ಮಂಗಳೂರು: ರಾಷ್ಟ್ರಪತಿ ಮಹಾತ್ಮಗಾಂಧಿ ಅವರ ಸಾವನ್ನು ಸಂಭ್ರಮಿಸಿರುವ ಹಿಂದೂ ಮಹಾಸಭಾದ ಕೃತ್ಯವನ್ನು ಖಂಡಿಸಿ ರಾಜ್ಯದಾದ್ಯಂತ ಸೋಮವಾರ(ಫೆ. 4) ಪ್ರತಿಭಟನೆ ನಡೆಸಲಾಗುವುದು ಎಂದು ಕೆಪಿಸಿಸಿ ಅಧ್ಯಕ್ಷ ದಿನೇಶ್ ಗುಂಡೂರಾವ್ ತಿಳಿಸಿದರು.
‘ಮಹಾತ್ಮರು ಹುತಾತ್ಮರಾದ ದಿನ (ಜನವರಿ 30) ಹಿಂದೂ ಮಹಾಸಭಾ ಅವರ ಸಾವನ್ನು ಸಂಭ್ರಮಿಸಿದೆ.
ಈ ಸಮಯದಲ್ಲಿ ಆ ಸಂಘಟನೆಯ ನಾಯಕಿ ಗಾಂಧೀಜಿಯವರ ಪ್ರತಿಕೃತಿಗೆ ಗುಂಡಿಕ್ಕಿ ವಿಕೃತಿ ಮೆರೆದಿದ್ದಾಳೆ’ ಎಂದು ಅವರು ಕಿಡಿಕಾರಿದರು.
ಹಿಂದೂ ಮಹಾಸಭಾ ಮಾಡುತ್ತಿರುವ ಕೆಲಸಗಳಿಗೆ ಕೇಂದ್ರದ ಬಿಜೆಪಿ ಸರ್ಕಾರ ಮತ್ತು ಪ್ರಧಾನಿ ಮೋದಿಯವರ ಬೆಂಬಲವಿದೆ. ಈ ಕಾರಣದಿಂದಾಗಿಯೇ ಆ ಸಂಘಟನೆ ಬಹಿರಂಗವಾಗಿ ದ್ವೇಷ ಬಿತ್ತುವ ಕೆಲಸ ಮಾಡುತ್ತಿದೆ. ಕೇಂದ್ರ ಸರ್ಕಾರ ತಕ್ಷಣವೇ ಹಿಂದೂ ಮಹಾಸಭಾ ವಿರುದ್ಧ ಕಠಿಣ ಕ್ರಮ ಜರುಗಿಸಬೇಕು ಎಂದು ಆಗ್ರಹಿಸಿದರು.
