ಪಿಕು, ರಾಮೊಸ್‌, ಐನೆಸ್ಟಾಗೆ ಕೊನೆಯ ವಿಶ್ವಕಪ್‌?
ಮ್ಯಾಡ್ರಿಡ್‌ (ಎಪಿ): ಒಂದು ತಲೆಮಾರನ್ನು ಪ್ರಭಾವಿಸಿದ ಸ್ಪೇನ್ ತಂಡದ ಹಿರಿಯ ಹಾಗೂ ಪ್ರಮುಖ ಆಟಗಾರರಾದ ಆ್ಯಂಡ್ರೆಸ್‌ ಐನೆಸ್ಟಾ, ಸರ್ಜಿಯೊ ರಾಮೊಸ್‌ ಹಾಗೂ ಗೆರಾರ್ಡ್‌ ಪಿಕು ಅವರಿಗೆ ಇದು ಕೊನೆಯ ವಿಶ್ವಕಪ್‌ ಆಗುವ ಸಾಧ್ಯತೆಯಿದೆ.
ಹೌದು. ರಕ್ಷಣಾ ವಿಭಾಗದ ಆಟಗಾರರಾದ ಗೆರಾರ್ಡ್‌ ಪಿಕು (31) ಅವರು ವಿಶ್ವಕಪ್‌ನ ನಂತರ ವೃತ್ತಿ ಬದುಕಿಗೆ ವಿದಾಯ ಹೇಳುವ ಯೋಚನೆಗಳಿವೆ ಎಂದು ಈಗಾಗಲೇ ಹೇಳಿದ್ದಾರೆ. 32 ವರ್ಷದ ಸರ್ಜಿಯೊ ರಾಮೊಸ್‌ ಕೂಡ ನಿವೃತ್ತಿಯಾಗುವ ಸಾಧ್ಯತೆ ಹೆಚ್ಚಿದೆ.
ಉಭಯ ಆಟಗಾರರು 2010ರ ವಿಶ್ವಕಪ್‌ನ ಸಮಯದಿಂದಲೂ ಸ್ಪೇನ್ ತಂಡದ ರಕ್ಷಣಾ ವಿಭಾಗದ ಜವಾಬ್ದಾರಿಯನ್ನು ನಿಭಾಯಿಸುತ್ತಿದ್ದಾರೆ. ಇವರಿಬ್ಬರೂ ಅನೇಕ ಪ್ರಮುಖ ಟೂರ್ನಿಗಳಲ್ಲಿ ಸ್ಪೇನ್ ತಂಡವನ್ನು ಗೆಲುವಿನ ದಡ ಸೇರಿಸಿದ್ದರು.
34 ವರ್ಷದ ಆ್ಯಂಡ್ರೆಸ್‌ ಅವರು ಕೂಡ ಈ ವಿಶ್ವಕಪ್‌ ನಂತರ ಅಂತರರಾ ಷ್ಟ್ರೀಯ ಫುಟ್‌ಬಾಲ್‌ನಿಂದ ನಿವೃತ್ತಿ ಹೊಂದುವ ಯೋಚನೆಯಲ್ಲಿದ್ದಾರೆ. ಮಿಡ್‌ಫೀಲ್ಡ್‌ ವಿಭಾಗದಲ್ಲಿ ಸ್ಪೇನ್ ತಂಡದ ಶಕ್ತಿಯಾಗಿರುವ ಐನೆಸ್ಟಾ ಇತ್ತೀಚಿನ ದಿನಗಳಲ್ಲಿ ಹಲವು ಬಾರಿ ಫಿಟ್‌ನೆಸ್‌ ಸಮಸ್ಯೆಗೆ ಒಳಗಾಗಿದ್ದರು.
ಇದೇ ಕಾರಣಕ್ಕೆ ಪ್ರಮುಖ ಟೂರ್ನಿ ಗಳಿಂದ ಹೊರಗುಳಿದಿದ್ದರು. ಐನೆಸ್ಟಾ ಅವರು 2010ರ ವಿಶ್ವಕಪ್‌ ಫೈನಲ್‌ನಲ್ಲಿ ಗೋಲು ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.