫ್ರಾನ್ಸ್‌ಗಳಲ್ಲಿ ಉತ್ಪಾದನೆಯೇ ಕಡಿಮೆ ಆಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.