ಅಖಾಡಕ್ಕಿಳಿದ ಕೈ–ದಳಪತಿಗಳು

7
ಸರ್ಕಾರ ಉರುಳಿಸಲು ಮಾಫಿಯಾದವರಿಂದ ಕೋಟ್ಯಂತರ ಹಣ ಸಂಗ್ರಹ: ಕುಮಾರಸ್ವಾಮಿ

ಅಖಾಡಕ್ಕಿಳಿದ ಕೈ–ದಳಪತಿಗಳು

Published:
Updated:

ಬೆಂಗಳೂರು: ಸಮ್ಮಿಶ್ರ ಸರ್ಕಾರ ಅಸ್ಥಿರಗೊಳಿಸಲು ಬಿಜೆಪಿ ಯತ್ನಿಸುತ್ತಿದೆ ಎಂಬ ಜೆಡಿಎಸ್‌– ಕಾಂಗ್ರೆಸ್ ಆರೋಪ ಶುಕ್ರವಾರ ರಂಗೇರಿದ್ದು, ‘ಆಪರೇಷನ್ ಕಮಲ’ ನಡೆಯುತ್ತಿದೆ ಎಂಬುದಕ್ಕೆ ‘ಪುರಾವೆ’ ಕೊಟ್ಟ ಆಡಳಿತ ಪಕ್ಷದ ನಾಯಕರು, ಸರ್ಕಾರದ ರಕ್ಷಣೆಗಾಗಿ ಅಖಾಡಕ್ಕೆ ಧುಮುಕಿದ್ದಾರೆ.

ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿ, ಉಪ ಮುಖ್ಯಮಂತ್ರಿ ಜಿ. ಪರಮೇಶ್ವರ, ಜೆಡಿಎಸ್‌ ವರಿಷ್ಠ ಎಚ್.ಡಿ. ದೇವೇಗೌಡ, ಕೆಪಿಸಿಸಿ ಅಧ್ಯಕ್ಷ ದಿನೇಶ್ ಗುಂಡೂರಾವ್‌ ಅವರು ನೇರ ಅಥವಾ ಪರೋಕ್ಷವಾಗಿ ಬಿಜೆಪಿ ನಾಯಕರ ವಿರುದ್ಧ ಮುಗಿಬಿದ್ದಿದ್ದಾರೆ. ಸರ್ಕಾರ ಉರುಳಿಸಲು ಕೋಟಿಗಟ್ಟಲೇ ಹಣ ಸಂಗ್ರಹಿಸುತ್ತಿರುವ ಮಾಫಿಯಾ ಕಿಂಗ್‌ಪಿನ್‌ಗಳು ಬಿಜೆಪಿ ಜತೆ ಕೈಜೋಡಿಸಿದ್ದಾರೆ ಎಂದು ಮುಖ್ಯಮಂತ್ರಿ ಹೇಳಿಕೆ ನೀಡಿದ ಬೆನ್ನಲ್ಲೇ, ಅವರಿಗೆ ಬೆಂಬಲವಾಗಿ ನಿಂತ ಕಾಂಗ್ರೆಸ್ ನಾಯಕರು ಬಿಜೆಪಿ ವಿರುದ್ಧ ಆದಾಯ ತೆರಿಗೆ (ಐ.ಟಿ) ಇಲಾಖೆ ಹಾಗೂ ಭ್ರಷ್ಟಾಚಾರ ನಿಗ್ರಹ ದಳಕ್ಕೆ (ಎಸಿಬಿ) ದೂರು ಕೊಟ್ಟಿದ್ದಾರೆ.

ನಾಯಕರ ಧ್ವನಿಗೆ ತಮ್ಮ ಸ್ವರ ಸೇರಿಸಿರುವ ಕಾಂಗ್ರೆಸ್‌ನ ಸಿ.ಎಸ್. ಶಿವಳ್ಳಿ, ಬಿ.ಸಿ. ಪಾಟೀಲ, ವಿ.ಮುನಿಯಪ್ಪ ಮೊದಲಾದ ಶಾಸಕರು ತಮಗೆ ಮಾತ್ರವಲ್ಲದೇ ತಮ್ಮ ಕುಟುಂಬದವರಿಗೂ ಆಮಿಷ ಒಡ್ಡಿರುವುದು ಹೌದು ಎಂದು ಬಹಿರಂಗ ಹೇಳಿಕೆ ನೀಡಿದ್ದಾರೆ. ಇದು ರಾಜಕೀಯ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

ಕಾಂಗ್ರೆಸ್ ಶಾಸಕರು ಬಿಜೆಪಿಯತ್ತ ಹೋಗದಂತೆ ನೋಡಿಕೊಳ್ಳಲು ಹಾಗೂ ಆಂತರಿಕ ಜಗಳವನ್ನು ಶಮನಗೊಳಿಸಲು ಮುಂದಾಗಿರುವ ಪರಮೇಶ್ವರ ಹಾಗೂ ಜಲಸಂಪನ್ಮೂಲ ಸಚಿವ ಡಿ.ಕೆ. ಶಿವಕುಮಾರ್‌ ಸುದೀರ್ಘ ಹೊತ್ತು ಸಮಾಲೋಚನೆ ನಡೆಸಿದರು. ಬೆಳಗಾವಿಯ ಗೊಂದಲವನ್ನು ಬಗೆಹರಿಸಲು ಹಾಗೂ ಅತೃಪ್ತ ಶಾಸಕರನ್ನು ಓಲೈಸುವ ಕ್ರಮಗಳ ಕುರಿತು ಚರ್ಚಿಸಿದರು.

ಇದನ್ನೂ ಓದಿ: ಸರ್ಕಾರ ಉರುಳಿಸಲು ಮಾಫಿಯಾ ಸಂಚು: ಕುಮಾರಸ್ವಾಮಿ

ಬೆಳಗಾವಿಯಲ್ಲಿ ಬಂಡೆದ್ದಿರುವ ಜಾರಕಿಹೊಳಿ ಸಹೋದರರ ‘ಒಗ್ಗಟ್ಟು’ ಒಡೆಯುವ ಬಗ್ಗೆಯೂ ಚರ್ಚೆ ನಡೆಯಿತು. ಒಂದು ವೇಳೆ ರಮೇಶ ಜಾರಕಿಹೊಳಿ ಬಿಜೆಪಿಯತ್ತ ವಾಲುವ ಸಾಧ್ಯತೆ ಇದ್ದರೆ, ಸತೀಶ ಜಾರಕಿಹೊಳಿ ಅವರಿಗೆ ಸಚಿವ ಸ್ಥಾನ ನೀಡಿ ಕಾಂಗ್ರೆಸ್‌ ಅನ್ನು ಭದ್ರಪಡಿಸಿಕೊಳ್ಳುವ ಬಗ್ಗೆಯೂ ಸಮಾಲೋಚನೆ ನಡೆಯಿತು ಎಂದು ಮೂಲಗಳು ಹೇಳಿವೆ.

ಬಿಜೆಪಿ ಬಲ ಕುಗ್ಗಿಸಲು ಯತ್ನ: ಕಾಂಗ್ರೆಸ್‌ನ ಕೆಲವು ನಾಯಕರ ವಿರುದ್ಧ ಅಸಮಾಧಾನಗೊಂಡಿರುವ ಸತೀಶ ಹಾಗೂ ರಮೇಶ  ಸೋದರರು, ಬಳ್ಳಾರಿಯ ಕೆಲವು ಕಾಂಗ್ರೆಸ್ ಶಾಸಕರು ಬಿಜೆಪಿಯತ್ತ ವಾಲುತ್ತಿದ್ದಾರೆ ಎಂಬ ಮಾತುಗಳು ರಾಜಕೀಯ ವಲಯದಲ್ಲಿ ಹಬ್ಬಿತ್ತು.

ಆಂತರಿಕ ಸಂಘರ್ಷವನ್ನು ತಿಳಿಗೊಳಿಸದೇ ಹೋದರೆ ಪರಿಸ್ಥಿತಿ ವಿಕೋಪ ಹೋಗಬಹುದು. ಈ ಅವಕಾಶವನ್ನು ಬಿಜೆಪಿ ಬಳಸಿಕೊಂಡು ಸರ್ಕಾರ ಅಸ್ಥಿರಗೊಳಿಸಬಹುದು ಎಂಬ ಭಯ ಕಾಂಗ್ರೆಸ್ ನಾಯಕರನ್ನು ಕಾಡಿತ್ತು. ಸಮ್ಮಿಶ್ರ ಸರ್ಕಾರ ಅಲ್ಪಮತಕ್ಕೆ ಕುಸಿಯುವಂತೆ ಮಾಡಬೇಕಾದರೆ ಕನಿಷ್ಠ 17 ಶಾಸಕರು ರಾಜೀನಾಮೆ ಕೊಡಬೇಕಾಗಿತ್ತು. ಆ ಬಲವನ್ನು ಕ್ರೋಡೀಕರಿಸಲು ಬಿಜೆಪಿಯ ಕೆಲವು ನಾಯಕರು ಯತ್ನಿಸಿದ್ದರು ಎಂದು ಕಾಂಗ್ರೆಸ್‌ ನಾಯಕರು ಹೇಳುತ್ತಿದ್ದರು.

**

ಛಲ ಬಿಡದ ಯಡಿಯೂರಪ್ಪ

ಪಕ್ಷದ ವರಿಷ್ಠರು ಸ್ಪಷ್ಟ ಸೂಚನೆ ನೀಡಿದರೂ ಬಿಜೆಪಿ ನಾಯಕ ಯಡಿಯೂರಪ್ಪ ಮತ್ತು ಶಾಸಕ ಶ್ರೀರಾಮುಲು ಮಾತ್ರ ಛಲ ಬಿಟ್ಟಿಲ್ಲ ಎಂದು ಆ ಪಕ್ಷದ ಮೂಲಗಳು ಹೇಳಿವೆ.

ಕಾಂಗ್ರೆಸ್‌ನ ಆಂತರಿಕ ಬೇಗುದಿ ಶಮನಗೊಳ್ಳದೇ ಶಾಸಕರು ಪಕ್ಷ ತೊರೆಯಲು ನಿರ್ಧರಿಸಿದರೆ ಅಂತಹವರನ್ನು ಸೆಳೆಯಲು ಅಗತ್ಯ ಕಾರ್ಯಸೂಚಿ ಸಿದ್ಧಪಡಿಸಿಕೊಳ್ಳಲು ಯಡಿಯೂರಪ್ಪ ಮುಂದಾಗಿದ್ದಾರೆ.

ಯುರೋಪ್‌ ಪ್ರವಾಸದಲ್ಲಿರುವ ಕಾಂಗ್ರೆಸ್ ನಾಯಕ ಸಿದ್ದರಾಮಯ್ಯ ಭಾನುವಾರ ಮುಂಜಾನೆ 3ಕ್ಕೆ ರಾಜಧಾನಿಗೆ ವಾಪಸ್ ಆಗಲಿದ್ದಾರೆ. ಅದಾದ ಬಳಿಕವೂ ಕಾಂಗ್ರೆಸ್‌ನ ಒಳ ಸಂಘರ್ಷ ನಿಲ್ಲದೇ ಇದ್ದರೆ ‘ಆಪರೇಷನ್‌ ಕಮಲ’ ನಡೆಸುವ ಲೆಕ್ಕಾಚಾರ ಯಡಿಯೂರಪ್ಪ ಅವರದ್ದಾಗಿದೆ.

ಈ ಬೆಳವಣಿಗೆಗಳ ಬೆನ್ನಲ್ಲೇ  ಸೆ. 18ರಂದು ಬಿಜೆಪಿ ಶಾಸಕರು, ಪದಾಧಿಕಾರಿಗಳ ಸಭೆಯನ್ನು ಯಡಿಯೂರಪ್ಪ ಕರೆದಿರುವುದು ರಾಜಕೀಯ ವಲಯದಲ್ಲಿ ಕುತೂಹಲ ಮೂಡಿಸಿದೆ.

**

‘ಸರ್ಕಾರ ಬಿದ್ದರೆ ದೈವಕೃಪೆಗೆ ವಿರುದ್ಧ’

36 ಶಾಸಕರನ್ನು ಇಟ್ಟುಕೊಂಡ ವ್ಯಕ್ತಿ ರಾಜ್ಯವನ್ನು ಆಳುತ್ತಾರೆ ಎಂದರೆ ಆಶ್ಚರ್ಯವಾಗುತ್ತದೆ. ದೈವದ ಶಕ್ತಿ ಇಲ್ಲ ಅಂದರೆ ಈ ಕೆಲಸವನ್ನು ಯಾರಿಂದಲೂ ಮಾಡಲು ಸಾಧ್ಯವಿಲ್ಲ. ಇದಕ್ಕೆ ವಿರುದ್ಧವಾಗಿ ಏನಾದರೂ ಆದದ್ದೇ ಆದರೆ, ಅದು ಯಾರೋ ಒಬ್ಬರಿಗೆ ಮಾಡುವ ಅನ್ಯಾಯವಲ್ಲ. ಅದು ದೈವಕ್ಕೆ, ದೈವದ ವಿರುದ್ಧವಾಗಿ ಮಾಡುವ ಕೆಲಸ ಎಂದು ಹೇಳಬೇಕಾಗುತ್ತದೆ.

-ನಿರ್ಮಲಾನಂದನಾಥ ಸ್ವಾಮೀಜಿ, ಆದಿಚುಂಚನಗಿರಿ ಮಠ (ಶಿವಮೊಗ್ಗದಲ್ಲಿ ಹೇಳಿದ್ದು)

**

ಸರ್ಕಾರ ಉರುಳಿಸಲು ಯಾರು ಒಟ್ಟಾಗಿದ್ದಾರೆ ಎನ್ನುವುದು ಗೊತ್ತಿದೆ. ಸರ್ಕಾರ ಉಳಿಸಲು ಕಾನೂನು ಪ್ರಕಾರ ಏನು ಬೇಕೋ ಅದನ್ನು ಮಾಡುತ್ತೇನೆ.

-ಎಚ್‌.ಡಿ. ಕುಮಾರಸ್ವಾಮಿ, ಮುಖ್ಯಮಂತ್ರಿ

**

ಸಮ್ಮಿಶ್ರ ಸರ್ಕಾರವನ್ನು ಅಸ್ಥಿರಗೊಳಿಸಲು ಬಿಜೆಪಿ ನಾಯಕರು ಕೋಟಿ ಕೋಟಿ ಆಮಿಷ ಒಡ್ಡುತ್ತಿದ್ದು, ಆಪರೇಷನ್ ಕಮಲ ಮಾಡಲು ಮುಂದಾಗಿದ್ದಾರೆ. ಈ ಬಗ್ಗೆ ಆದಾಯ ತೆರಿಗೆ ಇಲಾಖೆ ಹಾಗೂ ಎಸಿಬಿಗೆ ದೂರು ನೀಡಲಾಗಿದೆ.
-ಜಿ. ಪರಮೇಶ್ವರ, ಗೃಹ ಸಚಿವ

**

ಸಿದ್ದರಾಮಯ್ಯ ಧರ್ಮಸ್ಥಳಕ್ಕೆ ಹೋದಾಗ ಸರ್ಕಾರಕ್ಕೆ ಬೆಂಕಿ ಹೊತ್ತಿತ್ತು. ಈಗ ಯುರೋಪ್‌ಗೆ ಹೋದಾಗ ಮತ್ತೆ ಹೊತ್ತಿಕೊಂಡಿದೆ. ಕುಮಾರಸ್ವಾಮಿ ಹೇಳುತ್ತಿರುವ ಕಿಂಗ್‌ ಪಿನ್ ಸಿದ್ದರಾಮಯ್ಯ ಅವರೇ ಇರಬೇಕು
-ಆರ್. ಅಶೋಕ್, ಶಾಸಕ

**

ನಮ್ಮ ಹತ್ತಿರ ಇರುವುದು ಯಡಿಯೂರಪ್ಪ ಎಂಬ ಕಿಂಗ್ ಮಾತ್ರ; ಪಿನ್‌ಗಳೆಲ್ಲ ಕುಮಾರಸ್ವಾಮಿ ಅವರ ಹತ್ತಿರವೇ ಇವೆ. ಆ ಪಿನ್‌ಗಳೇ ಅವರಿಗೆ ಚುಚ್ಚುತ್ತಿವೆ
-ಆಯನೂರು ಮಂಜುನಾಥ್‌, ವಿಧಾನಪರಿಷತ್ ಸದಸ್ಯ, ಬಿಜೆಪಿ

ಬರಹ ಇಷ್ಟವಾಯಿತೆ?

  • 15

    Happy
  • 2

    Amused
  • 0

    Sad
  • 1

    Frustrated
  • 6

    Angry

Comments:

0 comments

Write the first review for this !