3
ರತ್ನಪ್ರಭಾ ಮುಂದುವರಿಕೆಗೆ ಅಸಮಾಧಾನ

ವಿಜಯಭಾಸ್ಕರ್‌ ಪರ ಎಚ್‌ಡಿಡಿ ‘ಬ್ಯಾಟಿಂಗ್‌’?

Published:
Updated:
ಕುಮಾರಸ್ವಾಮಿ

ಬೆಂಗಳೂರು: ರಾಜ್ಯ ಸರ್ಕಾರದ ನೂತನ ಮುಖ್ಯಕಾರ್ಯದರ್ಶಿಯಾಗಿ ಟಿ.ಎಂ. ವಿಜಯಭಾಸ್ಕರ್‌ ನೇಮಕಗೊಂಡಿರುವುದರ ಹಿಂದೆ ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡರ ಗಟ್ಟಿ ನಿಲುವು ಮತ್ತು ಐಎಎಸ್‌ ಅಧಿಕಾರಿಗಳ ಪ್ರಬಲ ಒತ್ತಡವೂ ಕೆಲಸ ಮಾಡಿದೆ.

ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಇತ್ತೀಚೆಗೆ ದೆಹಲಿಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಹಿಂದಿನ ಮುಖ್ಯಕಾರ್ಯದರ್ಶಿ ಕೆ. ರತ್ನಪ್ರಭಾ ಸೇವಾ ಅವಧಿಯನ್ನು ಇನ್ನೂ ಮೂರು ತಿಂಗಳು ವಿಸ್ತರಿಸುವ ಸಂಬಂಧ ಪ್ರಧಾನಿಗೆ ಪತ್ರ ಬರೆದಿದ್ದರು. ಎರಡನೇ ಬಾರಿ ಅವಧಿ ವಿಸ್ತರಣೆಗೆ ತೀವ್ರ ಯತ್ನ ನಡೆಸಿದ್ದರು.

ರತ್ನಪ್ರಭಾ ಪರವಾಗಿದ್ದ ಲಾಬಿ ಸದ್ದುಗದ್ದಲವಿಲ್ಲದೆ ಎರಡನೆ ಬಾರಿಗೆ ಅವಧಿಯನ್ನು ಮುಂದುವರಿಸುವ ಬಗ್ಗೆ ಕುಮಾರಸ್ವಾಮಿಯವರ ಮನವೊಲಿಸಿ ಪತ್ರವನ್ನು ಸಿದ್ಧಪಡಿಸುವಲ್ಲಿ ಯಶಸ್ವಿಯಾಗಿತ್ತು.

ಅಲ್ಲದೆ, ಅಷ್ಟೇ ರಹಸ್ಯವಾಗಿ ಪತ್ರವನ್ನು ಪ್ರಧಾನಿ ಕಚೇರಿಗೆ ತಲುಪುವಂತೆ ನೋಡಿಕೊಂಡಿತ್ತು. ಪ್ರಧಾನಿ ಕಚೇರಿಯಲ್ಲೂ ಈ ಕಡತ ಬೇಗನೆ ವಿಲೇವಾರಿಗೊಳಿಸುವ ನಿಟ್ಟಿ
ನಲ್ಲೂ ಕೆಲಸ ಮಾಡಿತ್ತು. ಆದರೆ, ಆ ಪತ್ರ ಪ್ರಧಾನಿ ಕಚೇರಿಗೆ ಹೋಗುವುದಕ್ಕೆ ಮೊದಲೇ ಮಾಧ್ಯಮಗಳಿಗೆ ಸೋರಿಕೆ ಆಗಿತ್ತು. ಈ ವಿಷಯ ಎಚ್‌.ಡಿ. ದೇವೇಗೌಡ ಅವರ ಗಮನಕ್ಕೂ ಬಂದಿತು ಎಂದು ಮೂಲಗಳು ‘ಪ್ರಜಾವಾಣಿ’ಗೆ ತಿಳಿಸಿವೆ.

ತಕ್ಷಣವೇ ದೇವೇಗೌಡ ಅವರು ಕುಮಾರಸ್ವಾಮಿಗೆ ತಿಳಿಹೇಳಿ ಪತ್ರವನ್ನು ಹಿಂದಕ್ಕೆ ಪಡೆಯುವಂತೆ ತಾಕೀತು ಮಾಡಿದರು. ಅಲ್ಲದೆ, ಪ್ರಧಾನಮಂತ್ರಿ ಕಚೇರಿ ರಾಜ್ಯ ಸಚಿವ ಜಿತೇಂದ್ರ ಸಿಂಗ್‌ ಅವರಿಗೆ ದೂರವಾಣಿ ಕರೆ ಮಾಡಿ, ‘ರತ್ನಪ್ರಭಾ ಅವರನ್ನು ಮುಂದುವರಿಸುವ ಇಚ್ಛೆ ಇಲ್ಲ. ಪತ್ರವನ್ನು ತಡೆ ಹಿಡಿಯಬೇಕು ಎಂದೂ ಮನವಿ ಮಾಡಿದರು. ಅದಕ್ಕಿರುವ ಎರಡು ಮೂರು ಕಾರಣಗಳನ್ನೂ ನೀಡಿದರು. ಇದರ ಪರಿಣಾಮ, ಪ್ರಧಾನಿ ಕಚೇರಿ ಪತ್ರವನ್ನು ಹಿಂದಕ್ಕೆ ಕಳುಹಿಸಿತು’ ಎಂದು ದೇವೇಗೌಡರ ಆಪ್ತ ಮೂಲಗಳು ತಿಳಿಸಿವೆ.

ರತ್ನಪ್ರಭಾ ಮುಂದುವರಿಸುವುದು, ಲಕ್ಷ್ಮೀನಾರಾಯಣ ಅವರನ್ನು ಮುಖ್ಯಮಂತ್ರಿ ಪ್ರಧಾನ ಕಾರ್ಯದರ್ಶಿ ಆಗಿ ಉಳಿಸಿಕೊಳ್ಳುವ ಬಗ್ಗೆ ದೇವೇಗೌಡ ಅವರು ತೀವ್ರ ಆಕ್ಷೇಪ ಹೊಂದಿದ್ದರು. ರತ್ನಪ್ರಭಾ ಅವರಿಗೆ ಇನ್ನೂ ಮೂರು ತಿಂಗಳು ಅವಕಾಶ ನೀಡುವ ಸಂಬಂಧ ಸಾಕಷ್ಟು ಐಎಎಸ್ ಅಧಿಕಾರಿಗಳು ಅಸಮಾಧಾನ ವ್ಯಕ್ತಪಡಿಸಿದ್ದರು. ಅಲ್ಲದೆ, ವಿಜಯಭಾಸ್ಕರ್‌ ಅವರಿಗೆ ಅವಕಾಶ ನೀಡ
ಬೇಕು ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದರು.

ಸಮ್ಮಿಶ್ರ ಸರ್ಕಾರ ಯಾವುದೇ ಅಡೆ– ತಡೆ ಇಲ್ಲದೆ, ಹಗರಣ ಮುಕ್ತವಾಗಿ ನಡೆಯಬೇಕಿದ್ದರೆ, ದಕ್ಷ ಅಧಿಕಾರಿಗಳ ನೆರವು ಬೇಕು ಎಂಬುದು ದೇವೇಗೌಡ ಅವರ ಗಟ್ಟಿ ನಿಲುವು ಆಗಿದ್ದರಿಂದ ಆಯಕಟ್ಟಿನ ಜಾಗಕ್ಕೆ ಕಟ್ಟುನಿಟ್ಟಿನ, ದಕ್ಷ ಅಧಿಕಾರಿಗಳನ್ನು ತರಲಾಗಿದೆ. ಆಡಳಿತದಲ್ಲಿ ಹಸ್ತಕ್ಷೇಪ ಬೇಡ ಎಂಬ ಕಾರಣಕ್ಕೆ ದೇವೇಗೌಡರು ದೂರ ಉಳಿದಿದ್ದರು. ಆದರೆ, ಕೆಲವರು ಇದರ ದುರುಪಯೋಗ ಪಡೆಯುವುದನ್ನು ಗಮನಿಸಿದ ಅವರು ಅಖಾಡಕ್ಕೆ ಇಳಿಯಬೇಕಾಯಿತು ಎಂದು ಅವರ ಆಪ್ತ ಮೂಲಗಳು ಹೇಳಿವೆ.

ಕೆಲವು ಅಧಿಕಾರಿಗಳು ಹಿಂದಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಕುಮಾರಸ್ವಾಮಿ ಸರ್ಕಾರದ ಮಾಹಿತಿಗಳನ್ನು ಸೋರಿಕೆ ಮಾಡುವುದರ ಜೊತೆಗೆ, ಮುಕ್ತವಾಗಿ ಕೆಲಸ ಮಾಡುವುದಕ್ಕೂ ಅವಕಾಶ ನೀಡುವುದಿಲ್ಲ. ಇದರಿಂದ ಕುಮಾರಸ್ವಾಮಿ ಉತ್ತಮವಾಗಿ ಕೆಲಸ ಮಾಡುವುದು ಕಷ್ಟ ಎಂಬ ಅಭಿಪ್ರಾಯ ಗೌಡರದ್ದಾಗಿದೆ ಎಂದು ಮೂಲಗಳು ಹೇಳಿವೆ.

ಅಧಿಕಾರಿಗಳ ಮೂಲಕ ಸಿದ್ದರಾಮಯ್ಯ ಆಡಳಿತದ ಸೂತ್ರವನ್ನು ಪರೋಕ್ಷವಾಗಿ ಹಿಡಿಯಲು ಅವಕಾಶ ನೀಡಬಾರದು. ಅದಕ್ಕೆ ಅವಕಾಶ ಕೊಟ್ಟರೆ ಕುಮಾರಸ್ವಾಮಿ ತೊಂದರೆ ಸಿಲುಕುತ್ತಾರೆ ಎಂಬುದು ದೇವೇಗೌಡರ ಖಚಿತ ನಿಲುವು ಎಂದು ಗೌಡರ ಆಪ್ತ ಮೂಲಗಳು ಹೇಳಿವೆ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !