ಪಾಲಿಕೆ ಕಚೇರಿಗೆ ಬೆಂಕಿ: ಕಡತ ಭಸ್ಮ

7

ಪಾಲಿಕೆ ಕಚೇರಿಗೆ ಬೆಂಕಿ: ಕಡತ ಭಸ್ಮ

Published:
Updated:
Deccan Herald

ಹುಬ್ಬಳ್ಳಿ: ಇಲ್ಲಿನ ಮಹಾನಗರ ಪಾಲಿಕೆಯ ದಕ್ಷಿಣ ವಲಯ ಕಾರ್ಯನಿರ್ವಾಹಕ ಎಂಜಿನಿಯರ್‌ ಕಚೇರಿಗೆ ಸೋಮವಾರ ಬೆಂಕಿ ಬಿದ್ದು ಮಹತ್ವದ ಕಡತಗಳು, ಕಂಪ್ಯೂಟರ್‌ ಹಾಗೂ ಕುರ್ಚಿಗಳು ಸುಟ್ಟು ಕರಕಲಾಗಿವೆ.

ಶಾರ್ಟ್‌ ಸರ್ಕಿಟ್‌ನಿಂದ ನಸುಕಿನ 4ರಿಂದ 5 ಗಂಟೆ ಮಧ್ಯೆ ಬೆಂಕಿ ಹೊತ್ತಿಕೊಂಡಿರಬಹುದು ಎಂದು ಅಂದಾಜಿಸಲಾಗಿದ್ದು, ಪಾಲಿಕೆ ಕಂಟ್ರೋಲ್‌ ರೂಂ ಸಿಬ್ಬಂದಿ ಹೊಗೆ ನೋಡಿ ಅಗ್ನಿಶಾಮಕ ದಳಕ್ಕೆ ಮಾಹಿತಿ ನೀಡಿದ್ದಾರೆ. ತಕ್ಷಣ ಬೆಂಕಿ ನಂದಿಸಲಾಗಿದೆ.

ಎರಡು ಅಲ್ಮೆರಾಗಳಲ್ಲಿದ್ದ ಗುತ್ತಿಗೆದಾರರಿಗೆ ಬಿಲ್‌ ಪಾವತಿಸಿದ ಕಡತಗಳು, 14ನೇ ಹಣಕಾಸು ಯೋಜನೆಯಡಿ ಕರೆದಿದ್ದ ಟೆಂಡರ್‌ ಹಾಗೂ ವರ್ಕ್‌ ಆರ್ಡರ್‌ ದಾಖಲೆಗಳು, ಲೆಕ್ಕ ಪರಿಶೋಧನೆಗೆ ಒಳಗಾಗಬೇಕಿದ್ದ ಅನುದಾನ ಬಳಕೆಯ ಬಹುತೇಕ ಕಡತಗಳು, ಎಂಟು ಕಂಪ್ಯೂಟರ್‌, 20ಕ್ಕೂ ಹೆಚ್ಚು ಕುರ್ಚಿ, ಪ್ರಿಂಟರ್‌, ಟೆಲಿಫೋನ್‌, ಫ್ಯಾನ್‌ ಮುಂತಾದ ವಸ್ತುಗಳು ಸುಟ್ಟಿವೆ. ಉಪನಗರ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ.

‘ಈ ಅವಘಡಕ್ಕೆ ಕಾರಣ ಏನು ಎಂಬುದರ ಕುರಿತು ಪರಿಶೀಲಿಸಿ, ವರದಿ ನೀಡಲು ಹೆಸ್ಕಾಂ ಅಧಿಕಾರಿಗಳನ್ನು ಕೋರಲಾಗಿದೆ. ಜತೆಗೆ ಪಾಲಿಕೆ ಸೂಪರಿಂಟೆಂಡೆಂಟ್‌ ಎಂಜಿನಿಯರ್‌ಗೂ ವರದಿ ನೀಡಲು ಸೂಚಿಸಿದ್ದೇನೆ. ಆ ವರದಿಗಳು ಬಂದ ಮೇಲೆ ಕಾರಣ ತಿಳಿಯಲಿದೆ’ ಎಂದು ಪಾಲಿಕೆ ಆಯುಕ್ತ ಶಕೀಲ್‌ ಅಹ್ಮದ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

ಎರಡು ವರ್ಷಗಳಿಂದ ಪಾಲಿಕೆಯಲ್ಲಿ ಲೆಕ್ಕಪರಿಶೋಧನೆಯಾಗಿಲ್ಲ. ಕೆಲವು ವಿಭಾಗಗಳಲ್ಲಿ ಅವ್ಯವಹಾರದ ಆರೋಪಗಳು ಕೇಳಿ ಬಂದಿದ್ದವು. ಈ ಹಿನ್ನೆಲೆಯಲ್ಲಿ ಬೆಂಕಿ ಅವಘಡ ಹಲವು ಅನುಮಾನಗಳಿಗೆ ಕಾರಣವಾಗಿದೆ.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 3

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !