ಚಾಮುಲ್‌ನಲ್ಲಿ ಹುದ್ದೆಯ ವೇತನಕ್ಕೆ ತಕ್ಕಂತೆ ಲಂಚ ನಿಗದಿ: ಸಂಭಾಷಣೆ ವೈರಲ್‌

‘ಪ್ರಜಾವಾಣಿ’ಗೆ ಆಡಿಯೊ ತುಣುಕು ಲಭ್ಯವಾಗಿದ್ದು, ಅದರಲ್ಲಿ ಹಿಂದಿನ ಮೈತ್ರಿ ಸರ್ಕಾರದಲ್ಲಿ ಸಚಿವರಾಗಿದ್ದ ಸಾ.ರಾ.ಮಹೇಶ್‌ ಹಾಗೂ ಸಹಕಾರ ಸಚಿವರಾಗಿದ್ದ ಬಂಡೆಪ್ಪ ಕಾಶೆಂಪುರ ಅವರ ಹೆಸರುಗಳೂ ಪ್ರಸ್ತಾಪವಾಗಿವೆ. 72 ಹುದ್ದೆಗಳ ನೇಮಕಾತಿಗೆ ಸರ್ಕಾರದ ಒಪ್ಪಿಗೆ ಪಡೆಯಲು ಸಚಿವರಿಗೆ ₹2 ಕೋಟಿವರೆಗೆ ಹಣ ನೀಡಲಾಗಿದೆ ಎಂದು ನಿರ್ದೇಶಕರು ಹೇಳುವುದು ಸಂಭಾಷಣೆಯಲ್ಲಿ ಇದೆ.

ಚಾಮುಲ್‌ ನಿರ್ದೇಶಕರಲ್ಲಿ ಒಬ್ಬರಾದ ಕಿನಕಳ್ಳಿ ಮಾದಪ್ಪ ಹಾಗೂ ಯಳಂದೂರಿನ ರೈತ ಮುಖಂಡ ಗೋವಿಂದರಾಜು ಅವರ ನಡುವೆ ನಡೆದಿರುವ ಸಂಭಾಷಣೆ ತುಣುಕು ಎಂದು ಹೇಳಲಾಗುತ್ತಿದೆ.

ಈ ಬಗ್ಗೆ ಪ್ರತಿಕ್ರಿಯೆ ಪಡೆಯಲು ‘ಪ್ರಜಾವಾಣಿ’ಯು ಗೋವಿಂದರಾಜು ಅವರನ್ನು ಸಂಪರ್ಕಿಸಿದಾಗ, ಕಿನಕಳ್ಳಿ ಮಾದಪ್ಪ ಅವರೊಡನೆ ದೂರ ವಾಣಿಯಲ್ಲಿ ಮಾತನಾಡಿದ್ದನ್ನು ದೃಢ ಪಡಿಸಿದರು. ಮಾದಪ್ಪ ಅವರು, ‘ಆಡಿಯೊ ಬಗ್ಗೆ ನನಗೇನೂ ಗೊತ್ತಿಲ್ಲ. ನಾಳೆ ಕರೆ ಮಾಡಿ’ ಎಂದು ಹೇಳಿ ಕರೆ ಕಡಿತಗೊಳಿಸಿದರು.

ಸಂಭಾಷಣೆಯಲ್ಲಿ ಏನಿದೆ?: ನೇಮಕಾತಿ ಪ್ರಕ್ರಿಯೆ ಸಂದರ್ಭದಲ್ಲಿ ಈ ಸಂಭಾಷಣೆ ನಡೆದಿದೆ ಎಂದು ಹೇಳಲಾಗುತ್ತಿದೆ. ‘ನೇಮಕಾತಿಗೆ ಸರ್ಕಾರದ ಒಪ್ಪಿಗೆ ಪಡೆಯಲು ಚಾಮುಲ್‌ ಅಧ್ಯಕ್ಷರು ಸಚಿವರಾದ ಸಾ.ರಾ.ಮಹೇಶ್‌ ಹಾಗೂ ಬಂಡೆಪ್ಪ ಕಾಶಂಪುರ ಅವರಿಗೆ ₹ 2 ಕೋಟಿ ನೀಡಿದ್ದಾರೆ. ಒಂದೊಂದು ಹುದ್ದೆಗೆ ₹ 5 ಲಕ್ಷ, ₹ 10 ಲಕ್ಷ, ₹ 15 ಲಕ್ಷ... ಹೀಗೆ ಕೊಡಲಾಗಿದೆ. ಮೇಲ್ಮಟ್ಟದಲ್ಲಿ ₹ 2 ಕೋಟಿ ನೀಡಲಾಗಿದೆ. ಅದನ್ನು ಯಾರು ಕೊಡುತ್ತಾರೆ?’ ಎಂದು ನಿರ್ದೇಶಕ ಹೇಳುತ್ತಿರುವುದು ಆಡಿಯೊದಲ್ಲಿದೆ.