ಫಿಫಾ ವಿಶ್ವಕಪ್‌ ಫುಟ್‌ಬಾಲ್‌: ಬ್ರೆಜಿಲ್‌ ತಂಡಕ್ಕೆ ಅಮೋಘ ಜಯ
ವಿಯೆನ್ನಾ (ಎಎಫ್‌ಪಿ): ಗೇಬ್ರಿಯಲ್‌, ನೇಮರ್‌ ಹಾಗೂ ಫಿಲಿಪ್‌ ಕುಟಿನ್ಹೊ ಅವರು ಗಳಿಸಿದ ತಲಾ ಒಂದು ಗೋಲುಗಳ ನೆರವಿನಿಂದ ಬ್ರೆಜಿಲ್‌ ತಂಡವು ಫಿಫಾ ವಿಶ್ವಕಪ್‌ ಫುಟ್‌ಬಾಲ್‌ ಟೂರ್ನಿಯ ಅಭ್ಯಾಸ ಪಂದ್ಯದಲ್ಲಿ ಜಯಿಸಿದೆ.
ಭಾನುವಾರ ರಾತ್ರಿ ನಡೆದ ಪಂದ್ಯದಲ್ಲಿ ಬ್ರೆಜಿಲ್‌ ತಂಡವು ಆಸ್ಟ್ರಿಯಾ ತಂಡವನ್ನು 3–0 ಗೋಲುಗಳಿಂದ ಮಣಿಸಿತು.
ಮೊದಲನೇ ಅಭ್ಯಾಸ ಪಂದ್ಯದಲ್ಲಿ ಕ್ರೊವೇಷ್ಯಾ ವಿರುದ್ಧ ಜಯಿಸಿದ್ದ ಬ್ರೆಜಿಲ್‌ ತಂಡದ ಆಟಗಾರರು ಪಂದ್ಯದ ಆರಂಭದಿಂದಲೇ ಉತ್ತಮ ಸಾಮರ್ಥ್ಯ ತೋರಿದರು. ಚುರುಕಿನ ಪಾಸಿಂಗ್‌ ಮೂಲಕ ಎದುರಾಳಿ ಆಟಗಾರರ ಮೇಲೆ ಒತ್ತಡ ಹೆಚ್ಚಿಸುವಲ್ಲಿ ಸಾಂಬಾ ನಾಡಿನ ಆಟಗಾರರು ಯಶಸ್ವಿಯಾದರು.
ಪಂದ್ಯದ 35ನೇ ನಿಮಿಷದಲ್ಲಿ ಮ್ಯಾಂಚೆಸ್ಟರ್‌ ಯುನೈಟೆಡ್‌ನ ಸ್ಟ್ರೈಕರ್‌ ಆಗಿರುವ ಗೇಬ್ರಿಯಲ್‌ ಜೀಸಸ್‌ ಅವರು ಗೋಲು ಗಳಿಸಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು.
ಮೂರು ತಿಂಗಳ ಹಿಂದೆ ಪಾದದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಪ್ರಮುಖ ಆಟಗಾರ ನೇಮರ್‌ ಅವರು 66ನೇ ನಿಮಿಷದಲ್ಲಿ ಗೋಲು ದಾಖಲಿಸಿ ತಂಡದ ಮುನ್ನಡೆ ಹೆಚ್ಚಿಸಿದರು. ಲಾಂಗ್‌ ಪಾಸ್‌ ಮೂಲಕ ಸಿಕ್ಕ ಚೆಂಡನ್ನು ಅವರು ಸುಲಭವಾಗಿ ಗುರಿ ಮುಟ್ಟಿಸಿದರು.
ಬಾರ್ಸಿಲೋನಾ ಕ್ಲಬ್‌ನಲ್ಲಿ ಮಿಡ್‌ಫೀಲ್ಡರ್‌ ಆಗಿ ಆಡುವ ಫಿಲಿಪ್‌ ಕುಟಿನ್ಹೊ ಅವರು 69ನೇ ನಿಮಿಷದಲ್ಲಿ ಗೋಲು ಗಳಿಸಿದರು.
ಈ ಹಂತದಲ್ಲಿ ಆಸ್ಟ್ರಿಯಾ ತಂಡದ ಆಟಗಾರರು ಕೆಲ ಹೊತ್ತು ಪ್ರಬಲ ಪೈಪೋಟಿ ನೀಡಿದರು. ಹಲವು ಬಾರಿ ಗೋಲು ಗಳಿಸಲು ಪ್ರಯತ್ನಪಟ್ಟರು. ಬ್ರೆಜಿಲ್‌ ತಂಡದ ರಕ್ಷಣಾ ವಿಭಾಗದ ಆಟಗಾರರ ಪ್ರತಿತಂತ್ರಗಳಿಂದಾಗಿ ಆಸ್ಟ್ರೀಯಾ ಗೋಲು ದಾಖಲಿಸಲು ಸಾಧ್ಯವಾಗಲಿಲ್ಲ.
ಈ ವಿಶ್ವಕಪ್‌ನಲ್ಲಿ ಸ್ಪರ್ಧಿಸಲು ಆಸ್ಟ್ರೀಯಾ ತಂಡವು ಅರ್ಹತೆ ಗಳಿಸಿಲ್ಲ. 1998ರಿಂದ ಆಸ್ಟ್ರೀಯಾ ತಂಡವು ವಿಶ್ವಕಪ್‌ನಲ್ಲಿ ಆಡಿಲ್ಲ. ಬ್ರೆಜಿಲ್‌ ತಂಡವು ಜೂನ್ 2017ರಿಂದ ಇಲ್ಲಿಯವರೆಗೂ ಆಡಿರುವ 10 ಪಂದ್ಯಗಳಲ್ಲೂ ಜಯ ಗಳಿಸಿದೆ.
ನೂತನ ಕೋಚ್‌ ಟಿಟೆ ಅವರ ತರಬೇತಿಯಲ್ಲಿ ವಿಶ್ವಾಸದಿಂದ ಬೀಗುತ್ತಿರುವ ಬ್ರೆಜಿಲ್‌ ತಂಡವು ‘ಇ’ ಗುಂಪಿನಲ್ಲಿದೆ. ಜೂನ್ 17ರಂದು ನಡೆಯುವ ತನ್ನ ಮೊದಲ ಪಂದ್ಯದಲ್ಲಿ ಅದು ಸ್ವಿಟ್ಜರ್‌ಲೆಂಡ್‌ ವಿರುದ್ಧ ಸೆಣಸಲಿದೆ. ಈ ಗುಂಪಿನಲ್ಲಿ ಕೊಸ್ಟಾರಿಕ ಹಾಗೂ ಸರ್ಬಿಯಾ ತಂಡಗಳಿವೆ.
ರಷ್ಯಾಗೆ ಬಂದಿಳಿದ ಬ್ರೆಜಿಲ್‌ ತಂಡ (ಸೊಚಿ, ಎಎಫ್‌ಪಿ): ಆಡಿದ ಎರಡೂ ಅಭ್ಯಾಸ ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ ಸಂತಸದಲ್ಲಿರುವ ಬ್ರೆಜಿಲ್‌ ತಂಡದ ಆಟಗಾರರು ಸೋಮವಾರ ಬೆಳಿಗ್ಗೆ ವಿಶ್ವಕಪ್‌ ಟೂರ್ನಿ ಆತಿಥ್ಯ ವಹಿಸಿರುವ ರಷ್ಯಾಗೆ ಬಂದಿಳಿದಿದ್ದಾರೆ.
ಒಂದು ತಿಂಗಳ ಕಾಲ ನಡೆಯುವ ಈ ಟೂರ್ನಿಗಾಗಿ ಇಲ್ಲಿನ ಬ್ಲ್ಯಾಕ್‌ ಸೀ ರೆಸಾರ್ಟ್‌ನಲ್ಲಿ ತಂಡದ ಆಟಗಾರರು ವಾಸವಿರಲಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.