ಈ ಬಗ್ಗೆ ‘ಪ್ರಜಾವಾಣಿ’ಯೊಂದಿಗೆ ಮಾತನಾಡಿದ ಶಿವಪುರ ಗ್ರಾಮದ ಪೋಷಕ ಎಂ.ಜೆ.ನಾಗರಾಜ್, ‘ತಾಳಿಕಟ್ಟೆಯ ಸಂದೀಪನಿ ಶಾಲೆಯಲ್ಲಿ ನನ್ನ ಮಗ 6ನೇ ತರಗತಿ ಹಾಗೂ ಮಗಳು 2ನೇ ತರಗತಿಯಲ್ಲಿ ಓದುತ್ತಿದ್ದಾರೆ. ಶಾಲೆಯವರು ಒಬ್ಬರಿಗೆ ₹ 27,000 ಶುಲ್ಕ ನಿಗದಿಪಡಿಸಿದ್ದು, ಇಬ್ಬರು ಮಕ್ಕಳ ₹ 54,000 ಶುಲ್ಕವನ್ನು ಆರಂಭದಲ್ಲೇ ಪಾವತಿ ಮಾಡಿದ್ದೇನೆ. ಶುಲ್ಕ ಕಟ್ಟಿಸಿಕೊಂಡ ದೀಪಾ ಎಂಬುವರನ್ನು ರಸೀದಿ ಕೇಳಿದಾಗ ‘ಕಂಪ್ಯೂಟರ್ ಸರಿ ಇಲ್ಲ, ಮಕ್ಕಳ ಕೈಲಿ ಕೊಟ್ಟು ಕಳಿಸುತ್ತೇವೆ’ ಎಂದು ಹೇಳಿದ್ದರು. ನಂತರ ಕೈಯಿಂದ ಬರೆದ ರಸೀದಿ ಕಳಿಸಿದ್ದು, ಅದನ್ನು ತೋರಿಸಿದರೆ ಆಡಳಿತ ಮಂಡಳಿಯವರು ‘ದೀಪಾ ನಕಲಿ ಬಿಲ್ ಬುಕ್ ಮಾಡಿಸಿ ರಸೀದಿ ನೀಡಿದ್ದಾರೆ’ ಎನ್ನುತ್ತಿದ್ದಾರೆ’ ಎಂದು ದೂರಿದರು.