ಬೆಂಗಳೂರು: ನಾಲ್ಕನೇ ಸುತ್ತಿನ ಕೌನ್ಸೆಲಿಂಗ್ ಬಳಿಕವೂ 27 ಸಾವಿರದಷ್ಟು ಎಂಜಿನಿಯರಿಂಗ್‌ ಸೀಟುಗಳು ಖಾಲಿ ಉಳಿದಿವೆ. ಎಂಜಿನಿಯರಿಂಗ್‌ ಕೋರ್ಸ್‌ಗೆ ಪ್ರವೇಶ ಪಡೆಯಲು ವಿದ್ಯಾರ್ಥಿಗಳಿಂದ ನಿರಾಸಕ್ತಿ ಕಂಡುಬಂದಿದೆ.
ಸಿಇಟಿ ಮೂಲಕ 65 ಸಾವಿರ ಸೀಟುಗಳ ಆಯ್ಕೆಗೆ ಅವಕಾಶ ಇತ್ತು. ವಿದ್ಯಾರ್ಥಿಗಳಿಗೆ ಅವಕಾಶ ಸಿಗಲಿ ಎಂಬ ಕಾರಣಕ್ಕೆ ಈ ಬಾರಿ 4 ಸುತ್ತು ಕೌನ್ಸೆಲಿಂಗ್ ನಡೆಸಲಾಗಿತ್ತು. ಹಾಗಿದ್ದರೂ ಒಟ್ಟು ಆಯ್ಕೆ ಮಾಡಿಕೊಂಡ ಸೀಟುಗಳ ಸಂಖ್ಯೆ 38 ಸಾವಿರದಷ್ಟು ಮಾತ್ರ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ (ಕೆಇಎ)ಹಿರಿಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.
3ನೇ ಸುತ್ತಿನ ಕೌನ್ಸೆಲಿಂಗ್ ಬಳಿಕ 22 ಸಾವಿರದಷ್ಟು ಸೀಟುಗಳು ಖಾಲಿ ಇದ್ದವು. ನಾಲ್ಕನೇ ಸುತ್ತಿನ ಬಳಿಕ ಅದರ ಬಾಕಿ ಉಳಿಸಿದ ಸೀಟುಗಳ ಸಂಖ್ಯೆ ಕಡಿಮೆಯಾಗುವ ಬದಲಿಗೆ ಏರಿಕೆಯಾಗಿದೆ.
ಪಿಜಿಸಿಇಟಿ ಅವಧಿ ವಿಸ್ತರಣೆ: 2019ರ ಪಿಜಿಸಿಇಟಿಗೆ ದಾಖಲೆಗಳ ಪರಿಶೀಲನೆ ಅವಧಿಯನ್ನು ಸೆ.3ರವರೆಗೆ ವಿಸ್ತರಿಸಲಾಗಿದೆ.
ಈವರೆಗೆ ದಾಖಲೆ ಪರಿಶೀಲನೆ ಮಾಡಿಸಿಕೊಳ್ಳದವರು ಸಹಾಯವಾಣಿ ಕೇಂದ್ರಗಳಲ್ಲಿ ಸೆ.3ರಂದು ಬೆಳಿಗ್ಗೆ 10.30ರಿಂದ ಸಂಜೆ 4.30ರೊಳಗೆ ಮಾಡಿಸಿಕೊಳ್ಳಬೇಕು ಎಂದು ಕೆಇಎ ಪ್ರಕಟಣೆ ತಿಳಿಸಿದೆ.
