ಬೆಂಗಳೂರು: ಕಲ್ಲಿದ್ದಲು ಪುಡಿ ಜೊತೆ ಬಚ್ಚಿಟ್ಟು ಟ್ರಕ್‌ನಲ್ಲಿ ಸಾಗಿಸುತ್ತಿದ್ದ 1,020 ಕೆ.ಜಿ ಗಾಂಜಾವನ್ನು ಜಪ್ತಿ ಮಾಡಿರುವ ಮಾದಕ ವಸ್ತು ಕಳ್ಳಸಾಗಣೆ ನಿಯಂತ್ರಣ ದಳದ (ಎನ್‌ಸಿಬಿ) ಅಧಿಕಾರಿಗಳು, ಬೀದರ್‌ನ ಚಾಲಕನೊಬ್ಬನನ್ನು ಬಂಧಿಸಿದ್ದಾರೆ.
ಆಂಧ್ರಪ್ರದೇಶ ನೋಂದಣಿ ಸಂಖ್ಯೆಯ ಟ್ರಕ್‌ನಲ್ಲಿ ಕಲ್ಲಿದ್ದಲು ಪುಡಿಯ ಜೊತೆ ಗಾಂಜಾವನ್ನು ತೆಲಂಗಾಣಕ್ಕೆ ಸಾಗಿಸಲಾಗುತ್ತಿತ್ತು. ಆ ಬಗ್ಗೆ ಮಾಹಿತಿ ಪಡೆದು ಹೈದರಾಬಾದ್‌ನ ರಾಜೇಂದ್ರನಗರದಲ್ಲಿ ಟ್ರಕ್‌ ತಡೆದಿದ್ದ ಅಧಿಕಾರಿಗಳು, ಚಾಲಕನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದರು.
ಟ್ರಕ್‌ನಲ್ಲಿದ್ದ ಕಲ್ಲಿದ್ದಲು ಪುಡಿಯನ್ನು ಜೆಸಿಬಿ ಯಂತ್ರದಿಂದ ಅಗೆದು ತೆಗೆಸಿದ್ದ ಅಧಿಕಾರಿಗಳು, ಬಚ್ಚಿಟ್ಟಿದ್ದ ಗಾಂಜಾ ಪೊಟ್ಟಣಗಳನ್ನು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾದರು.
‘ಕರ್ನಾಟಕ, ತೆಲಂಗಾಣ, ಆಂಧ್ರಪ್ರದೇಶ ರಾಜ್ಯಗಳಲ್ಲಿ ಗಾಂಜಾ ಸಾಗಣೆ ಜಾಲ ಸಕ್ರಿಯವಾಗಿದೆ. ಟ್ರಕ್‌ನಲ್ಲಿ ಕಲ್ಲಿದ್ದಲು ಪುಡಿ ಜೊತೆ ಗಾಂಜಾ ಸಾಗಿಸುವ ಮಾರ್ಗ ಕಂಡುಕೊಂಡಿದ್ದು ಇದೀಗ ಪತ್ತೆಯಾಗಿದೆ’ ಎಂದು ಎನ್‌ಸಿಬಿ ಅಧಿಕಾರಿಯೊಬ್ಬರು ಹೇಳಿದರು.
