7

ಗೌರಿ ಹತ್ಯೆ: ಕೃತ್ಯ ಮರುಸೃಷ್ಟಿ

Published:
Updated:

ಬೆಂಗಳೂರು: ಪತ್ರಕರ್ತೆ ಗೌರಿ ಲಂಕೇಶ್ ಹತ್ಯೆ ಪ್ರಕರಣದ ಆರೋಪಿ ಪರಶುರಾಮ ವಾಘ್ಮೋರೆಯನ್ನು ಘಟನಾ ಸ್ಥಳಕ್ಕೆ ಶುಕ್ರವಾರ ಸಂಜೆ ಕರೆದೊಯ್ದಿದ್ದ ಎಸ್‌ಐಟಿ ಅಧಿಕಾರಿಗಳು, ಹತ್ಯೆ ಕೃತ್ಯವನ್ನು ಮರುಸೃಷ್ಟಿಸಿದರು.

ವಾಘ್ಮೋರೆಯನ್ನು ಕಸ್ಟಡಿಗೆ ಪಡೆದು ವಿಚಾರಣೆ ನಡೆಸುತ್ತಿರುವ ಅಧಿಕಾರಿಗಳು, ಆತನನ್ನು ಬೆಳಗಾವಿ, ವಿಜಯ‍ಪುರ ಹಾಗೂ ಮಹಾರಾಷ್ಟ್ರದ ಕೆಲವು ಕಡೆ ಕರೆದೊಯ್ದು ಮಾಹಿತಿ ಕಲೆಹಾಕಿದ್ದಾರೆ. ಅಲ್ಲಿಂದ ಆತನನ್ನು ನಗರಕ್ಕೆ ಶುಕ್ರವಾರ ಕರೆತಂದಿದ್ದ ಅಧಿಕಾರಿಗಳು, ರಾಜರಾಜೇಶ್ವರಿ ನಗರದಲ್ಲಿ ಸುತ್ತಾಡಿಸಿದ್ದಾರೆ.

‘ಕೃತ್ಯ ಎಸಗಿದ್ದನ್ನು ಈಗಾಗಲೇ ಆರೋಪಿ ಒಪ್ಪಿಕೊಂಡಿದ್ದಾನೆ. ಆದರೂ ಹತ್ಯೆಯ ಸ್ವರೂಪದ ಬಗ್ಗೆ ತಿಳಿದುಕೊಳ್ಳಬೇಕು. ಅದಕ್ಕಾಗಿ ಈ ಮರುಸೃಷ್ಟಿ ಮಾಡಿದೆವು. ಆರೋಪಿಯು ಸಹಕರಿಸಿದ’ ಎಂದು ಎಸ್ಐಟಿ ಅಧಿಕಾರಿಯೊಬ್ಬರು ತಿಳಿಸಿದರು.

‘ಆರೋಪಿಗೆ ಹೆಲ್ಮೆಟ್‌ ಹಾಕಿಸಿ, ಕೈಗೆ ಆಟಿಕೆ ಪಿಸ್ತೂಲ್ ಕೊಟ್ಟಿದ್ದೆವು. ನಮ್ಮ ಸಿಬ್ಬಂದಿಯೇ ಚಲಾಯಿಸುತ್ತಿದ್ದ ಬೈಕ್‌ನ ಹಿಂಬದಿಯಲ್ಲಿ ಆತನನ್ನು ಹತ್ತಿಸಿಕೊಂಡು ಗೌರಿಯವರ ಮನೆ ಬಳಿ ಕರೆದೊಯ್ಯಲಾಗಿತ್ತು. ಅತ್ತ ಕಾರಿನಲ್ಲಿ ಬಂದಿಳಿದಿದ್ದ ಸಿಬ್ಬಂದಿ, ಗೇಟ್‌ ತೆಗೆದು ಮನೆಯೊಳಗೆ ಹೊರಟಿದ್ದರು. ಆಗ ಬೈಕ್‌ನಿಂದ ಇಳಿದಿದ್ದ ವಾಘ್ಮೋರೆ, ಸಿಬ್ಬಂದಿಗೆ ಗುಂಡು ಹಾರಿಸಿದಂತೆ ನಟಿಸಿದ. ನಂತರ, ಬೈಕ್‌ ಹತ್ತಿ ಸ್ಥಳದಿಂದ ಹೊರಟು ಹೋದ. ತಾನು ಪರಾರಿಯಾಗಿದ್ದ ರಸ್ತೆಯನ್ನು ಆತ  ತೋರಿಸಿದ’ ಎಂದು ಅಧಿಕಾರಿ ವಿವರಿಸಿದರು.

‘ಮೈಸೂರು ರಸ್ತೆಯಿಂದ ಒಳ ರಸ್ತೆ ಮೂಲಕ ಗೌರಿಯವರ ಮನೆಗೆ ಹೋದ ಹಾಗೂ ಅಲ್ಲಿಂದ ಪರಾರಿಯಾಗಲು ಬಳಸಿದ ರಸ್ತೆಗಳನ್ನು ಆತ ಗುರುತು ಹಿಡಿದ.  ಹತ್ಯೆಗೂ ಮುನ್ನ ಗೌರಿ ಅವರ ಬರುವಿಕೆಗಾಗಿ ಕಾಯುತ್ತ ಉದ್ಯಾನದಲ್ಲಿ ಕುಳಿತಿ
ದ್ದನ್ನು ತೋರಿಸಿದ. ಕೃತ್ಯವನ್ನು ಮೂರು ಬಾರಿ ಮರುಸೃಷ್ಟಿ ಮಾಡಿ ಚಿತ್ರೀಕರಿಸಿಕೊಳ್ಳಲಾಗಿದೆ. ಅದನ್ನು ನ್ಯಾಯಾಲಯಕ್ಕೆ ನೀಡಲಾಗುವುದು ಎಂದರು.

‘ಗೌರಿಯವರನ್ನು ಹತ್ಯೆಗೈದ ಆರೋಪಿ, ಪರಾರಿಯಾಗುತ್ತಿದ್ದ ದೃಶ್ಯಗಳು ಕೆಲವು ಕಡೆಯ ಸಿ.ಸಿ.ಟಿ.ವಿ ಕ್ಯಾಮೆರಾಗಳಲ್ಲಿ ಸೆರೆಯಾಗಿವೆ. ಮರುಸೃಷ್ಟಿ ವೇಳೆ ಆರೋಪಿ ಸಂಚರಿಸಿದ ರಸ್ತೆಯುದ್ದಕ್ಕೂ ಇರುವ ಸಿ.ಸಿ.ಟಿ.ವಿ ಕ್ಯಾಮೆರಾ ದೃಶ್ಯಗಳನ್ನು ಸಂಗ್ರಹಿಸಿದ್ದೇವೆ. ಅವುಗಳನ್ನು ಮೂಲ ದೃಶ್ಯಗಳೊಂದಿಗೆ ಹೋಲಿಕೆ ಮಾಡಿ ಪರಿಶೀಲಿಸಲಾಗುವುದು’ ಎಂದು ಅಧಿಕಾರಿ ಹೇಳಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !